வெறும் 5 ஓவர் பவுலிங் வீச இவர்தான் காரணம்.. உண்மையை போட்டு உடைத்த ஷர்துல்.. என்ன நடந்தது?

மான்செஸ்டர்:மான்செஸ்டரில் இங்கிலாந்துக்கு எதிராக நடைபெற்று வரும் நான்காவது டெஸ்ட் போட்டியில், ஆல்-ரவுண்டர் ஷர்துல் தாகூருக்கு ஏன் அதிக ஓவர்கள் வழங்கப்படவில்லை என்ற கேள்வி ரசிகர்கள் மத்தியில் பெரிய விவாதமாக மாறியுள்ளது. முதல் டெஸ்டில் சொற்ப ஓவர்களே வீசிய தாகூர், இந்த போட்டியின் இரண்டாம் நாளில் வெறும் 5 ஓவர்கள் மட்டுமே வீசியது பலரையும் ஆச்சரியத்தில் ஆழ்த்தியது.

மான்செஸ்டர் டெஸ்டின் இரண்டாம் நாள் ஆட்டத்தில், இந்திய அணி தனது முதல் இன்னிங்ஸில் 358 ரன்களுக்கு ஆட்டமிழந்தது. இதைத் தொடர்ந்து களமிறங்கிய இங்கிலாந்து அணி, இந்திய பந்துவீச்சை நாலாபுறமும் சிதறடித்தது. இரண்டாம் நாள் ஆட்டநேர முடிவில், வெறும் 46 ஓவர்களில் 2 விக்கெட்டுகளை மட்டுமே இழந்து 225 ரன்களைக் குவித்தது. காலை நேரத்தில் இந்திய பேட்ஸ்மேன்களை திணறடித்த பந்து, மாலையில் இந்திய பந்துவீச்சாளர்களுக்கு பெரிய அளவில் ஒத்துழைக்கவில்லை. இந்தச் சூழலில்தான் ஷர்துல் தாகூருக்கு குறைவான ஓவர்கள் வழங்கப்பட்டது விவாதத்தை ஏற்படுத்தியது.

இந்நிலையில், போட்டிக்குப் பிறகான செய்தியாளர் சந்திப்பில் இதுகுறித்து ஷர்துல் தாகூரிடம் நேரடியாகவே கேள்வி எழுப்பப்பட்டது. அதற்கு பதிலளித்த தாகூர், பந்துவீசுவது குறித்த அனைத்து முடிவுகளையும் கேப்டன் தான் எடுப்பார் என்று வெளிப்படையாகக் கூறினார்.

இதுபற்றி அவர் பேசுகையில், "யார் பந்துவீச வேண்டும், எப்போது வீச வேண்டும் என்பதை கேப்டன்தான் முடிவு செய்வார். இதில் வீரர்களுக்கு பெரிய பங்கு இருக்காது. முதல் போட்டியைப் பொறுத்தவரை, எனக்கு பந்துவீச அதிக வாய்ப்புகள் இல்லை என்று கேப்டன் சுப்மன் கில் என்னிடம் கூறினார்," என்று தெரிவித்தார்.

மேலும் தொடர்ந்த அவர், "இந்த போட்டியைப் பொறுத்தவரை, ஆட்டம் சென்ற விதத்தில் இன்னும் சில ஓவர்கள் வீச வாய்ப்பு இருந்திருக்கலாம். ஆனால், இன்னும் மூன்று நாட்கள் ஆட்டம் மீதமுள்ளது. எனவே, வரும் நாட்களில் எனக்கு நிச்சயம் அதிக ஓவர்கள் கிடைக்கும் என்று நம்புகிறேன்," என்றார்.

தொடர்ந்து பந்துவீசாமல் இருக்கும்போது, ஒரு பந்துவீச்சாளரின் ரிதம் பாதிக்கப்படுவது கடினம் என்பதையும் தாகூர் ஒப்புக்கொண்டார். "எப்போது பந்துவீசுவோம், எவ்வளவு நேரம் வீசுவோம் என்று தெரியாத நிலையில் ரிதத்தைக் கண்டறிவது எப்போதும் சவாலானது. ஆனாலும், என் அனுபவத்தைப் பயன்படுத்தி, கிடைக்கும் வாய்ப்புகளில் சிறப்பாக செயல்பட முயற்சிப்பேன். அதைத்தான் என்னால் செய்ய முடியும்," என்று தாகூர் நம்பிக்கையுடன் பேசி முடித்தார்.

இந்திய அணியில் ஒரு வேகப்பந்துவீச்சு ஆல்-ரவுண்டராக முக்கியப் பங்காற்றி வரும் ஷர்துல் தாகூரின் இந்த பதில், அணிக்குள் முடிவுகள் எப்படி எடுக்கப்படுகின்றன என்பதை தெளிவாகக் காட்டியுள்ளது. கேப்டன் சுப்மன் கில்லின் இந்த முடிவு சரியா, தவறா என்பதை போட்டியின் முடிவு தான் சொல்லும்.