3 ரன்னில் டபுள் செஞ்சுரி போச்சே.. தமிழக வீரர் ஜெகதீசன் அபார ஆட்டம்.. வலுவான நிலையில் தெற்கு மண்டலம்

பெங்களூர்: 2025 துலீப் டிராபி தொடரின் அரையிறுதிப் போட்டியில் தெற்கு மண்டல அணிக்காக ஆடிய ஜெகதீசன் இரட்டை சதத்தை நூலிழையில் தவறவிட்டார். சிறப்பாக பேட்டிங் செய்த அவர் 3 ரன்களில் இரட்டை சதம் அடிக்கும் வாய்ப்பை கோட்டை விட்டார். அவரது அபாரமான ஆட்டம் காரணமாக தெற்கு மண்டல அணி வலுவான நிலைக்கு சென்றது.

2025 துலீப் டிராபி அரையிறுதிப் போட்டிகளின் இரண்டாவது நாளான வெள்ளிக்கிழமையும் பேட்ஸ்மேன்களின் ஆதிக்கமே தொடர்ந்தது. பெங்களூருவில் உள்ள பிசிசிஐ பயிற்சி மைதானங்களில் நடைபெறும் இந்த ஆட்டங்களில், வடக்கு மண்டலத்திற்கு எதிராக தெற்கு மண்டலம் மிகப்பெரிய ஸ்கோரைக் குவித்துள்ளது. மற்றொரு அரையிறுதியில், மேற்கு மண்டலம் குவித்த 438 ரன்களுக்கு மத்திய மண்டலம் நிதானமாக பதிலடி கொடுத்து வருகிறது.

இரட்டைச் சதத்தை தவறவிட்ட ஜெகதீசன்

தெற்கு மண்டல அணிக்காக, தமிழக வீரர் நாராயண் ஜெகதீசன் தனது அபாரமான ஆட்டத்தால் அனைவரையும் கவர்ந்தார். முதல் நாள் ஆட்ட நேர முடிவில் 148 ரன்களுடன் களத்தில் இருந்த அவர், இரண்டாவது நாளிலும் தனது சிறப்பான ஆட்டத்தைத் தொடர்ந்தார். இரட்டைச் சதம் அடிப்பார் என்று பெரிதும் எதிர்பார்க்கப்பட்ட நிலையில், துரதிர்ஷ்டவசமாக 197 ரன்களில் ரன் அவுட் ஆகி ஆட்டமிழந்தார்.

352 பந்துகளைச் சந்தித்த அவர், 16 பவுண்டரிகள் மற்றும் 2 சிக்ஸர்களுடன் இந்த பிரம்மாண்டமான ஸ்கோரை எட்டினார். ஜெகதீசனின் இந்த வலுவான அடித்தளத்தால், தெற்கு மண்டலம் தனது முதல் இன்னிங்ஸில் 536 ரன்கள் என்ற இமாலய ஸ்கோரைக் குவித்தது. அவருக்கு உறுதுணையாக ஆடிய ரிக்கி புய் (54) மற்றும் தனய் தியாகராஜன் (58) ஆகியோர் அரைசதம் அடித்து அணியின் ஸ்கோர் உயர உதவினர்.

தனி ஒருவனாகப் போராடிய நிஷாந்த் சிந்து

வடக்கு மண்டல பந்துவீச்சாளர்களுக்கு இந்த நாள் மிகவும் கடினமானதாக அமைந்தது. வேகப்பந்து வீச்சாளர்களால் பெரிய தாக்கத்தை ஏற்படுத்த முடியாத நிலையில், சுழற்பந்து வீச்சாளர் நிஷாந்த் சிந்து தனி ஒருவராகப் போராடினார். 2022-ம் ஆண்டு 19 வயதுக்குட்பட்டோருக்கான உலகக் கோப்பையை வென்ற இந்திய அணியில் இடம்பெற்றிருந்த சிந்து, 48 ஓவர்களுக்கு மேல் பந்துவீசி 125 ரன்களை விட்டுக்கொடுத்து 5 விக்கெட்டுகளைக் கைப்பற்றி அசத்தினார். இங்கிலாந்துக்கு எதிராக சமீபத்தில் டெஸ்ட் போட்டியில் அறிமுகமான அன்ஷுல் கம்போஜ் 2 விக்கெட்டுகளை வீழ்த்தினார்.

மத்திய மண்டலத்தின் நிதானமான ஆட்டம்

மற்றொரு அரையிறுதிப் போட்டியில், மேற்கு மண்டலம் தனது முதல் இன்னிங்ஸில் 438 ரன்கள் குவித்தது. முதல் நாள் ஆட்ட நேர முடிவில் 363 ரன்களுக்கு 6 விக்கெட்டுகளை இழந்திருந்த நிலையில், இரண்டாவது நாளில் கேப்டன் ஷர்துல் தாக்கூர் (56) மற்றும் தனுஷ் கோடியன் (76) ஆகியோரின் பொறுப்பான ஆட்டத்தால் அந்த அணி 400 ரன்களைக் கடந்தது.

இதையடுத்து, தனது முதல் இன்னிங்ஸைத் தொடங்கிய மத்திய மண்டலம், நிதானமான ஆட்டத்தை வெளிப்படுத்தியது. தொடக்க ஆட்டக்காரர்களான டேனிஷ் மலேவார் மற்றும் ஆயுஷ் பாண்டே ஆகியோர் முதல் விக்கெட்டுக்கு 93 ரன்கள் சேர்த்து வலுவான அடித்தளம் அமைத்தனர். காலிறுதியில் இரட்டைச் சதம் அடித்த மலேவார், இந்தப் போட்டியிலும் தனது சிறப்பான ஃபார்மைத் தொடர்ந்தார். அவர் 136 பந்துகளில் 76 ரன்கள் குவித்து ஆட்டமிழந்தார்.

இரண்டாம் நாள் ஆட்ட நேர முடிவில், மத்திய மண்டலம் 2 விக்கெட் இழப்பிற்கு 229 ரன்கள் எடுத்துள்ளது. அனுபவ வீரர் ஷுபம் ஷர்மா 60 ரன்களுடனும், கேப்டன் ரஜத் படிதார் 47 ரன்களுடனும் களத்தில் உள்ளனர். மத்திய மண்டலம் இன்னும் 209 ரன்கள் பின்தங்கியுள்ள நிலையில், கைவசம் 8 விக்கெட்டுகள் உள்ளன. இதனால், இந்தப் போட்டி சமபலத்துடன் விறுவிறுப்பாகச் சென்று கொண்டிருக்கிறது.

இரண்டு அரையிறுதிப் போட்டிகளும் பரபரப்பான கட்டத்தை எட்டியுள்ளதால், அடுத்த இரண்டு நாட்கள் கிரிக்கெட் ரசிகர்களுக்கு பெரும் விருந்தாக அமையும் என எதிர்பார்க்கப்படுகிறது.