“சர்வதேச கிரிக்கெட்டிலிருந்து ஓய்வு பெறுகிறேன்.. இதுதான் கடைசி டெஸ்ட்”.. பென் ஸ்டோக்ஸ் அறிவிப்பு

லண்டன்: இங்கிலாந்து டெஸ்ட் கிரிக்கெட் அணியின் கேப்டன் பென் ஸ்டோக்ஸ் சர்வதேச கிரிக்கெட்டிலிருந்து தனது ஓய்வை ஞாயிற்றுக்கிழமை அன்று அறிவித்தார். நியூசிலாந்துக்கு எதிராக டிரெண்ட் பிரிட்ஜ் மைதானத்தில் நடைபெற்று வரும் மூன்றாவது டெஸ்ட் போட்டியே தனது கடைசி சர்வதேசப் போட்டியாக இருக்கும் என்றும் அவர் உறுதிப்படுத்தியுள்ளார்.

கடந்த 2011-ல் ஒருநாள் மற்றும் டி20 போட்டிகளில் அறிமுகமான பென் ஸ்டோக்ஸ், 2013 டிசம்பரில் ஆஷஸ் தொடரின் போது அடிலெய்டு ஓவல் மைதானத்தில் தனது முதல் டெஸ்ட் போட்டியில் விளையாடினார். இங்கிலாந்து அணிக்காகப் பல மறக்க முடியாத ஆட்டங்களை வெளிப்படுத்தியுள்ள இவரின் கிரிக்கெட் வாழ்க்கையில், 2019 உலகக்கோப்பை இறுதிப்போட்டி மற்றும் ஆஸ்திரேலியாவுக்கு எதிரான ஹெடிங்லி டெஸ்ட் போட்டி ஆகியவை மிக முக்கியமானவையாகும்.

கடந்த 2019 உலகக்கோப்பை இறுதிப்போட்டியில் நியூசிலாந்துக்கு எதிராக அவர் ஆட்டமிழக்காமல் எடுத்த 84 ரன்கள், போட்டியை சூப்பர் ஓவர் வரை எடுத்துச் சென்று இங்கிலாந்து சாம்பியன் பட்டம் வெல்ல உதவியது. அதேபோல், ஹெடிங்லி டெஸ்ட் போட்டியில் ஆட்டமிழக்காமல் 135 ரன்கள் குவித்து, தோல்வியின் விளிம்பில் இருந்த இங்கிலாந்து அணியை வரலாற்று வெற்றிக்கு அழைத்துச் சென்றார். 2016-ல் கேப் டவுனில் தென்னாப்பிரிக்காவுக்கு எதிராக அவர் அடித்த 258 ரன்கள் டெஸ்ட் போட்டிகளில் அவரது அதிகபட்ச ஸ்கோராகும்.

கடந்த 2022-ல் இங்கிலாந்து டெஸ்ட் அணியின் கேப்டனாகப் பொறுப்பேற்ற பென் ஸ்டோக்ஸ், சிறந்த முறையில் அணியை வழிநடத்தினார். சமீபத்தில், லார்ட்ஸ் டெஸ்ட் வெற்றிக்குப் பிறகு மதுபான விடுதியில் தகராறில் ஈடுபட்டார். அதனால் அணிக் கட்டுப்பாடுகளை மீறியதாகக் கூறி நியூசிலாந்துக்கு எதிரான இரண்டாவது டெஸ்டில் இருந்து அவர் நீக்கப்பட்டார்.

வேகப்பந்து வீச்சாளர் கஸ் அட்கின்சனும் இந்த சர்ச்சையில் சிக்கினார். எனினும், விசாரணைக்குப் பிறகு இருவரும் விடுவிக்கப்பட்டு, மூன்றாவது டெஸ்ட் போட்டிக்கான அணியில் சேர்க்கப்பட்டனர். அப்போதே பென் ஸ்டோக்ஸ் கிரிக்கெட்டில் இருந்து ஓய்வு பெறப் போவதாக தகவல்கள் கசிந்த வண்ணம் இருந்தன. ஆனால், நியூசிலாந்துக்கு எதிரான மூன்றாவது டெஸ்ட் போட்டியில் மீண்டும் கேப்டனாக இடம் பெற்ற பென் ஸ்டோக்ஸ் தனது ஓய்வு அறிவிப்பை வெளியிட்டு இருக்கிறார்.

வைபவ் சூர்யவன்ஷி அறிமுகம் சாதாரணமா அயர்லாந்தில் நடக்கக் கூடாது.. பிசிசிஐ போட்ட பிரம்மாண்ட கணக்கு

பென் ஸ்டோக்ஸின் ஓய்வு குறித்துப் பேசிய இங்கிலாந்து கிரிக்கெட் வாரியத் தலைவர் ரிச்சர்ட் தாம்சன், "இங்கிலாந்து கிரிக்கெட் வரலாற்றில் மிகச்சிறந்த வீரர்களில் ஒருவராக பென் ஸ்டோக்ஸ் விடைபெறுகிறார். அழுத்தமான தருணங்களில் அவர் வெளிப்படுத்திய ஆட்டம் மில்லியன் கணக்கான ரசிகர்களின் மனதில் எப்போதும் நிலைத்திருக்கும்" என்று பாராட்டியுள்ளார்.