சென்னை: ஐபிஎல் வரலாற்றிலேயே மாபெரும் பந்துவீச்சு சாதனையை நிகழ்த்தியிருக்கிறார் முகமது ஷமி. ஐபிஎல் தொடரில் ஒரு இன்னிங்ஸின் முதல் பந்திலேயே அதிக முறை விக்கெட் வீழ்த்திய பந்துவீச்சாளர் என்ற சாதனையை நிகழ்த்தியுள்ளார்.
நேற்று சென்னை சூப்பர் கிங்ஸ் அணிக்கு எதிரான போட்டியில் சன்ரைசர்ஸ் ஹைதராபாத் அணி மோதியது. அந்த போட்டியில் முகமது ஷமி முதல் ஓவரை வீசினார். அவர் வீசிய முதல் பந்தில், சென்னை சூப்பர் கிங்ஸ் அணியின் துவக்க வீரரான ஷேக் ரஷீத் முதல் பந்திலேயே அபிஷேக் ஷர்மாவிடம் கேட்ச் கொடுத்து ஆட்டமிழந்தார். ஐபிஎல் தொடரில் ஒரு இன்னிங்ஸின் முதல் பந்திலேயே முகமது ஷமி வீழ்த்தும் நான்காவது விக்கெட்டாக இது அமைந்தது.

இதற்கு முன் முகமது ஷமி, ஜாக்கஸ் காலிஸ், கே.எல். ராகுல், ஃபில் சால்ட் ஆகியோரின் விக்கெட்டுகளை ஒரு இன்னிங்ஸின் முதல் பந்திலேயே வீழ்த்தியிருக்கிறார். இதற்கு முன் லசித் மலிங்கா, அசோக் திண்டா, பிரவீன் குமார், புவனேஷ்வர் குமார், உமேஷ் யாதவ், ட்ரெண்ட் போல்ட் ஆகியோர் ஒரு இன்னிங்ஸின் முதல் பந்திலேயே மூன்று முறை விக்கெட் வீழ்த்தியிருக்கின்றனர். அவர்களது சாதனையை முந்தியிருக்கும் முகமது ஷமி தற்போது நான்கு முறை முதல் பந்திலேயே விக்கெட்டை வீழ்த்தி சாதனை படைத்திருக்கிறார்.