டி20 கிரிக்கெட்டில் புவனேஸ்வர் குமார் சாதனை.. அயர்லாந்து போட்டியில் அசத்தல் பந்துவீச்சு..முழு விவரம்

By Javid Ahamed

Updated: Monday, June 27, 2022, 21:49 [IST]

டுபிளின்: இந்திய கிரிக்கெட் வீரர் புவனேஸ்வர் குமார், சர்வதேச டி20 கிரிக்கெட்டில் புதிய சாதனை ஒன்றை படைத்துள்ளார்.

இந்திய அணியின் நம்பிக்கை நட்சத்திரமாக கடந்த 10 ஆண்டுகளாக பந்துவீச்சில் இருந்து வருபவர் புவனேஸ்வர் குமார்.

தனது ஸ்விங் பந்துவீச்சு மூலம் எதிரணிக்கு தூங்கா இரவுகளை பரிசளிக்கும் புவனேஸ்வர் குமார் தற்போது ஒருநாள் மற்றும் டி20 போட்டியில் மட்டும் விளையாடி வருகிறார்.

தொடர் நாயகன்

காயத்தால், தனது கிரிக்கெட் வாழ்க்கை பாதிக்கப்பட்டாலும், தற்போது பழைய ஃபார்மை மீட்டு எடுத்துள்ளார். தென்னாப்பிரிக்காவுக்கு எதிரான டி20 தொடரில் கூட குறைவான ரன்களை விட்டு கொடுத்து 6 முக்கிய விக்கெட்டுகளை கைப்பற்றி தொடர் நாயகன் விருதை புவனேஸ்வர் குமார் தட்டி சென்றார். தற்போது அயர்லாந்து தொடரில் புவனேஸ்வர் குமார் துணை கேப்டனாக செயல்படுகிறார்.

உலக சாதனை

இதே போன்று அயர்லாந்துக்கு எதிரான முதல் டி20 போட்டியில் புவனேஸ்வர் குமார், தனது அற்புதமான ஸ்விங் பந்து மூலம், அயர்லாந்து கேப்டன் பால்பிரினை ஸ்டம்புகள் சிதற ஆட்டமிழக்க வைத்தார். இதன் மூலம் சர்வதேச டி20 கிரிக்கெட்டில் பவர்பிளேவில் அதிக விக்கெட்டுகள் வீழ்த்திய வீரர் என்ற சாதனையை புவனேஸ்வர் குமார் படைத்தார்.

கட்டுக்கோப்பான பந்துவீச்சு

மற்ற பந்துவீச்சாளர்கள் அதிக ரன்களை விட்டு கொடுத்தனர். ஹர்திக் பாண்டியா 2 ஓவருக்கு 26 ரன்களும், ஆவேஷ் கான் 2 ஓவருக்கு 22 ரன்களும், உம்ரான் மாலிக் ஒரு ஓவருக்கு 11 ரன்கள் விட்டு கொடுக்க, புவனேஸ்வர் குமார் 3 ஓவருக்கு 16 ரன்கள் விட்டு கொடுத்து ஒரு விக்கெட்டை வீழ்த்தினார்.புவனேஸ்வர் குமார் டி20 உலகக் கோப்பையில் துருப்பு சீட்டு பந்துவீச்சாளராக இருப்பார் என்று கவாஸ்கரும் நம்பிக்கை தெரிவித்தார்.