CSK vs DC: “எங்க தோல்விக்கு காரணமே இதுதான்..” சிஎஸ்கே-விடம் தோற்றுவிட்டு புலம்பிய கேப்டன் அக்சர்

சென்னை: சென்னை சேப்பாக்கம் மைதானத்தில் நடந்த 2026 ஐபிஎல் லீக் போட்டியில் சென்னை சூப்பர் கிங்ஸ் அணி 23 ரன்கள் வித்தியாசத்தில் டெல்லி கேப்பிடல்ஸ் அணியை வீழ்த்தி இந்த சீசனின் முதல் வெற்றியைப் பதிவு செய்தது. இந்தத் தோல்வி குறித்துப் பேசிய டெல்லி கேப்டன் அக்சர் படேல், ஃபீல்டிங்கில் செய்த தவறுகளே தங்களின் வெற்றி வாய்ப்பைப் பறித்துவிட்டதாகத் தெரிவித்தார்.

ஆட்டம் முடிந்த பின் பேசிய அக்சர் படேல் கூறியதாவது:

"இந்தப் போட்டியில் ஃபீல்டிங் தான் பெரிய மாற்றத்தை ஏற்படுத்தியது என நினைக்கிறேன். மிக முக்கியமான தருணங்களில் 1 அல்லது 2 கேட்சுகளை நாங்கள் கோட்டைவிட்டோம். அதுவே போட்டியின் போக்கை மாற்றிய தருணமாக அமைந்தது. அந்தத் தவறுகளை மட்டும் செய்யாமல் இருந்திருந்தால் ஆட்டத்தின் முடிவு நிச்சயம் வேறாக இருந்திருக்கும். எங்களது ஃபீல்டிங் தான் எங்களைக் கைவிட்டுவிட்டது."

"பவர்பிளே ஓவர்களில் பேட்டிங்கில் எங்களுக்கு நல்ல தொடக்கம் கிடைத்தது. ஆனால் அதன் பிறகு அடுத்தடுத்து 2 அல்லது 3 விக்கெட்டுகளை வரிசையாக இழந்தது ஆட்டத்தின் வேகத்தைப் பாதித்தது. விக்கெட்டுகள் சீரான இடைவெளியில் விழாமல், ஜோடி ஜோடியாகவும் கொத்தாகவும் விழுந்ததால் எங்களால் மீண்டு வர முடியவில்லை. இது ரன் சேர்க்கும் வேகத்தை வெகுவாகக் குறைத்துவிட்டது."

"பேட்டிங்கில் எங்களுடைய வீரர்கள் ஓரளவு சிறப்பான பங்களிப்பைத் தந்தனர். ஆடுகளம் பேட்டிங்கிற்கு மிகவும் சாதகமாக இருந்தது. 213 ரன்கள் என்ற இலக்கை எட்ட முடியும் என்றே நம்பினோம். சென்னை அணியை 212 ரன்களுக்குள் கட்டுப்படுத்திய எங்கள் பந்துவீச்சாளர்களுக்குப் பாராட்டுக்களைத் தெரிவித்துக் கொள்கிறேன். அவர்கள் தங்களது பணியைச் சிறப்பாகச் செய்தனர்."

"ஆடுகளத்தின் தன்மையில் பெரிய மாற்றம் எதுவும் தெரியவில்லை. இரண்டாம் பாதியில் பனிப்பொழிவு இருந்ததால் பந்துவீசுவது சிஎஸ்கே அணிக்குச் சவாலாக இருந்திருக்கும். ஆனாலும் அவர்கள் மிகக் கட்டுக்கோப்பாகப் பந்துவீசி எங்களை வீழ்த்திவிட்டனர்" என அக்சர் படேல் வருத்தத்துடன் தெரிவித்தார்.

CSK: படையப்பா சல்யூட் அடித்த சஞ்சு சாம்சன்.. மிரண்டு போன டெல்லி.. கொண்டாடிய சிஎஸ்கே ரசிகர்கள்

முதலில் பேட்டிங் செய்த சென்னை அணி சஞ்சு சாம்சனின் (115 ரன்கள்) அதிரடியால் 212 ரன்கள் குவித்தது. கடின இலக்கைத் துரத்திய டெல்லி அணி 189 ரன்களுக்கு அனைத்து விக்கெட்டுகளையும் இழந்து தோல்வியடைந்தது. ஜேமி ஓவர்டன் 4 விக்கெட்டுகளை வீழ்த்தி சென்னையின் வெற்றிக்கு உதவினார்.