48 மணி நேரத்தில் சிஎஸ்கே-வை விட்டு வெளியே போகும் ரவீந்திர ஜடேஜா.. சஞ்சு சாம்சன் டிரேட் முடிந்தது

மும்பை: சென்னை சூப்பர் கிங்ஸ் (சிஎஸ்கே) அணியின் நட்சத்திர ஆல்-ரவுண்டர் ரவீந்திர ஜடேஜாவை ராஜஸ்தான் ராயல்ஸ் அணிக்கு அனுப்பிவிட்டு, அந்த அணியின் கேப்டன் சஞ்சு சாம்சன்னை சிஎஸ்கே-வுக்குக் கொண்டு வருவதற்கான மும்முனை ஒப்பந்தம் கிட்டத்தட்ட முடிவாகிவிட்டதாகவும், அடுத்த 48 மணி நேரத்திற்குள் இதற்கு பிசிசிஐ ஒப்புதல் அளிக்கலாம் என்றும் தகவல்கள் வெளியாகியுள்ளன. இதில் சம்பந்தப்பட்டுள்ள மூன்று வீரர்களும் கையெழுத்திட்டு விட்டதாகவும் கூறப்படுகிறது.

இது தொடர்பாக கிடைத்துள்ள தகவல்களின்படி, இது ஒரு நேரடி வீரர் பரிமாற்றம் அல்ல. இது ஒரு மும்முனை ஒப்பந்தமாகப் பேசப்பட்டுள்ளது. சிஎஸ்கே-விலிருந்து ரவீந்திர ஜடேஜா மற்றும் சாம் கரன் வெளியேறி ராஜஸ்தான் ராயல்ஸ் அணிக்கு செல்வார்கள். சிஎஸ்கே-வுக்கு சஞ்சு சாம்சன் வருவார்.

முதலில், ராஜஸ்தான் ராயல்ஸ் அணி ஜடேஜாவுக்குப் பதிலாக டிவால்ட் பிரேவிஸ் அல்லது மதீஷா பதிரானாவைக் கூடுதலாகக் கேட்டதாகக் கூறப்படுகிறது. ஆனால், அந்த இரண்டு வீரர்களையும் விட்டுக்கொடுக்க சிஎஸ்கே திட்டவட்டமாக மறுத்துவிட்டது. நீண்ட பேச்சுவார்த்தைக்குப் பிறகு, இங்கிலாந்து ஆல்-ரவுண்டரான சாம் கரனை ஒப்பந்தத்தில் சேர்க்க சிஎஸ்கே சம்மதித்ததாகத் தெரிகிறது.

48 மணி நேர கெடு

ஐபிஎல் வீரர் பரிமாற்ற விதிகளின்படி, இந்த ஒப்பந்தம் தற்போது "விருப்பம் தெரிவிக்கும் கடிதம்" (Expression of Interest) என்ற நிலையை எட்டியுள்ளது. அதாவது, சம்பந்தப்பட்ட மூன்று வீரர்களான ஜடேஜா, சாம்சன் மற்றும் சாம் கரன் ஆகியோர் இந்த பரிமாற்றத்திற்குத் தங்களது சம்மதத்தை எழுத்துப்பூர்வமாக வழங்கிவிட்டனர்.

ஒரு அணி நிர்வாகி, "மூன்று வீரர்களுமே ஒப்பந்தத்தில் கையெழுத்திட்டுவிட்டனர்" என்று உறுதிப்படுத்தியுள்ளார். இந்த கடிதம் பிசிசிஐ-க்கு சமர்ப்பிக்கப்பட்டவுடன், 48 மணி நேரத்திற்குள் பரிமாற்றத்திற்கான மற்ற நடைமுறைகள் முடிவுக்கு வரும்.

ஒப்பந்தத்தில் உள்ள சிக்கல்கள்

வீரர்கள் சம்மதம் தெரிவித்துவிட்டாலும், இந்த ஒப்பந்தம் முழுமையாக நிறைவேறுவதில் சில நடைமுறைச் சிக்கல்கள் உள்ளன: இந்த மெகா டிரேடிற்கு பிசிசிஐ மற்றும் ஐபிஎல் நிர்வாகக் குழுவின் அதிகாரப்பூர்வ ஒப்புதல் கிடைத்த பிறகே, இது இறுதி செய்யப்படும். சாம் கரன் இங்கிலாந்து வீரர் என்பதால், அவர் அணி மாறுவதற்கு இங்கிலாந்து மற்றும் வேல்ஸ் கிரிக்கெட் வாரியத்திடம் இருந்து தடையில்லாச் சான்றிதழ் (NOC) பெற வேண்டியது அவசியம். இந்த இரண்டு முக்கிய ஒப்புதல்களும் கிடைத்தவுடன், ஐபிஎல் வரலாற்றின் மிகப்பெரிய வீரர்கள் வர்த்தகத்தை சிஎஸ்கே - ராஜஸ்தான் அணிகள் நிறைவேற்றும்.

சுரேஷ் ரெய்னா உருக்கம்

ஜடேஜாவை சிஎஸ்கே விட்டுக்கொடுக்கும் செய்தி பரவிய நிலையில், அணியின் முன்னாள் வீரரான சுரேஷ் ரெய்னா தனது அதிருப்தியை வெளிப்படுத்தியுள்ளார். "ஜடேஜா சிஎஸ்கே-வின் ஒரு துப்பாக்கி போன்ற வீரர். அவரை மீண்டும் அணியில் தக்கவைக்க வேண்டும். அவர் நிச்சயம் அணிக்குத் தேவை" என்று உருக்கமாக வேண்டுகோள் விடுத்துள்ளார்.

இருப்பினும், சிஎஸ்கே நிர்வாகம் இந்த மெகா டிரேடில் தீவிரமாக இருப்பதாகவே தெரிகிறது. அனைத்தும் திட்டமிட்டபடி நடந்தால், அடுத்த இரு தினங்களில் ஜடேஜா ராஜஸ்தான் ராயல்ஸ் வீரராகவும், சஞ்சு சாம்சன் சென்னை சூப்பர் கிங்ஸின் மஞ்சள் ஜெர்சியிலும் களமிறங்கத் தயாராவார்கள்.