முதல் விக்கெட்
176 ரன்கள் என்ற வெற்றி இலக்குடன் சென்னை அணி களம் இறங்கியது. தொடக்க வீரர்களில் டுபிளெசிஸ் 1 ரன்னில் ரன் அவுட்டாகி அதிர்ச்சி அளித்தார். அதன்பின்னர், வந்த சுரேஷ் ரெய்னா, வாட்சனுடன் கை கோர்த்தார்.
ரெய்னா 38
இருவரும் அதிரடியாக ஆட ஆரம்பித்தனர். ஸ்கோர் 80 ரன்களை எட்டிய போது சின்ன தல ரெய்னா 38 ரன்களில் ஸ்டெம்பிங் செய்யப்பட்டார். அபாரமாக ஆடிய வாட்சன் அரைசதம் கடந்தார்.
96 ரன்களில் அவுட்
அதன்பின்னர் வாட்சனின் ஆட்டத்தில் அனல் பறந்தது. அவருக்கு இணையாக ராயுடுவும் பக்கபலமாக இருந்தார். சதத்தை நெருங்கவார் என்று எதிர்பார்க்கப் பட்ட வாட்சன் 96 ரன்களில் ஆட்டமிழந்தார்.
தோனிக்கு பதில் ஜாதவ்
அவரது ரன்களில் 6 சிக்சர்கள், 9 பவுண்ரிகள் அடங்கும். குறிப்பாக ரஷித் கானின் பந்துகளை பதம் பார்த்துவிட்டார். 18வது ஓவரில் அவர் வெளியேறிய போது தல தோனி வருவார்... பினிஷிங் கொடுப்பார் என்று எதிர்பார்க்க களத்துக்கு வந்ததோ அவரின் பரம சிஷ்யர் கேதர் ஜாதவ்.
20வது ஓவர் டென்ஷன்
ஆட்டத்திலேயே 20வது ஓவர் தான் பிபி எகிற வைக்கும் படியாக இருந்தது. அந்த ஓவரில் சென்னை பெற 9 ரன்கள் தேவை. ரசிகர்கள் எல்லோருக்கும் கடந்த போட்டி கண் முன்னே வந்து போக... மைதானத்தில் உச்சக்கட்ட டென்ஷன்.
சிக்சருக்கு பறந்த பந்து
முதல் பந்தில் 1 ரன் எடுக்கப்பட்டது. 2வது பந்தை எதிர்கொண்ட கேதர் ஜாதவ் பந்தை சிக்சருக்கு அடிக்க... மைதானமே அல்லோல கல்லோலப்பட்டது. 3வது பந்தில் மறுபடியும் ஒரு ரன். அப்பவும் விட்டேனா பார்... என்று டென்ஷன்.
அப்பாடா... வெற்றி
4வது பந்தில் ராயுடு அவுட்டாக.. என்ன நடக்கிறது என்பது புரியாமல் பயங்கர அமைதியானது. 2 பந்துகள்... 1 ரன் என்ற ஸ்கோர் இருக்க.. ஒரு வழியாக... அதையும் எடுத்த சென்னை அணி 6 விக்கெட் வித்தியாசத்தில் ஹைதராபாத்தை வென்றது.
பட்டியலில் முதலிடம்
இந்த போட்டியில் கிடைத்த வெற்றியால் அந்த அணிக்கு 16 புள்ளிகள் கிடைத்தன. ஜம்மென்று புள்ளிகள் பட்டியலில் முதலிடத்துக்கு மீண்டும் முன்னேறியது சென்னை.