சிஎஸ்கே எனக்கு இன்னும் வாய்ப்பு தந்திருக்கனும்.. அடுத்த போட்டியில் தூக்கிட்டாங்க- நாராயண் ஜெகதீசன்

சென்னை: சென்னை சூப்பர் கிங்ஸ் அணியின் முன்னாள் விக்கெட் கீப்பர்-பேட்ஸ்மேன் நாராயண் ஜெகதீசன், தான் சிஎஸ்கே அணியிலிருந்து வெளியேறிய ஓராண்டுக்குப் பிறகு, 2023 ஐபிஎல் சீசனின் போது தோனி தன்னிடம் பேசிய நெகிழ்ச்சியான வார்த்தைகளை வெளிப்படுத்தியுள்ளார். 30 வயதான ஜெகதீசன், 2018 முதல் 2022 வரை சிஎஸ்கே அமைப்பில் இருந்தார்.

ஆனால் இந்த ஐந்து ஆண்டுகளில் அவர் வெறும் ஏழு போட்டிகளில் மட்டுமே விளையாடினார். இதில் 2020-இல் ஐந்து போட்டிகள், 2022-இல் இரண்டு போட்டிகள் அடங்கும். சிஎஸ்கே அணியால் விடுவிக்கப்பட்ட பிறகு, கொல்கத்தா நைட் ரைடர்ஸ் அணி ஜெகதீசனை 2023 ஐபிஎல் சீசனுக்காக வாங்கியது. அந்த சீசனில் கேகேஆர் அணிக்காக 6 போட்டிகளில் விளையாடிய அவர், 15-க்கும் குறைவான சராசரியுடன் 89 ரன்கள் மட்டுமே எடுத்தார்.

2023 ஆம் ஆண்டின் ஏமாற்றமளிக்கும் சீசனுக்குப் பிறகு, ஐபிஎல் ஏலங்களில் ஜெகதீசன் ஏலம் போகாமல் உள்ளார். இது குறித்து பேசிய ஜெகதீசன், "குறிப்பாக யாரும் என்னிடம் பேசவில்லை. நான் விடுவிக்கப்படப் போகிறேன் என்று எனக்குத் தெரிவிக்க யாரும் அழைக்கவில்லை. ஆனால், இதில் சுவாரஸ்யமான விஷயம் என்னவென்றால், அடுத்த ஆண்டு கேகேஆர் அணி என்னை தேர்வு செய்தது.

மும்பை இந்தியன்ஸ் அணியில் ஹர்திக் எதிர்காலம் என்ன? அம்பானி குடும்பத்துடன் டீலிங்

அந்த சீசனில் சிஎஸ்கே அணிக்கு எதிரான ஒரு போட்டிக்குப் பிறகு, மஹி பாய் என்னை டிரஸ்ஸிங் ரூமிற்கு அழைத்துச் சென்று, என்னுடன் சுமார் 25 நிமிடங்கள் அமர்ந்து பேசினார். 'வேறு யாரும் உன்னை ஏலத்தில் எடுக்கவில்லை என்றால், நான் உன்னை மீண்டும் சிஎஸ்கே அணிக்கே எடுத்திருப்பேன்' என்று அவர் என்னிடம் கூறினார்" என்றார்.

"நீங்கள் ஐந்து ஆண்டுகள் எங்களோடு இருந்தீர்கள், ஆனால் எங்களால் உங்களுக்குப் போதுமான வாய்ப்புகளை வழங்க முடியவில்லை. எனவே, உங்களுக்கு மற்ற அணிகளில் அதிக வாய்ப்புகள் கிடைக்க வேண்டும் என்ற நோக்கத்திலேயே உங்களை விடுவித்தோம் என்று தோனி விளக்கினார். தோனி போன்ற ஒரு ஜாம்பவானிடமிருந்து இப்படி ஒரு வார்த்தை வந்தது என் மனதை நெகிழச் செய்தது. அவர் எனக்காக நேரம் ஒதுக்கி இதை விளக்கினார். அதற்கு முன்பு வரை எனக்கு அணி நிர்வாகத்திடம் இருந்து எந்தத் தகவலும் வரவில்லை" என்று கூறினார். தற்செயலாக, தோனி முழு நேரக் கேப்டனாகச் செயல்பட்ட கடைசி சீசனான 2023-இல் சிஎஸ்கே ஐபிஎல் கோப்பையை வென்றது குறிப்பிடத்தக்கது.

"சிஎஸ்கே அணியில் நான் விளையாடியதை விட இன்னும் கூடுதலான போட்டிகளில் விளையாடியிருந்தால் நன்றாக இருந்திருக்கும் என்று நான் உண்மையிலேயே உணர்கிறேன். ஆர்சிபிக்கு எதிரான எனது அறிமுகப் போட்டியில் 33 ரன்கள் எடுத்து நல்ல தொடக்கத்தைத் தந்தேன், ஆனால் அடுத்த போட்டியிலேயே நான் அணியில் இருந்து நீக்கப்பட்டேன்.

Also Read

இந்த சிஎஸ்கே வீரர் தான் எனக்கு மிகவும் பிடித்த இளம் வீரர்.. கொஞ்சம் பொறுமையா இருங்க- டிவில்லியர்ஸ்

அதன் பிறகு அணியில் வருவதும் போவதுமாக இருந்தேன். அதற்கு அடுத்த சீசனில் ஒரு போட்டியில் கூட எனக்கு வாய்ப்பளிக்காமல், முழுவதுமாக ஓரங்கட்டப்பட்டேன். சிஎஸ்கே எனக்கு இன்னும் கொஞ்சம் கூடுதல் ஆதரவை அளித்திருக்கலாம் என்பதில் எந்த சந்தேகமும் இல்லை" என்று ஜெகதீசன் அதே பேட்டியில் வருத்தத்துடன் தெரிவித்தார். ஒட்டுமொத்த ஐபிஎல் தொடரில் ஜெகதீசனின் செயல்பாடு எதிர்பார்த்த அளவு சிறப்பாக இல்லை. அவர் விளையாடியுள்ள 13 போட்டிகளில், 110.20 ஸ்டிரைக் ரேட் மற்றும் 18 சராசரியுடன் மட்டுமே ரன்களைக் குவித்துள்ளார்.