“இனியும் வேடிக்கை பார்க்க முடியாது”.. ஆர்சிபி அணியால் வந்த வினை.. பொங்கி எழுந்த பிசிசிஐ செயலாளர்

பெங்களூர்: பெங்களூரு சின்னசாமி மைதானத்தில் கடந்த ஜூன் 4 அன்று நடைபெற்ற ராயல் சேலஞ்சர்ஸ் பெங்களூரு (RCB) அணியின் ஐபிஎல் வெற்றி கொண்டாட்டத்தின்போது ஏற்பட்ட கூட்ட நெரிசலில் 11 பேர் உயிரிழந்த துயரச் சம்பவத்தைத் தொடர்ந்து, இனி இதுபோன்ற கோப்பை வென்ற கொண்டாட்ட நிகழ்வுகளை ஒழுங்குபடுத்துவதற்கான அதிகாரப்பூர்வ வழிகாட்டுதல்களை உருவாக்க இந்திய கிரிக்கெட் கட்டுப்பாட்டு வாரியம் (BCCI) பரிசீலித்து வருகிறது.

இது தொடர்பாக பிசிசிஐ செயலாளர் தேவாஜித் சைகியா கூறுகையில், "நாங்கள் அமைதியாக வேடிக்கை பார்க்க முடியாது" என்றும், இதுபோன்ற சம்பவங்கள் மீண்டும் நிகழாமல் தடுக்க வாரியம் நடவடிக்கை எடுக்கும் என்றும் தெரிவித்தார். ஆர்சிபி அணியால் தனிப்பட்ட முறையில் ஏற்பாடு செய்யப்பட்ட நிகழ்வாக இருந்தாலும், அதன் விளைவுகள் ஒட்டுமொத்த கிரிக்கெட் உலகத்துடன் தொடர்புடையவை என்பதையும் அவர் ஒப்புக்கொண்டார்.

புதிய கட்டுப்பாடுகள்:

அதன்படி இனி இந்திய அணி உட்பட எந்த ஒரு அணியும் சாலைகளில் கோப்பையை ஏந்தி ஊர்வலம் நடத்தக் கூடாது என பிசிசிஐ தடை விதிக்கக்கூடும் என எதிர்பார்க்கப்படுகிறது. மேலும், கிரிக்கெட் மைதானங்களில் கொண்டாட்ட நிகழ்வுகள் நடத்துவது குறித்தும் கட்டுப்பாடுகள் விதிக்கப்படலாம்.

குறிப்பாக ரசிகர்களை அழைக்கும் விழாக்களுக்கு போதிய கால அவகாசம் இருத்தல், டிக்கெட் விநியோகம், ரசிகர்கள் பாதுகாப்பு, அவசரகால முன்னேற்பாடுகள், காவல்துறை ஆய்வு என பல்வேறு அம்சங்கள் குறித்தும் அந்த கட்டுப்பாடுகள் இருக்கும் எனவும் கூறப்படுகிறது.

கர்நாடக அரசு நடவடிக்கை:

பெங்களூரில் சின்னசாமி மைதானத்தின் கொள்ளளவை விடப் பல மடங்கு அதிகமான கூட்டம் கூடியதே இந்தக் கூட்ட நெரிசலுக்குக் காரணம். கர்நாடக அரசு இந்தச் சம்பவம் தொடர்பாக நடவடிக்கை எடுத்துள்ளது. இது தொடர்பாகக் காவல்துறையினர் மற்றும் ஏற்பாடு செய்த அதிகாரிகள் மீது கைதுகள் மற்றும் ஒழுங்கு நடவடிக்கைகள் எடுக்கப்பட்டுள்ளன.

கவுதம் கம்பீர் எதிர்ப்பு:

இந்திய அணியின் தலைமைப் பயிற்சியாளர் கவுதம் கம்பீர் இந்தச் சம்பவம் குறித்துக் கருத்து தெரிவித்துள்ளார். அவர் திறந்த சாலைகளில் கொண்டாட்டங்கள் நடத்துவதற்கு கடுமையாக எதிர்ப்பு தெரிவித்துள்ளார். மனித உயிர்களை விட கொண்டாட்டங்கள் முக்கியமானவை அல்ல என்று வலியுறுத்திய அவர், மைதானங்களுக்குள் பாதுகாப்பான, மூடிய வளாக நிகழ்வுகளை நடத்த வேண்டும் என்று வாதிட்டார்.

இனிவரும் காலங்களில் இதுபோன்ற துயரச் சம்பவங்கள் நிகழாமல் தடுக்க, பிசிசிஐ கடுமையான விதிமுறைகளை அமல்படுத்தும் என்று எதிர்பார்க்கப்படுகிறது. ரசிகர்களின் பாதுகாப்புக்கு முன்னுரிமை அளிக்கும் வகையில் இந்த வழிகாட்டுதல்கள் அமையும் எனத் தெரிகிறது.