கடைசி வரைக்கும் இந்த ஒரு மேட்ச் போதும்யா.. தோனியின் அதிரடி ஆட்டத்தை பார்த்து நெகிழ்ந்த ரசிகர்கள்!

ரெய்னாவுடன் ஜோடி சேர்ந்தார்

இந்தப் போட்டியில் துவக்க வீரர்கள் அம்பதி ராயுடு 1, ஷேன் வாட்சன் 13 ரன்களில் ஆட்டமிழந்து ஏமாற்றினர். அடுத்து ஜாதவ் 8 ரன்களில் வெளியேற, சுரேஷ் ரெய்னாவுடன் ஜோடி சேர்ந்தார் தோனி.

பந்துக்கு ஒரு ரன்

இருவரும் நிதானமாக ரன்களை சேர்த்தனர். 12 ரன்கள் அடித்த பின் ஒரு பந்துக்கு ஒரு ரன் என்ற நிலையில் தொடர்ந்து ஆடி வந்தார் தோனி. ரெய்னா 36 ரன்களில் ஆட்டமிழந்த பின், பிராவோவுடன் கூட்டணி சேர்ந்தார்.

கடைசி ஓவர்கள்

17 ஓவர்களில் சென்னை அணி 115 ரன்களுக்கு 4 விக்கெட்கள் இழந்து 140-150 என சற்றே சிறிய அளவு ஸ்கோரை தான் எட்டும் என்ற நிலையில் இருந்தது. அப்போது தோனி - பிராவோ அதிரடி காட்டினர். 18வது ஓவரில் 24 ரன்கள் சேர்த்தனர். தோனி ஒரு சிக்ஸ், பிராவோ ஒரு சிக்ஸ், ஒரு ஃபோர் அடித்தார்.

19வது ஓவர்

19வது ஓவரில் பிராவோவும் வெளியேறினார். சென்னை அணி 147 ரன்களுக்கு 5 விக்கெட்கள் இழந்து இருந்தது. கடைசி ஓவரில் ஜடேஜா ஒரு சிக்ஸ் அடித்தார். கடைசி மூன்று பந்துகளை சந்தித்தார் தோனி.

இப்ப சிக்ஸ் அடிச்சா..

தோனி இப்போது சிக்ஸ் அடித்தால் எப்படி இருக்கும் என்ற எதிர்பார்ப்பு அனைவருக்கும் இருந்தது. அதே போல, ஒரு வைடு தவிர்த்து, கடைசி மூன்று பந்துகளிலும் சிக்ஸர் அடித்தார் தோனி. அதைக் கண்ட தோனி ரசிகர்கள், இது தான் எங்க பழைய தோனி என கொண்டாடித் தீர்த்தனர். இந்த இன்னிங்க்ஸில் 46 பந்துகளில் 75 ரன்கள் அடித்து ஆட்டமிழக்காமல் இருந்தார் தோனி.

நெகிழ்ச்சி

கடந்த ஆண்டு மோசமாக பேட்டிங் செய்த போது வந்த விமர்சனங்கள், இந்த ஆண்டு ஒருநாள் போட்டிகளில் சிறப்பாக ரன் குவித்தும், மெதுவாக ஆடுகிறார் என்ற குற்றச்சாட்டுக்கள் என தோனியை விமர்சிப்பதை பார்த்துப் பார்த்து சலித்த தோனி ரசிகர்கள்.. இன்று தோனி ஆடியதை பார்த்து உற்சாகம் அடைந்தனர். "யாரு என்ன சொன்னா எங்களுக்கு என்ன.. இந்த ஒரு ஆட்டம் போதும் எங்களுக்கு!" என நெகிழ்ச்சி அடைந்தனர்.