CSK: சஞ்சு சாம்சன் அல்ல.. சிஎஸ்கே பிரச்சனையே இந்த 2 பேர் மட்டும் தான்.. இர்பான் பதான் தாக்கு

சென்னை: ஐபிஎல் 2026 சீசனில் தனது முதல் வெற்றிக்காகக் காத்திருக்கும் சென்னை சூப்பர் கிங்ஸ் அணி, புள்ளிப்பட்டியலில் கடைசி இடத்தில் உள்ளது. இந்த மோசமான நிலைக்கு அணியின் பந்துவீச்சாளர்களே காரணம் என முன்னாள் இந்திய கிரிக்கெட் வீரர் இர்ஃபான் பதான் கடுமையாக விமர்சித்துள்ளார். வேகப்பந்து வீச்சாளர்களான நூர் அஹ்மத் மற்றும் மேட் ஹென்றி ஆகியோரின் செயல்பாடு திருப்தியளிக்கவில்லை என்று அவர் சுட்டிக்காட்டியுள்ளார்.

இர்ஃபான் பதான், தற்போது சிஎஸ்கேயின் மிகப்பெரிய பிரச்சனை நூர் அஹ்மத் தான் என்றார். இந்த சீசனில் சுமார் 10 ஓவர்களில் 100 ரன்களுக்கு மேல் கொடுத்த அவர், மூன்று போட்டிகளிலும் ஒரு விக்கெட்டையும் எடுக்காமல், 11.1 என்ற மோசமான எகானமி ரேட்டுடன் உள்ளார். அவரை பற்றிப் பேசிய பதான், அவர் தனது ரன்னப்பை சரிசெய்ய வேண்டும் எனவும் அறிவுறுத்தினார். ராயல் சேலஞ்சர்ஸ் பெங்களூருவுக்கு எதிராக நூர் 4 ஓவர்களில் 49 ரன்கள் கொடுத்தார்.

பதான் தனது யூடியூப் வீடியோவில், "நூர் சிஎஸ்கேயின் மிகப்பெரிய பிரச்சனை. அவர் 10 ஓவர்களில் 100 ரன்களுக்கு மேல் கொடுத்து, ஒரு விக்கெட் கூட எடுக்கவில்லை. தனது ரன்னப் கோணத்தைச் சரிசெய்தால், பந்துவீச்சில் முன்னேற்றம் மேம்படும், சாய்ந்திருக்கும் அவரது கை நேராகும் என நான் நம்புகிறேன்," என்று தெரிவித்தார்.

கடந்த ஐபிஎல் 2025 தொடரில் 14 இன்னிங்ஸ்களில் 24 விக்கெட்டுகளைக் கைப்பற்றி இரண்டாவது அதிக விக்கெட்டுகளை எடுத்த பந்துவீச்சாளராக நூர் அஹ்மத் சிறந்து விளங்கினார். இந்தக் காரணத்திற்காக, நடப்பு சீசனில் சிஎஸ்கேவின் முக்கியப் பந்துவீச்சுத் தாக்குதலுக்கு அவர் தலைமை தாங்குவார் என்று எதிர்பார்க்கப்பட்டது.

வெளிநாட்டு வேகப்பந்து வீச்சாளர் மேட் ஹென்றியின் பந்துவீச்சு குறித்தும் இர்ஃபான் பதான் ஏமாற்றம் தெரிவித்தார். "அவரது பந்துவீச்சு மிகுந்த ஏமாற்றமளிக்கிறது, ஏனெனில் அவருக்கு நிறைய அனுபவம் உள்ளது. கடந்த காலங்களில் சிறப்பாகச் செயல்பட்டு, நல்ல எகானமி ரேட்டும் கொண்டிருந்தார், ஆனால் இம்முறை தனது திறமையை வெளிப்படுத்த முடியவில்லை," என்று பதான் கூறினார்.

"அனுபவம் வாய்ந்த பந்துவீச்சாளர் Half volley பந்துகளை வீச மாட்டார். விராட் கோலி ஸ்டெப் அவுட் ஆனதைப் பார்த்த அன்ஷுல் கம்போஜ், பவுன்சர் வீசி அவரை அவுட் செய்தார். ஆனால் மேட் ஹென்றியோ, விராட் ஸ்டெப் அவுட் ஆனதை அறிந்த பின்பும் ஒரு ஃபுல் டெலிவரியை வீசினார்," என பதான் சுட்டிக்காட்டினார். ராயல் சேலஞ்சர்ஸ் பெங்களூருவுக்கு எதிராக ஹென்றி 3 ஓவர்களில் 36 ரன்களைக் கொடுத்து விக்கெட் எதுவும் எடுக்கவில்லை.

ராயல் சேலஞ்சர்ஸ் பெங்களூருவிடம் 43 ரன்கள் வித்தியாசத்தில் தோல்வியடைந்த சிஎஸ்கே அணிக்கு இது மூன்றாவது தொடர் தோல்வியாகும். ஐந்து முறை சாம்பியன் பட்டம் வென்ற சென்னை சூப்பர் கிங்ஸ், நடப்பு சீசனில் இன்னும் ஒரு வெற்றியையும் பதிவு செய்ய முடியாமல், புள்ளிப்பட்டியலின் கடைசி இடத்திலேயே நீடிக்கிறது.