மிரட்டல் அடி.. ஆஸி. வீரர் ஹெல்மட்டை கழட்டி.. வாயை உடைத்த ஜோப்ரா ஆர்ச்சர்.. திகில் அடைந்த ஆஸி!

ஆஸி. பேட்டிங் சரிவு

இந்தப் போட்டியில் ஆஸ்திரேலியா அணியின் பேட்டிங் மிக மோசமாக இருந்தது. 14 ரன்களுக்கு 3 விக்கெட்களை இழந்து பரிதாபமாக இருந்தது. பின்ச் 0, வார்னர் 9, ஹேண்ட்ஸ்கோம்ப் 4 ரன்கள் எடுத்து 6.1 ஓவர்களுக்குள் வரிசையாக ஆட்டமிழந்தனர்.

அலெக்ஸ் கேரி வந்தார்

ஆறாவது அல்லது ஏழாவது இடத்தில் களமிறங்கி வந்த அலெக்ஸ் கேரியை, அனுப்பி விக்கெட் வீழ்ச்சியை தடுக்க முடிவு செய்தது ஆஸ்திரேலியா. அலெக்ஸ் கேரி உலகக்கோப்பை லீக் போட்டிகளில் அந்த அணியை பல முறை காப்பாற்றி இருந்தார். அதே போல இந்த முறையும் அணியை காப்பாற்ற களமிறங்கினார்.

அந்த பவுன்சர்

எட்டாவது ஓவரின் கடைசி பந்தை எதிர்கொண்டார் அலெக்ஸ் கேரி. ஜோப்ரா ஆர்ச்சர் மின்னல் வேகத்தில் பவுன்சர் வீசினார். பவுன்சரை கண்டதும், பேட்டை கீழே இறக்கி, கீழே சாய்ந்து தப்பிக்க நினைத்தார் கேரி.

திகில் அடைந்த ஆஸி.

எனினும், பந்து அவரின் தாடைப் பகுதியில் பலமாக தாக்கியது. பந்து தாக்கிய வேகத்தில் ஹெல்மட் கழன்று விழுந்தது. அதை கேட்ச் பிடித்து ஹிட் விக்கெட் ஆகாமல் தப்பித்தார் கேரி. காயம் பட்ட இடத்தில் இருந்து ரத்தம் வடிந்தது. அப்போது ஆஸ்திரேலிய அணியினர் மிரண்டு போய் இருந்தனர்.

போராடினார்

காயத்க்கு முதல் உதவி செய்து கொண்டே வீரத்தோடு பேட்டிங் செய்தார் அலெக்ஸ் கேரி. 5 பந்துகள் சந்தித்து இருந்த போது அவர் காயமடைந்தார். அதன் பின் 70 பந்துகள் வரை சந்தித்து 46 ரன்கள் குவித்து ஆஸ்திரேலிய அணியின் ஸ்கோர் உயர பெரும் உதவி செய்தார்.

அனில் கும்ப்ளே மாதிரி..

அனில் கும்ப்ளே ஒருமுறை இதே போல தாடைப் பகுதியில் காயமடைந்து கட்டுப் போட்டுக் கொண்டே விளையாடியது நினைவிருக்கலாம். அதே போலவே கட்டு போட்டுக் கொண்டு அவரைப் போலவே அணிக்காக போராடினார் கேரி.