சொங்கி மாதிரி விளையாடி 3வது இடத்துக்குப் போய் சிக்கிய சென்னை சூப்பர் கிங்ஸ்!

அசமஞ்சம்...

சென்னை சூப்பர் கிங்ஸ் அணி முதல் சுற்றுப் போட்டியில் சிறப்பாக ரன் குவித்தும் கூட மெத்தனமான பந்து வீச்சால் மேக்ஸ்வெல்லிடம் சிக்கி தோல்வியைத் தழுவ நேரிட்டது.

அடுத்தடுத்து சில தோல்விகள்

அதன் பின்னர் சில முக்கியமான தோல்விகளையும் சென்னை சந்தித்தது. இதற்கும் காரணம் மோசமான பந்து வீச்சுதான். இதை டோணியே கூட ஒத்துக் கொண்டுள்ளார்.

தொடர்ந்து 3 தோல்விகள்

அதை விட முக்கியமாக லோ ஸ்கோரில் 3 முக்கியமான தோல்விகளை தொடர்ந்து நாம் சந்தித்ததால் ரன் ரேட் இறங்கி வந்து விட்டது.

பதான் போட்ட போடு

இதற்கு முத்தாய்ப்பாக கொல்கத்தா நைட் ரைடர்ஸ் அணி தனது கடைசி லீக் போட்டியில் சன் ரைசர்ஸ் ஹைதராபாத் அணிக்கு எதிராக - அது அவர்களுக்கு வாழ்வா சாவா போட்டி - அபாரமாக ஆடி விட்டது. குறிப்பாக யூசன் பதான் போட்ட போட்டால், அவர் அடித்த அந்த அதி வேக 72 ரன்களால் ரன் ரேட் ஏறிப் போய், சென்னையை 3வது இடத்திற்குத் தள்ளி விட்டு விட்டனர்.

அதிரடி வீரர் யாருமே இல்லையே

இப்போது கிங்ஸ் லெவன் பஞ்சாபை எடுத்துக் கொண்டால் மேக்ஸ்வெல் பேய் வேக வீரராக இருக்கிறார். ஒரு வேளை அவரை விட்டால் மில்லர் இருக்கிறார். அவரும் கைவிட்டால் சஹா இருக்கிறார். கேப்டன் பெய்லியும் கரம் கொடுப்பார். அதேபோலத்தான் பதான், கோரி ஆண்டர்சன் ஆகியோரும் அவரவர் அணிகளுக்கு பேயாட்டம் போடக் கூடியவர்களாக உள்ளனர். சென்னையில் வேயன் ஸ்மித்தை விட்டால் அப்படி ஒரு ஆள் இல்லை என்றுதான் சொல்ல வேண்டும்.

இனி வரும் போட்டிகளிலாவது...!

இப்போது சென்னைக்கு 2 சவால்கள் உள்ளன. முதலில் மும்பையைத் தூக்கிப் போட்டு மிதிக்க வேண்டும். அடுத்து 2வது குவாலிபயர் போட்டிக்கு வரும் அணியை உதைத்து அனுப்ப வேண்டும். இதைச் செய்தால்தான் இறுதிப் போட்டியைப் பற்றி நாம் நினைக்க முடியும்.