முகமது ஷமி இல்ல.. டாப் 5 சிறந்த இந்திய வேகப்பந்துவீச்சாளர்கள் பட்டியலை வெளியிட்ட புஜாரா

மும்பை: இந்தியாவின் மிகச்சிறந்த 5 டெஸ்ட் வேகப்பந்து வீச்சாளர்களின் பட்டியலை முன்னாள் கிரிக்கெட் வீரர் புஜாரா தேர்வு செய்துள்ளார். இதில் இந்தியாவின் நட்சத்திர வேகப்பந்து வீச்சாளரான முகமது ஷமிக்கு அவர் இடம் அளிக்கவில்லை. 2010 முதல் 2023 வரையிலான தனது 13 ஆண்டுகால டெஸ்ட் வாழ்க்கையில் புஜாராவுடன் இணைந்து விளையாடாத இரு முன்னாள் வீரர்களும் இந்தப் பட்டியலில் இடம்பெற்றுள்ளனர்.

டெஸ்ட் கிரிக்கெட்டில் 64 போட்டிகளில் விளையாடி 229 விக்கெட்டுகளை வீழ்த்தி சாதனை படைத்துள்ள முகமது ஷமி, புஜாராவின் பட்டியலில் இடம்பெறவில்லை. இந்திய கிரிக்கெட் வரலாற்றின் புகழ்பெற்ற ஆல்-ரவுண்டரும் முன்னாள் கேப்டனுமான கபில் தேவ்வை புஜாரா தனது பட்டியலில் முதலிடத்தில் தேர்வு செய்துள்ளார். டெஸ்ட் கிரிக்கெட்டில் இந்திய வேகப்பந்து வீச்சாளர்களில் அதிக விக்கெட்டுகளை வீழ்த்திய சாதனையை கபில் தேவ் வைத்துள்ளார்.

அவரைத் தொடர்ந்து ஜாகீர் கான், ஜவகல் ஸ்ரீநாத், ஜஸ்பிரித் பும்ரா மற்றும் இஷாந்த் சர்மா ஆகியோர் புஜாராவின் டாப்-5 பட்டியலில் இடம்பெற்றுள்ளனர். புஜாரா தனது சர்வதேச கிரிக்கெட் வாழ்க்கையின் ஆரம்பக் கட்டத்தில் ஜாகீர் கானுடன் இணைந்து விளையாடியுள்ளார். மேலும், ஜஸ்பிரித் பும்ரா மற்றும் இஷாந்த் சர்மா ஆகியோருடன் உள்நாட்டிலும் வெளிநாடுகளிலும் பல டெஸ்ட் தொடர்களில் இணைந்து விளையாடியுள்ளார்.

இந்தியாவின் டெஸ்ட் வேகப்பந்து வீச்சாளர்களில் அதிக விக்கெட் வீழ்த்தியவர்களில் ஜாகீர் கான் இரண்டாம் இடத்தில் உள்ளார். இஷாந்த் சர்மா 311 விக்கெட்டுகளையும், ஜவகல் ஸ்ரீநாத் 67 டெஸ்டுகளில் 236 விக்கெட்டுகளையும் வீழ்த்தியுள்ளனர். ஜஸ்பிரித் பும்ரா இதுவரை 52 டெஸ்ட் போட்டிகளில் 234 விக்கெட்டுகளை எடுத்துள்ளார். இந்த வரிசையில் முகமது ஷமி ஆறாவது இடத்தில் உள்ளார் என்பது குறிப்பிடத்தக்கது.

தனது சிறந்த ஐந்து வீரர்கள் பட்டியலில் முகமது சிராஜை சேர்க்காத போதிலும், இந்தியாவின் சிறந்த 10 டெஸ்ட் வேகப்பந்து வீச்சாளர்களின் பட்டியலில் அவரை புஜாரா சேர்த்துள்ளார். சிராஜ் தற்போது இலங்கைக்கு எதிரான டெஸ்ட் தொடரில் இந்திய அணியின் வேகப்பந்து வீச்சை வழிநடத்தி வருகிறார்.

இந்திய பவுலர்களை திக்குமுக்காட வைத்து.. வரலாற்று சாதனை படைத்த இலங்கை இளம் வீரர் சோனல் தினுஷா

முகமது சிராஜ் தற்போதைய உலக டெஸ்ட் சாம்பியன்ஷிப் (WTC) சுழற்சியில் இந்தியாவின் முன்னணி விக்கெட் வீழ்த்தியவராக உள்ளார். அவர் இதுவரை 48 டெஸ்ட் போட்டிகளில் விளையாடி 144 விக்கெட்டுகளை வீழ்த்தியுள்ளார்.