வெறும் 5 ரன் கொடுத்து 7 விக்கெட்.. உலக சாதனை படைத்த இலங்கை கேப்டன் சமாரி அத்தபட்டு

துபாய்: 2026 மகளிர் ஆசியக் கோப்பை கிரிக்கெட் தொடரில், இந்தோனேசியாவுக்கு எதிரான போட்டியில் இலங்கை கேப்டன் சமாரி அத்தபட்டு 5 ரன்கள் மட்டுமே கொடுத்து 7 விக்கெட்டுகளை வீழ்த்தி புதிய உலக சாதனை படைத்துள்ளார். இதன் மூலம் ஆசியக் கோப்பை வரலாற்றில் (ஆடவர் மற்றும் மகளிர் பிரிவில்) ஒரு போட்டியில் 7 விக்கெட்டுகளை வீழ்த்திய முதல் வீரர் என்ற பெருமையை அவர் பெற்றுள்ளார்.

துபாயில் நேற்று (செப்டம்பர் 2) நடைபெற்ற மகளிர் ஆசியக் கோப்பை குரூப் பி ஆட்டத்தில், இலங்கை மற்றும் இந்தோனேசியா அணிகள் மோதின. இப்போட்டியில் முதலில் பேட்டிங் செய்த இலங்கை அணி நிர்ணயித்த 125 ரன்கள் இலக்கை நோக்கி விளையாடிய இந்தோனேசியா அணி, சமாரி அத்தபட்டுவின் சுழலில் சிக்கி வெறும் 49 ரன்களுக்கு சுருண்டது. இதனால் இலங்கை அணி 75 ரன்கள் வித்தியாசத்தில் அபார வெற்றி பெற்றது.

இலங்கை கேப்டன் சமாரி அத்தபட்டு 3.3 ஓவர்கள் பந்துவீசி, வெறும் 5 ரன்கள் மட்டுமே கொடுத்து 7 விக்கெட்டுகளைக் கைப்பற்றி மிரட்டினார். இதற்கு முன்பு கடந்த 2008 ஆம் ஆண்டில் பாகிஸ்தானின் ஜாவேரியா கான் வங்கதேசத்திற்கு எதிராக 6 விக்கெட்டுகளை வீழ்த்தியதே ஆசியக் கோப்பையின் சிறந்த பந்துவீச்சாக இருந்தது. தற்போது அந்த 18 ஆண்டுகால சாதனையை அத்தபட்டு தகர்த்துள்ளார்.

“ரோஹித் சர்மா இந்திய அணியில் இருக்கலாமா?”.. பிசிசிஐ அவசரக் கூட்டம்.. 2027 உலகக்கோப்பை பற்றி முடிவு

மேலும், சர்வதேச டி20 கிரிக்கெட்டில் ஒரு போட்டியில் 7 விக்கெட்டுகளை வீழ்த்திய 2-வது கேப்டன் என்ற பெருமையையும் அத்தபட்டு பெற்றுள்ளார். இதற்கு முன்பு அர்ஜென்டினாவின் அலிசன் ஸ்டாக்ஸ் மட்டுமே இந்த சாதனையைச் செய்திருந்தார். அதுமட்டுமின்றி, இலங்கை அணிக்காக டி20 போட்டியில் சிறந்த பந்துவீச்சை பதிவு செய்த அஜந்தா மெண்டிஸின் 6 விக்கெட்டுகள் சாதனையும் அத்தபட்டு முறியடித்துள்ளார். இந்த வெற்றியின் மூலம் இந்தத் ஆசியக் கோப்பை தொடரின் அரையிறுதி சுற்றுக்கு இலங்கை அணி தனது இடத்தை கிட்டத்தட்ட உறுதி செய்துள்ளது.