வாழ்கை வரலாற்று படத்துக்காக தோனி பெற்ற தொகை.. வாயைப்பிளக்கும் ரசிகர்கள்.. சுஷாந்த் சிங்கிற்கு அநீதி?

வாழ்க்கை வரலாறு

இந்தியர்களின் நீண்ட வருட கனவாக இருந்த 50 ஓவர் உலகக்கோப்பையை கடந்த 2011ம் ஆண்டு தனது மேட்ச் ஃபினிசிங் சிக்ஸர் மூலம் அசத்தலாக வென்று கொடுத்தார் தோனி. அதுமட்டுமல்லாமல் ஐசிசி-ன் மூன்று கோப்பைகளையும் வென்று கொடுத்த முதல் கேப்டன் என்ற பெருமையும் தோனியையே சேர்ந்தது. இப்படிப்பட்ட தோனி கிரிக்கெட் மட்டும் அல்லாமல் விளம்பர படங்கள் மூலமும் பெரிய அளவில் வருமானம் ஈட்டி வருகிறார். பாலிவுட் திரையுலகும் அவரின் திறமையை அங்கீகரித்து அவரின் வாழ்க்கை வரலாற்றை படமாக்கியது.

நல்ல வரவேற்பு

'எம்.எஸ்.தோனி: தி அண்டோல்ட் ஸ்டோரி' என்ற பெயரில் உருவான இந்த படம் கடந்த 2016ம் ஆண்டு செப்டம்பர் மாதம் வெளியானது. இந்த படத்தில் தோனியாக மறைந்த நடிகர் சுஷாந்த் சிங் ராஜ்புட்-ம், சாக்‌ஷி தோனியாக கைரா அத்வானியும் நடித்திருந்தனர். எதிர்பார்த்ததை விட பெரியளவில் ரசிகர்களிடம் இந்த படத்திற்கு வரவேற்பு கிடைத்திருந்தது.

தோனியின் சம்பளம்

இத்திரைப்படம் வெளியாகி 4 ஆண்டுகளுக்கு மேல் ஆகும் நிலையில், தனது வாழ்க்கை வரலாற்றை படமாக எடுத்துக்கொள்வதற்கு தோனி பெற்ற தொகையின் விவரம் வெளியாகியுள்ளது. 'தி குயிண்ட்' பத்திரிகை வெளியிட்டுள்ள தகவலின் படி இந்த படத்திற்காக ரூ. 45 கோடி பெற்றுக்கொண்டதாக தெரிவிக்கப்பட்டுள்ளது. தோனியின் தனிப்பட்ட கதை மற்றும் புகைப்படங்கள் பயன்படுத்திக்கொள்வதற்கு, இந்த படத்தின் பிரமோஷன்களில் தோனி ஈடுபடுவதற்கு சேர்த்து இந்த தொகையானது கொடுக்கப்பட்டுள்ளது.

ரசிகர்கள் அதிருப்தி

படத்தின் கதையை கொடுத்த தோனிக்கு ரூ.40 கோடி கொடுக்கப்பட்டுள்ள நிலையில் படத்தில் தோனியாக நடித்த சுஷாந்த் சிங்கிற்கு வெறும் ரூ.2 கோடி மட்டுமே சம்பளமாக கொடுக்கப்பட்டுள்ளது. தோனியின் மேலாளர் அருண் பாண்டே இந்த படத்தின் 2வது தயாரிப்பாளர் ஆவார். அவருக்கு கூட இந்த படத்திற்கு ரூ.5 கோடி கொடுக்கப்பட்டுள்ளது. ஆனால் ஒட்டுமொத்த படத்தையும் தாங்கி பிடித்த சுஷாந்த் சிங்கிற்கு குறைவான சம்பளம் கொடுக்கப்பட்டுள்ளது ரசிகர்களிடையே அதிருப்தியை ஏற்படுத்தியுள்ளது.