CSK: சிஎஸ்கே பிளே ஆஃப் வாய்ப்பு.. KKR-ஐ வீழ்த்தினால் புள்ளிப்பட்டியலில் எந்த இடம் கிடைக்கும்?

மும்பை: 2026 ஐபிஎல் தொடரில் நடைபெறும் 20வது லீக் போட்டியில், புள்ளிப்பட்டியலில் கடைசி 2 இடங்களில் தவிக்கும் சென்னை சூப்பர் கிங்ஸ் மற்றும் கொல்கத்தா நைட் ரைடர்ஸ் அணிகள் மோதுகின்றன. இதுவரை 4 போட்டிகளில் விளையாடியுள்ள சிஎஸ்கே அணி 1 வெற்றி, 3 தோல்விகளுடன் 2 புள்ளிகள் பெற்று 9வது இடத்தில் உள்ளது. கொல்கத்தா அணி 1 புள்ளியுடன் 10வது இடத்தில் உள்ளது.

இந்தப் போட்டியில் சிஎஸ்கே அணி வெற்றி பெற்றால் கூடுதலாக 2 புள்ளிகள் கிடைத்து, மொத்த புள்ளிகள் 4 ஆக உயரும். தற்போதைய புள்ளிப்பட்டியலில் ஹைதராபாத், டில்லி, குஜராத், லக்னோ ஆகிய 4 அணிகள் தலா 4 புள்ளிகளுடன் முறையே 4 முதல் 7வது இடங்களில் உள்ளன. ஆனால், சிஎஸ்கே அணியின் நெட் ரன் ரேட் மைனஸ் 1.532 என மிகவும் மோசமாக உள்ளது.

எனவே, சிஎஸ்கே அணி கொல்கத்தாவை வீழ்த்தினாலும், ரன் ரேட் அடிப்படையில் லக்னோ அணியை (மைனஸ் 0.427) முந்துவது மிகக் கடினம். இதனால் 2 புள்ளிகளுடன் 8வது இடத்தில் உள்ள மும்பை அணியை மட்டும் பின்னுக்கு தள்ளிவிட்டு, சிஎஸ்கே அணி 8வது இடத்திற்கு முன்னேறவே அதிக வாய்ப்புள்ளது. மிக பிரம்மாண்டமான ரன் வித்தியாசத்தில் வென்றால் மட்டுமே 7வது இடத்திற்கு செல்ல முடியும்.

சிஎஸ்கே அணி பிளே-ஆப் சுற்றுக்கு முன்னேறி முதல் 4 இடங்களுக்குள் வர வேண்டுமென்றால் கடுமையான போராட்டத்தை சந்திக்க வேண்டும். ஐபிஎல் தொடரில் பொதுவாக 16 புள்ளிகள் அதாவது 8 வெற்றிகள் பெற்றால் பிளே-ஆப் வாய்ப்பு உறுதியாகும். சில நேரங்களில் சிறந்த ரன் ரேட் இருந்தால் 14 புள்ளிகள் பெற்றாலும் தகுதி பெறலாம்.

சிஎஸ்கே அணிக்கு இன்னும் 10 லீக் போட்டிகள் மீதமுள்ளன. இதில் குறைந்தது 7 போட்டிகளில் வெற்றி பெற்றால் மட்டுமே 16 புள்ளிகளை எட்ட முடியும். வெறும் வெற்றிகள் மட்டும் போதாது, ஒவ்வொரு போட்டியிலும் பெரிய ரன் வித்தியாசத்தில் வென்று தற்போதைய மோசமான மைனஸ் ரன் ரேட்டை உடனடியாக பிளஸ் ஆக மாற்ற வேண்டிய பெரும் நெருக்கடியும் அந்த அணிக்கு உள்ளது. பிளே-ஆப் கனவை உயிர்ப்புடன் வைத்திருக்க கொல்கத்தாவை வீழ்த்துவது சிஎஸ்கே அணிக்கு கட்டாயமாகும்.