இறுதிப் போட்டியிலும் சொதப்பல்.. நம்பி வாய்ப்பு கொடுத்த அணியை ஏமாற்றிய நியூசி. அதிரடி வீரர்!

அதிரடி துவக்கம்

இறுதிப் போட்டியில் நியூசிலாந்து அணி முதலில் பேட்டிங் செய்தது. மார்டின் குப்டில் இதுவரை சிறப்பாக ஆடாவிட்டாலும், தன் அனுபவத்தை எல்லாம் திரட்டி, இறுதிப் போட்டியில் தன் இயல்பான அதிரடி ஆட்டத்தை ஆடினால் எளிதாக வெல்லலாம் என நியூசிலாந்து ரசிகர்கள் ஆவலுடன் இருந்தார்கள். அதற்கேற்ப அவரும் அதிரடியாக ஒரு சிக்ஸ், இரண்டு ஃபோர் அடித்து சிறப்பாக ஆட்டத்தை துவக்கினார்.

விரைவில் அவுட்

ஆனால், 18 பந்துகளில் 19 ரன்கள் எடுத்து கிறிஸ் வோக்ஸ் பந்துவீச்சில் எல்பிடபுள்யூ ஆகி வெளியேறினார். இதனால் நியூசிலாந்து அணியும், ரசிகர்களும் பெரும் ஏமாற்றம் அடைந்தனர். இந்த உலகக்கோப்பை தொடரில் முதல் போட்டியில் மட்டுமே அரைசதம் அடித்தார் குப்டில். அதன் பின் தொடர்ந்து சொதப்பினார்.

எத்தனை ரன்கள்?

உலகக்கோப்பையில் பத்து போட்டிகளில் விளையாடிய மார்டின் குப்டில் 186 ரன்கள் மட்டுமே எடுத்துள்ளார். அவரது பேட்டிங் சராசரி 20.66 மட்டுமே. இதில் இரண்டு முதல் பந்து டக் அவுட்களும் அடங்கும். இந்திய அணிக்கு எதிரான அரையிறுதிப் போட்டியில் கூட வெறும் 1 ரன் தான் எடுத்தார். ஒருநாள் போட்டிகளில் இரட்டை சதம் அடித்த வீரரான மாட்டின் குப்டில் மிக மோசமான பார்ம் அவுட்டில் இருக்கிறார்.

நியூசிலாந்து ஆதரவு

அவர் கடுமையான பார்ம் அவுட்டில் இருந்தாலும், நியூசிலாந்து அணி அவரை தொடர்ந்து நம்பி வாய்ப்பு அளித்து வந்தது. இறுதிப் போட்டிக்கு முன் பேசும் போது நியூசிலாந்து அணி கேப்டன் கேன் வில்லியம்சன் தாங்கள் மார்ட்டின் குப்டில்-ஐ நம்புவதாகவும், அவர் சிறப்பாக ஆடினால் என்ன செய்வார் என தெரியும் என்றும் குறிப்பிட்டார். தன்னை நம்பி வாய்ப்பு வழங்கி வந்த அணியை ஏமாற்றி இருக்கிறார் குப்டில்.