ஹஸி, மார்கன் கிடையாது.. இந்த 49 வயது இந்திய வீரர் தான் சிஎஸ்கே அடுத்த பயிற்சியாளர்

By Javid Ahamed

Updated: Thursday, September 10, 2026, 19:35 [IST]

சென்னை: ஐந்து முறை ஐபிஎல் சாம்பியனான சென்னை சூப்பர் கிங்ஸ் சிஎஸ்கே அணியின் புதிய தலைமைப் பயிற்சியாளராக, முன்னாள் இந்திய கிரிக்கெட் வீரர் ஹேமங் பதானி நியமிக்கப்பட அதிக வாய்ப்புகள் உள்ளதாகத் தெரிகிறது. நீண்ட காலமாக சிஎஸ்கே அணியின் தலைமைப் பயிற்சியாளராக இருந்த ஸ்டீபன் பிளெமிங்கிற்குப் பதிலாக இவரை நியமிக்க நிர்வாகம் ஆலோசித்து வருகிறது.

இந்தியாவைச் சேர்ந்த ஒருவரின் தலைமையில் பயிற்சிப் பணியாளர்கள் இருக்க வேண்டும் என்று முன்னாள் கேப்டன் தோனி வலுவாக விரும்புவதே இதற்கு முக்கியக் காரணமாகக் கூறப்படுகிறது.முன்னாள் கேப்டன் தோனி இந்தியப் பயிற்சியாளருக்கு ஆதரவாகப் பேசி வருவதால், ஹேமங் பதானி இந்த பந்தயத்தில் முன்னிலையில் உள்ளார்.

டெல்லி கேபிடல்ஸ் அணியின் பயிற்சியாளராகப் பணியாற்றிய அவரது ஐபிஎல் அனுபவமும், உலகெங்கிலும் உள்ள பல்வேறு டி20 லீக் தொடர்களில் அவர் பெற்ற வெற்றிகளும் இதற்கு சாதகமாக அமைந்துள்ளன.

துலீப் கோப்பை வரலாற்றில் மாபெரும் சாதனை.. ஒரே ஆட்டத்தில் 350 ரன்கள் குவித்து அசத்தல்

இருப்பினும், இறுதி முடிவை எடுக்கும் அதிகாரம் சிஎஸ்கே அணி நிர்வாகத்திடமே உள்ளது. நிர்வாகத் தரப்பில் இன்னும் வெளிநாட்டுப் பயிற்சியாளர்களை நியமிக்கும் வாய்ப்புகளும் பரிசீலிக்கப்பட்டு வருகின்றன. தொடர்ந்து மூன்று சீசன்களாக சிஎஸ்கே அணி பிளே-ஆஃப் சுற்றை எட்டத் தவறியதைத் தொடர்ந்து, 2009 முதல் தலைமைப் பயிற்சியாளராகப் பணியாற்றி வந்த ஸ்டீபன் பிளெமிங் சிஎஸ்கே அணியில் இருந்து விலகினார்.

பிளெமிங்கின் விலகலுக்குப் பிறகு, புதிய பயிற்சியாளரைத் தேர்ந்தெடுக்கும் பொறுப்பை சிஎஸ்கே நிர்வாகம் தோனியிடம் ஒப்படைத்துள்ளதாக அணியின் தலைமைச் செயல் அதிகாரி காசி விஸ்வநாதன் தெரிவித்துள்ளார்.

ஆரம்பத்தில் வெளிநாட்டு பயிற்சியாளர் ஒருவரே மீண்டும் நியமிக்கப்படலாம் என்ற கருத்து நிலவிய போதிலும், இந்தியர் ஒருவர் வசம் பொறுப்பை ஒப்படைக்க வேண்டும் என்பதில் தோனி உறுதியாக இருப்பதாகத் தெரிகிறது. ஐபிஎல் தொடரில் உள்நாட்டு வீரர்களின் பங்களிப்பும் தாக்கமும் அதிகரித்து வருவதால், இந்தியப் பயிற்சியாளரே அணிக்குச் சிறந்த தேர்வாக இருப்பார் என்று தோனி நிர்வாகத்திடம் தெரிவித்துள்ளார்.