சிராஜ் போட்ட வெறித்தனமான பந்து.. தலைசுற்றி நின்ற டேவிட் வார்னர்.. போட்டியில் இருந்து பாதியில் விலகல்

முதல் இன்னிங்ஸ்

ஆஸ்திரேலிய அணி தரப்பில் ஓப்பனிங் வீரர் உஸ்மான் கவாஜா 125 பந்துகளில் 81 ரன்களை அடித்து நல்ல அடிதளத்தை அமைத்துக்கொடுத்தார். இதன் பின்னர் வந்த மிடில் ஆர்டர் வீரர்கள் வழக்கம் போல சொதப்பிய போதும், பீட்டர் ஹேண்ட்ஸ்கோம்ப் 72 ரன்களும், கேப்டன் பேட் கம்மின்ஸ் 33 ரன்களையும் சேர்க்க ஆஸ்திரேலிய அணி கவுரவ ஸ்கோரை எட்டியது.

சிராஜின் பவுலிங்

இந்நிலையில் முதல் இன்னிங்ஸின் போது டேவிட் வார்னருக்கு நடந்த சம்பவத்தால் ரசிகர்கள் கவலையில் உள்ளனர். ஓப்பனிங் ஆடிய வார்னர் பேட்டிங் செய்வதற்கே மிகவும் தடுமாறினார். இதனால் வேகப்பந்துவீச்சாளர் முகமது சிராஜ் வீசிய பந்துகள் வார்னரின் உடலை பதம் பார்த்தது. தொடர்ச்சியாக முதுகுப்பகுதி மற்றும் ஹெல்மெட்களில் அடிவாங்கிக்கொண்டே இருந்தார்.

தலையில் அடி

இறுதியில் அதிவேகமாக சென்ற பந்து தலையில் பெரும் அடியை கொடுத்தது. இதனால் சிறிது நேரம் தலைசுற்றி நின்றார். அந்த சமயத்தில் அவருக்கு எந்தவொரு மருத்துவ பரிசோதனையும் செய்யப்படாத சூழலில், இந்திய இன்னிங்ஸின் போது அவர் ஃபீல்டிங்கிற்கே வெளிவரவில்லை. இந்நிலையில் அவர் இந்த போட்டியில் இருந்து பாதியிலேயே வெளியேறுவதாக அறிவிக்கப்பட்டுள்ளது.

மாற்று வீரர் யார்?

இதுகுறித்து பேசியுள்ள கவாஜா, வார்னரை இன்று மருத்துவர்கள் பரிசோதனை செய்வார்கள். அவரின் நிலைமை தற்போது பயப்படும் வகையில் தான் உள்ளது. தலையில் அடிபட்டதால் ஃபீல்டிங்கிற்கு வரமாட்டார் எனக்கூறினார். எனவே வார்னருக்கு மாற்று வீரராக மேட் ரென்ஷா 2வது இன்னிங்ஸில் களமிறங்குவார் என அறிவிக்கப்பட்டுள்ளது. இவர் நாக்பூரில் நடந்த முதல் டெஸ்டில் 2 & 0 ரன்களை அடித்திருந்தார் என்பது குறிப்பிடத்தக்கது.