முக்காலா... முக்காபுலா... என்னாது பிரபு தேவா பாட்டுக்கு டேவிட் வார்னர் டான்சா... நல்லாதான்யா இருக்கு

டேவிட் வார்னரின் அலப்பறைகள்

ஆஸ்திரேலிய கிரிக்கெட் வீரரும் சன்ரைசர்ஸ் ஐதராபாத் அணியின் வீரருமான டேவிட் வார்னர், தற்போது கொரோனா வைரஸ் காரணமாக வீட்டில் முடங்கியுள்ளார். வீட்டில் முடங்கினாலும் மிகவும் பரபரப்பாக சமூக வலைதளங்களில் செய்லபட்டு வருகிறார் வார்னர். ஓய்வு கிடைத்தாலும் கிடைத்தது, இவரது அலப்பறைகளை கட்டுப்படுத்த முடியாமல் ரசிகர்கள் அல்லோல கல்லோலப்பட்டு வருகின்றனர்.

மனைவியுடன் வார்னர் ஆட்டம்

தொடர்ந்து பல்வேறு டிக்டாக் வீடியோக்களை குறிப்பாக தமிழ்நாட்டு பிரபல பாடலான 'ஒட்டகத்தை கட்டிக்கோ' உள்ளிட்ட பல்வேறு பாடல்களை டிக் டாக் வீடியோவாக பதிவிட்டு வரும் வார்னர், தற்போது கையிலெடுத்திருப்பது, பிரபுதேவா ஆட்டத்தில் பிரபலமான முக்காலா, முக்காபுலா பாடலைத்தான். இந்த பாடலுக்கு தன்னுடைய மனைவி கேன்டிசுடன் ஆட்டம் போட்டுள்ளார் வார்னர்.

ஷில்பாவா... நாங்களா?

இதில் சிறப்பு என்னவென்றால், இவர்கள், டான்ஸ் மூவ்மெண்ட்களை சிறப்பாக கையாண்டு ஆட்டம் போட, அவர்களுக்கு பின்னால் இருந்து அவர்களது குட்டி தேவதையும் அவர்களுக்கு தெரியாமல் ஆடி அவர்களை சர்ப்ரைஸ் செய்ததுதான். இந்த வீடியோவை தன்னுடைய இன்ஸ்டாகிராமில் பதிவிட்டுள்ள வார்னர், பாலிவுட் நடிகை ஷில்பா ஷெட்டியை டேக் செய்து யார் சிறப்பாக ஆடியுள்ளனர் என்றும் கேள்வி எழுப்பியுள்ளார்.

யார் சிறப்பு?

ஏன் இவர் ஷில்பா ஷெட்டியை டேக் செய்துள்ளார் என்ற சந்தேகம் வருவது இயல்புதான். இந்த ஆண்டின் துவக்கத்தில் , இந்த பாடலுக்கு தனியாக ஆட்டம் போட்டு ஷில்பா ஷெட்டி வீடியோ வெளியிட்டிருந்தார். அந்த வீடியோவில் பிரபுதேவா முன்னால் செல்வது போல வரும். அப்புறம் என்ன ஷில்பா ஷெட்டியா, டேவிட் வார்னா அல்லது கேன்டிஸ் வார்னா ரசிகர்கள் பட்டிமன்றம் நடத்திக் கொண்டிருக்கிறார்கள்.