டி20 கிரிக்கெட்டில் இந்திய வீராங்கனை தீப்தி சர்மா உலக சாதனை.. ஆடவர் கிரிக்கெட்டில் கூட இப்படி நடக்கல

திருவனந்தபுரம்: இந்திய ஆல்-ரவுண்டர் தீப்தி ஷர்மா, டி20 சர்வதேச கிரிக்கெட்டில் புதிய சாதனை படைத்துள்ளார். திருவனந்தபுரத்தில் இலங்கைக்கு எதிரான ஐந்தாவது டி20 போட்டியில், தனது 152வது விக்கெட்டை வீழ்த்தி ஆஸ்திரேலியாவின் மெகன் ஷட்டின் (151) சாதனையை அவர் முறியடித்தார். இதன்மூலம், அதிக விக்கெட்டுகளை எடுத்த வீராங்கனையாக திகழ்கிறார்.

தீப்தியின் இந்த சாதனைப் போட்டியின் மூலம், இந்திய அணி இலங்கையை 15 ரன்கள் வித்தியாசத்தில் வீழ்த்தி, சொந்த மண்ணில் தொடரை 5-0 என கைப்பற்றியது. 176 ரன்களைத் துரத்திய இலங்கை 160/7 ரன்கள் எடுக்க, தீப்தி நான்காவது விக்கெட்டாக நிலக்ஷிகா சில்வாவை வீழ்த்தினார்.

கடந்த வாரம் நடந்த மூன்றாவது டி20 போட்டியில் ஷட்டின் சாதனையை தீப்தி சமன் செய்தார். அத்துடன், டி20 சர்வதேச வரலாற்றில் 1000 ரன்களுக்கு மேல் மற்றும் 150-க்கும் மேற்பட்ட விக்கெட்டுகளை எடுத்த முதல் வீரர் (ஆண்/பெண்) என்ற பெருமையையும் பெற்றார். மேலும், தீப்தி 1100-க்கும் அதிகமான டி20 சர்வதேச ரன்களை (23.40 சராசரி, 104.26 ஸ்ட்ரைக் ரேட்), இரண்டு அரைசதங்களுடன் எடுத்துள்ளார்.

அதே மூன்றாவது டி20 போட்டியில், 18 ரன்களுக்கு 3 விக்கெட்டுகள் வீழ்த்தி அணியை வெற்றிக்கு இட்டுச்சென்ற தீப்தி, சர்வதேச ஒட்டுமொத்த விக்கெட் பட்டியலில் ஆஸ்திரேலியாவின் எலிஸ் பெர்ரியைப் பின்னுக்குத் தள்ளினார். அவர் தற்போது 273 போட்டிகளில் 334 விக்கெட்டுகள் குவித்துள்ளார்.

சர்வதேச விக்கெட் பட்டியலில், தீப்தியை விட இருவர் மட்டுமே முன்னிலையில் உள்ளனர்: இங்கிலாந்தின் நாட் சிவர்-பிரண்ட் (275 போட்டிகளில் 335 விக்கெட்டுகள்) மற்றும் முன்னாள் இந்திய பந்துவீச்சாளர் ஜூலன் கோஸ்வாமி (291 போட்டிகளில் 355 விக்கெட்டுகள்).

ஒருநாள் போட்டிகளிலும் தீப்தி ஷர்மா தனது முத்திரையைப் பதித்துள்ளார். கோஸ்வாமிக்குப் பிறகு இந்திய அளவில் இரண்டாவது, உலக அளவில் எட்டாவது அதிக விக்கெட்டுகள் வீழ்த்திய வீராங்கனை ஆவார். 121 போட்டிகளில் 27.32 சராசரியில் 162 விக்கெட்டுகள் எடுத்துள்ளார். 20 ரன்களுக்கு 6 விக்கெட்டுகள், மூன்று 4-விக்கெட் மற்றும் நான்கு 5-விக்கெட் சாதனைகள் இதில் அடங்கும்.தீப்தி ஷர்மாவின் டெஸ்ட்டில் ஐந்து போட்டிகளில் 18.10 சராசரியில் 20 விக்கெட்டுகளுடன் ஒரு 4-விக்கெட் மற்றும் ஒரு 5-விக்கெட் சாதனையை வைத்துள்ளார்.