ரன்னும் எடுக்கவில்லை.. விக்கெட் போகும் விதமும் சரியில்லை.. துருவ் ஜூரலுக்கு அணி நிர்வாகம் எச்சரிக்கை

மும்பை: இந்திய கிரிக்கெட் அணியின் இளம் விக்கெட் கீப்பர் மற்றும் பேட்ஸ்மேனான துருவ் ஜூரல், சமீப காலமாக டெஸ்ட் போட்டிகளில் மோசமான ஃபார்மில் உள்ளதால் கடும் விமர்சனங்களைச் சந்தித்து வருகிறார். இலங்கை அணிக்கு எதிரான டெஸ்ட் தொடர் தொடங்கவுள்ள நிலையில், டெஸ்ட் அணியில் தனது இடத்தை தக்கவைத்துக் கொள்ள வேண்டும் என்றால் தனது பேட்டிங் திறனை அவர் உடனடியாக மேம்படுத்த வேண்டும் என்று இந்திய அணி நிர்வாகம் அறிவுறுத்தியுள்ளதாகத் தகவல்கள் வெளியாகியுள்ளன.

கடந்த அக்டோபர் மாதம் வெஸ்ட் இண்டீஸ் அணிக்கு எதிரான போட்டியில் 125 ரன்கள் குவித்து ஜூரல் அசத்தியிருந்தார். ஆனால், அதன்பிறகு விளையாடிய போட்டிகளில் அவரால் பெரிய அளவில் ரன் குவிக்க முடியவில்லை. அவரது சமீபத்திய இன்னிங்ஸ்களில் 44, 6, 14, 13, 0, 2 மற்றும் 19 ரன்கள் மட்டுமே எடுத்து ஏமாற்றமளித்துள்ளார். குறிப்பாக, கொல்கத்தா மற்றும் கவுஹாத்தியில் நடைபெற்ற போட்டிகளில் அவர் ஆட்டமிழந்த விதம் அணி நிர்வாகத்திற்குப் பெரும் அதிருப்தியை ஏற்படுத்தியுள்ளது.

இந்திய டெஸ்ட் அணியின் முதல் விக்கெட் கீப்பராக ரிஷப் பண்ட் விளங்குகிறார். இதனால், மிடில் ஆர்டரில் விளையாடக் கூடிய ஒரு வலது கை பேட்ஸ்மேனாகவே துருவ் ஜூரலுக்கு வாய்ப்புகள் வழங்கப்பட்டு வருகின்றன. கருண் நாயரை மீண்டும் அணிக்குள் கொண்டு வர நிர்வாகம் விரும்பாததால், ஜூரலுக்கு தொடர்ந்து வாய்ப்புகள் கிடைத்தன. ஆனால், ஐபிஎல் தொடர் மற்றும் ஆப்கானிஸ்தானுக்கு எதிரான ஒரே ஒரு டெஸ்ட் போட்டியிலும் சேர்த்து அவர் வெறும் 19 ரன்கள் மட்டுமே எடுத்து ஏமாற்றமளித்துள்ளார். அவர் தனது விக்கெட்டை எளிதாகப் பறிகொடுப்பது அணி நிர்வாகத்துக்கு அதிருப்தியை ஏற்படுத்தி உள்ளது.

இலங்கைக்கு எதிராக காலே மைதானத்தில் தொடங்கவுள்ள முதல் டெஸ்ட் போட்டியில் துருவ் ஜூரல் விளையாட வாய்ப்புள்ளது. அதே சமயம், அவருக்குப் பின்னால் சர்பராஸ் கான் மாற்று வீரராகத் தயாராகக் காத்திருப்பதால் ஜூரலுக்குப் கடும் அழுத்தம் ஏற்பட்டுள்ளது. இந்த இலங்கை தொடரிலும் அவர் சொதப்பினால், அவரது இடம் பறிபோகும் என்பதில் சந்தேகமில்லை. கடந்த 2 ஆண்டுகளாக அணி நிர்வாகமும் தேர்வுக் குழுவும் தன் மீது வைத்துள்ள நம்பிக்கையைக் காப்பாற்ற வேண்டிய மிக முக்கியமான கட்டாயத்தில் இருக்கிறார் ஜூரல்.