ஆசிய லெவனுக்காக 174
வெஸ்ட் இண்டீஸ் அணிக்கு எதிரான 4வது ஒருநாள் போட்டி வரை, தோனி இந்திய அணிக்காக 9,999 ரன்கள் எடுத்து இருக்கிறார். 2007இல் ஆசிய லெவன் அணி, ஆப்ரிக்க லெவன் அணியை எதிர்கொண்டது. அந்த தொடரில் ஆசிய லெவன் அணிக்காக ஆடிய தோனி 174 ரன்கள் குவித்தார். சர்வதேச ஒருநாள் போட்டிகளில் தோனி தற்போது 10,173 ரன்கள் எடுத்துள்ளார். அதில் ஆசிய லெவன் அணிக்காக எடுத்த 174 ரன்களை நீக்கினால், இந்திய அணிக்காக அவர் எடுத்தது 9,999 ரன்கள் மட்டுமே.
இந்த ஆண்டு மோசம்
இந்த ஆண்டில் தோனி இதுவரை 12 இன்னிங்க்ஸ் ஆடி 252 ரன்கள் மட்டுமே எடுத்துள்ளார். அவரது பேட்டிங் சராசரி 25க்கும் கீழே என்பது குறிப்பிடத்தக்கது. ஸ்ட்ரைக்ரேட் 68.10 என்ற அளவில் தான் உள்ளது. அதிரடி பேட்ஸ்மேன் என பெயர் எடுத்த தோனி, இந்த ஆண்டு முழுவதும் மிக நிதானமாக பேட்டிங் செய்ததுடன், ரன் குவிக்கவும் தவறினார்.
1 ரன் எடுத்தால்
இதனால், எளிதாக இந்திய அணிக்காக பத்தாயிரம் ஒருநாள் போட்டி ரன்களை எட்ட வேண்டிய அவர், தடுமாறி வருகிறார். தோனி வெஸ்ட் இண்டீஸ் தொடரில் தனக்கு கிடைத்த மூன்று பேட்டிங் வாய்ப்பிலும் சொற்ப ரன்களே எடுத்தார். வெஸ்ட் இண்டீஸ் அணிக்கு எதிரான 5வது ஒருநாள் போட்டி திருவனந்தபுரத்தில் நடைபெற உள்ளது. அந்த போட்டியில் 1 ரன் எடுக்கும் பட்சத்தில் தோனி பத்தாயிரம் ரன்களை எட்டி புதிய சாதனை படைப்பார்.
டி20 அணியில் இருந்து நீக்கம்
தோனி சமீபத்தில் இந்திய டி20 அணியில் இருந்து நீக்கப்பட்டது குறிப்பிடத்தக்கது. வெஸ்ட் இண்டீஸ் மற்றும் ஆஸ்திரேலியா அணிகளுக்கு எதிரான டி20 தொடர்களில் தோனியின் பெயர் இடம் பெறவில்லை. தோனி ஒருநாள் போட்டிகளில் 2019 உலகக்கோப்பை வரையாவது நீடிப்பாரா? என்ற விவாதமும் ரசிகர்கள் மத்தியில் எழுந்துள்ளது.