5 மணி நேரம் நடந்த டென்னிஸ் ஆட்டம்.. ஸ்வெரேவை வீழ்த்தி இறுதிப்போட்டிக்கு முன்னேறிய அல்காரஸ்

மெல்போர்ன்: 2026 ஆஸ்திரேலிய ஓபன் டென்னிஸ் தொடரின் ஆடவர் ஒற்றையர் பிரிவு அரையிறுதி ஆட்டத்தில், ஸ்பெயின் நாட்டின் இளம் நட்சத்திரம் கார்லோஸ் அல்காரஸ், ஜெர்மனி வீரர் அலெக்சாண்டர் ஸ்வெரேவை வீழ்த்தி இறுதிப்போட்டிக்கு முன்னேறியுள்ளார். சுமார் 5 மணி நேரம் 27 நிமிடங்கள் நீடித்த இந்த மாரத்தான் ஆட்டம் ரசிகர்களுக்கு ஒரு விருந்தாக அமைந்தது.

ஜனவரி 30 ஆம் தேதியை அல்காரஸ் தனது வாழ்நாளில் மறக்க மாட்டார். உடல் ரீதியாக முழு தகுதியுடன் இல்லாத போதிலும், மன உறுதியால் அவர் இந்த வெற்றியைப் பெற்றுள்ளார். போட்டியின் இடையே அவர் உடல்நலம் பாதிக்கப்பட்டுத் வாந்தி எடுத்தார். கால்களில் தசைப்பிடிப்பு ஏற்பட்டது. இருப்பினும், களத்தில் ஒரு போர்வீரனைப் போலச் செயல்பட்ட அவர், 6-4, 7-6, 6-7, 7-6, 7-5 என்ற செட் கணக்கில் ஸ்வெரேவை வீழ்த்தினார். அதுவும் 5 மணி நேரத்துக்கும் மேல் போராடி வென்று இருக்கிறார்.

ஆட்டத்தின் போக்கு

இந்த அரையிறுதி ஆட்டத்தின் தொடக்கத்தில் கார்லோஸ் அல்காரஸ் ஆதிக்கம் செலுத்தினார். முதல் இரண்டு செட்களை அவர் கைப்பற்றியபோது, போட்டி எளிதாக முடியும் என்று எதிர்பார்க்கப்பட்டது. ஆனால், மூன்றாவது மற்றும் நான்காவது செட்களில் ஸ்வெரேவ் ஆக்ரோஷமாக விளையாடிப் பதிலடி கொடுத்தார். இதனால் ஆட்டம் 2-2 என்ற கணக்கில் சமநிலையை அடைந்தது.

வெற்றியாளரைத் தீர்மானிக்கும் ஐந்தாவது மற்றும் கடைசி செட்டில், ஸ்வெரேவ் ஆரம்பத்தில் முன்னிலை வகித்தார். ஒரு கட்டத்தில் ஸ்வெரேவ் வெற்றி பெறும் நிலையில் இருந்தார். ஆனால், கடைசி நேரத்தில் தனது ஆட்டத்தின் வேகத்தை மாற்றிய அல்காரஸ், 5-5 எனச் சமன் செய்து, இறுதியில் 7-5 என்ற கணக்கில் அந்த செட்டைக் கைப்பற்றி வெற்றியை ருசித்தார்.

இளம் வயதில் சாதனை

இந்த வெற்றியின் மூலம், டென்னிஸ் வரலாற்றில் ஒரு புதிய சாதனையை அல்காரஸ் படைத்துள்ளார். 'ஓபன் எரா' (Open Era) வரலாற்றில், மிகக் குறைந்த வயதில் (22 வயது) நான்கு வகையான கிராண்ட் ஸ்லாம் தொடர்களின் ( ஆஸ்திரேலிய ஓபன், பிரெஞ்சு ஓபன், விம்பிள்டன், அமெரிக்க ஓபன்) இறுதிப்போட்டிக்கும் தகுதி பெற்ற வீரர் என்ற பெருமையை அவர் பெற்றுள்ளார். இதன் மூலம் 1993ஆம் ஆண்டு ஜிம் கூரியர் படைத்த சாதனையை அவர் முறியடித்துள்ளார்.

கரியர் கிராண்ட் ஸ்லாம் கனவு

ஞாயிற்றுக்கிழமை நடைபெறும் இறுதிப்போட்டியில் அல்காரஸ் வெற்றி பெற்றால், அவர் 'கரியர் கிராண்ட் ஸ்லாம்' என்ற உயரிய அந்தஸ்தைப் பெறுவார். அதாவது, நான்கு வகையான கிராண்ட் ஸ்லாம் பட்டங்களையும் வென்ற வீரர் என்ற பெருமை அவருக்குக் கிடைக்கும்.

அடுத்த மோதல் யாருடன்?

இறுதிப்போட்டியில் கார்லோஸ் அல்காரஸ், மற்றொரு அரையிறுதி ஆட்டத்தின் வெற்றியாளரைச் சந்திப்பார். நடப்பு சாம்பியன் ஜானிக் சின்னர் மற்றும் 24 முறை கிராண்ட் ஸ்லாம் பட்டம் வென்ற நோவக் ஜோகோவிச் ஆகியோருக்கு இடையிலான ஆட்டத்தில் வெல்பவர் அல்காரஸை எதிர்கொள்வார். ஜோகோவிச் ஏற்கனவே 10 முறை ஆஸ்திரேலிய ஓபன் பட்டத்தை வென்றுள்ளார் என்பது குறிப்பிடத்தக்கது. தோல்வியடைந்த ஸ்வெரேவ், தனது வாழ்நாளின் மிக நீண்ட போட்டியில் விளையாடியும், நூலிழையில் வெற்றியைத் தவறவிட்டது அவருக்குப் பெரும் ஏமாற்றத்தை அளித்துள்ளது.