சிஎஸ்கேவில் இனி தோனிக்கு என்ன பொறுப்பு? சிஇஓ காசி விஸ்வநாதன் தந்த முக்கிய அப்டேட்

சென்னை: சென்னை சூப்பர் கிங்ஸ் அணியின் புதிய தலைமைப் பயிற்சியாளராக முன்னாள் இந்திய வேகப்பந்து வீச்சாளர் ஜாகீர் கான் நியமிக்கப்பட்டதைத் தொடர்ந்து, தோனி அணியில் ஒரு வீரராகவே தொடர்வார் என்பதை சிஎஸ்கே நிர்வாகம் உறுதிப்படுத்தியுள்ளது.

சில மாதங்களுக்கு முன்பு ஸ்டீபன் பிளெமிங் தலைமைப் பயிற்சியாளர் பதவியில் இருந்து விலகியதை அடுத்து, அந்த இடத்திற்கு தோனி நியமிக்கப்படலாம் என்று எதிர்பார்க்கப்பட்டது. மேலும், தோனி அதிகாரப்பூர்வமாக அணியின் ஆலோசகர் பொறுப்பை ஏற்கக்கூடும் என்றும் செய்திகள் வெளியானது.

இருப்பினும், சென்னை சூப்பர் கிங்ஸ் அணியின் தலைமை நிர்வாக அதிகாரி காசி விஸ்வநாதன், தோனிக்கு தற்போதைக்கு அதுபோன்ற எந்த ஒரு பொறுப்பும் வழங்கப்படவில்லை என்பதைத் தெளிவுபடுத்தியுள்ளார். அவர் தொடர்ந்து ஒரு வீரராக விளையாடுவார் என்று காசி விஸ்வநாதன் தெரிவித்துள்ளார்.

சிஎஸ்கே பயிற்சியாளராக பொறுப்பேற்பதை பெருமையாக கருதுகிறேன்.. ஜாகீர் கான் பெருமிதம்

காயம் காரணமாக கடந்த ஐபிஎல் 2026 சீசன் முழுவதையும் தோனி பங்கேற்கவில்லை. இளம் வீரர்களைக் கொண்ட சிஎஸ்கே அணிக்குக் கிடைக்க வேண்டிய கவனம் சிதைந்துவிடக் கூடாது என்பதற்காக, அவர் சேப்பாக்கம் மைதானத்திற்கு வருவதைக் கூட தவிர்த்தார் என்பது குறிப்பிடத்தக்கது.

தோனி இப்போதைக்கு பயிற்சியாளர் பொறுப்பை ஏற்க மாட்டார் என்று காசி விஸ்வநாதன் குறிப்பிட்டிருந்தாலும், அணியின் முக்கிய முடிவெடுக்கும் பணிகளில் அவரது பங்களிப்பு தொடர்ந்து இருக்கும் என்றே எதிர்பார்க்கப்படுகிறது. அணியில் அவருக்கு இருக்கும் முக்கியத்துவத்தின் காரணமாக, ஜாகீர் கானின் நியமனமும் தோனியின் ஒப்புதலுக்குப் பிறகே மேற்கொள்ளப்பட்டுள்ளது. தோனி எப்போதும் ஜாகீர் கானின் திறமையை பெரிதும் மதிக்கக்கூடியவர் என்பதால், இருவரும் இணைந்து சிஎஸ்கே அணியை மீண்டும் வெற்றிக்களத்திற்கு கொண்டு வர உழைப்பார்கள்.

Also Read

சிஎஸ்கே அணியின் புதிய தலைமை பயிற்சியாளராக ஜாகீர் கான் நியமனம்.. தோனி எடுத்த அதிரடி முடிவு

ஆனால், சிஎஸ்கே அணியின் பிளேயிங் லெவனில் தோனிக்கு எந்த மாதிரியான இடத்தை வழங்குவது என்பதை ஜாகீர் கான் தான் தீர்மானிக்க வேண்டும். 45 வயதாகும் தோனிக்கு தற்போதைய நிலையில் பழைய வேகமும் சீரான ஆட்டமும் சவாலாக உள்ளது. இம்பாக்ட் பிளேயர் விதி இருந்தாலும் கூட, அவரை அனைத்து போட்டிகளிலும் விளையாட வைப்பது அணிக்கு சில பலவீனங்களை ஏற்படுத்தக்கூடும். இதனால், தோனியின் ஆலோசனைகளைப் பயன்படுத்திக் கொள்ள மட்டும் சிஎஸ்கே முடிவு எடுக்கும் என தெரிகிறது.