CSK vs GT: வாழ்வா சாவா நிலையில் சிஎஸ்கே.. குஜராத் அணிக்கு எதிராக டாஸ் வென்றது.. பிளேயிங் 11 என்ன?

அகமதாபாத்: ஐபிஎல் 2026 தொடரின் மிகவும் எதிர்பார்க்கப்பட்ட 66-வது லீக் ஆட்டத்தில், குஜராத் டைட்டன்ஸ் அணிக்கு எதிராக டாஸ் வென்ற சென்னை சூப்பர் கிங்ஸ் அணி முதலில் பந்துவீச்சைத் தேர்வு செய்துள்ளது. அகமதாபாத்தில் உள்ள நரேந்திர மோடி மைதானத்தில் நடைபெறும் இந்த ஆட்டம் சிஎஸ்கே அணிக்கு முக்கியமான போட்டி ஆகும். பிளே-ஆப் சுற்றுக்கு முன்னேற இந்த ஒரு போட்டியில் வெற்றி பெற்றே தீர வேண்டும் என்ற கட்டாயத்தில் களம் இறங்கியுள்ளது சிஎஸ்கே அணி.

டாஸ் வென்ற பின் பேசிய சிஎஸ்கே கேப்டன் ருதுராஜ் கெய்க்வாட், "நாங்கள் முதலில் பந்துவீசத் தீர்மானித்துள்ளோம். இந்த ஆடுகளத்தில் கூடுதல் வேகம் மற்றும் பவுன்ஸ் இருக்கும் என எதிர்பார்க்கிறோம். அதனை ஆட்டத்தின் தொடக்கத்திலேயே பயன்படுத்திக் கொள்ள விரும்புகிறோம். கடந்த போட்டியில் நாங்கள் கடுமையாகப் போராடியும் முடிவு எங்களுக்குச் சாதகமாக அமையவில்லை. ஆனால் இன்று அனைத்து விஷயங்களையும் எளிமையாக வைத்துக்கொண்டு வெற்றியைப் பெற முயற்சிப்போம்" எனத் தெரிவித்தார்.

சிஎஸ்கே அணியில் இரண்டு முக்கிய மாற்றங்கள் செய்யப்பட்டுள்ளன. அகீல் உசைன் மற்றும் பிரசாந்த் வீர் ஆகியோருக்குப் பதிலாக குர்ஜப்னீத் சிங் மற்றும் மேத்யூ ஷார்ட் ஆகியோர் அணியில் சேர்க்கப்பட்டுள்ளனர். மறுபுறம், குஜராத் டைட்டன்ஸ் அணியின் கேப்டன் சுப்மன் கில் கூறுகையில், தாங்களும் முதலில் பந்துவீசவே விரும்பியதாகத் தெரிவித்தார். குஜராத் அணியில் சாய் கிஷோருக்குப் பதிலாகப் பிரசித் கிருஷ்ணா களம் இறங்குகிறார்.

ஆடுகளம் குறித்துப் பேசிய முன்னாள் வீரர்கள் ஆரோன் பின்ச் மற்றும் கிரேம் ஸ்வான், இது சிவப்பு மண் ஆடுகளம் என்பதால் பேட்ஸ்மேன்களுக்குச் சொர்க்கமாக இருக்கும் எனத் தெரிவித்தனர். மைதானத்தில் புற்கள் சீராக இருப்பதால் பந்து பேட்டிற்கு நன்கு வரும். அதே சமயம் பந்துவீச்சாளர்கள் தங்களது வேகத்தில் மாறுபாடுகளைக் காட்டினால் விக்கெட்டுகளை வீழ்த்தலாம். இந்த மைதானத்தில் சுழற்பந்து வீச்சை விட வேகப்பந்து வீச்சாளர்களின் ஆதிக்கமே அதிகமாக இருக்கும் எனக் கணிக்கப்பட்டுள்ளது.

அகமதாபாத் மைதானத்தின் ஒரு பக்கம் எல்லைக்கோடு 62 மீட்டராகவும், மறுபக்கம் 70 மீட்டராகவும் உள்ளது. இதனால் பேட்ஸ்மேன்கள் சிக்ஸர்களைப் பறக்கவிட அதிக வாய்ப்புள்ளது. 200 ரன்களுக்கு மேல் எடுத்தால் மட்டுமே அது சவாலான இலக்காக இருக்கும். பிளே-ஆப் கனவு பலிக்குமா என்பதைத் தீர்மானிக்கும் இந்த ஆட்டத்தில் சென்னை சூப்பர் கிங்ஸ் ரசிகர்கள் தங்களது அணிக்கு ஆதரவாக மைதானத்தில் திரண்டுள்ளனர்.

MS Dhoni: சிஎஸ்கே-வை விட்டு வெளியேறிய தோனி.. வீட்டுக்கு சென்றார்.. அணி நிர்வாகத்துடன் மோதலா?

சென்னை சூப்பர் கிங்ஸ் (பிளேயிங் லெவன்): சஞ்சு சாம்சன், ருதுராஜ் கெய்க்வாட் (கேப்டன்), உர்வில் படேல், தேவால்ட் பிரெவிஸ், சிவம் துபே, மேத்யூ ஷார்ட், அன்ஷுல் கம்போஜ், நூர் அகமது, ஸ்பென்சர் ஜான்சன், முகேஷ் சவுத்ரி, குர்ஜப்னீத் சிங்.

குஜராத் டைட்டன்ஸ் (பிளேயிங் லெவன்): சாய் சுதர்சன், சுப்மன் கில் (கேப்டன்), ஜோஸ் பட்லர், நிஷாந்த் சிந்து, வாஷிங்டன் சுந்தர், ஜேசன் ஹோல்டர், ரஷித் கான், ராகுல் திவேதியா, ககிசோ ரபாடா, அர்ஷத் கான், முகமது சிராஜ்.

சென்னை சூப்பர் கிங்ஸ் இம்பாக்ட் சப்ஸ்: கார்த்திக் ஷர்மா, மெக்னீல் நோரோன்ஹா, சர்பராஸ் கான், குல்தீப் யாதவ், அமன் கான்

குஜராத் டைட்டன்ஸ் இம்பாக்ட் சப்ஸ்: பிரசித் கிருஷ்ணா, அனுஜ் ராவத், க்ளென் பிலிப்ஸ், குல்வந்த் கெஜ்ரோலியா, குமார் குஷாக்ரா