ENG vs SA முதல் ஒருநாள் போட்டி தொடக்கம்.. எந்த சேனல், ஒடிடியில் பார்க்கலாம், நேரம் என்ன?

மும்பை: இங்கிலாந்துக்கு சுற்றுப்பயணம் மேற்கொண்டுள்ள தென்னாப்பிரிக்க அணி மூன்று ஒருநாள் மற்றும் மூன்று டி20 போட்டிகள் கொண்ட தொடரில் விளையாடுகிறது. இதில் இங்கிலாந்து அணி, முதல் போட்டிக்கான தங்களது பிளேயிங் XI-ஐ அறிவித்துள்ளது. இந்தப் போட்டி செப்டம்பர் 2, செவ்வாய்க்கிழமை, லீட்ஸில் உள்ள ஹெடிங்லி மைதானத்தில் நடைபெறவுள்ளது,

மேலும் இது இந்த சீசனில் இங்கிலாந்து அணி விளையாடும் முதல் வெள்ளைப் பந்து போட்டியாகும். இந்த தொடரில் முக்கிய மற்றும் அனுபவமிக்க வீரர்கள் தங்களது இடங்களைத் தக்கவைத்துள்ள நிலையில், இங்கிலாந்து அணி சோனி பேக்கருக்கு ஒருநாள் போட்டியில் அறிமுக வாய்ப்பு வழங்கியுள்ளது.

ஹாரி ப்ரூக் தலைமையிலான அணியில், ஜேமி ஸ்மித் மற்றும் பென் டக்கெட் ஆகியோர் தொடரின் முதல் போட்டியில் தென்னாப்பிரிக்காவுக்கு எதிராக தொடக்க வீரர்களாக களமிறங்குவார்கள். மூன்றாவது இடத்தில் அனுபவமிக்க வீரர் ஜோ ரூட் இருப்பார். இவர் 2025 ஆண்டு ஆண்டர்சன்-டெண்டுல்கர் டிராஃபியில் இந்தியாவுக்கு எதிரான ஐந்து டெஸ்ட் போட்டிகளில் இங்கிலாந்து அணிக்கு அதிக ரன்கள் குவித்தவராக திகழ்ந்தார்.

கேப்டன் ஹாரி ப்ரூக், முன்னாள் கேப்டன் ஜோஸ் பட்லருடன் இணைந்து நடு வரிசையை வலுப்படுத்துவார். அதே சமயம் ஆல்-ரவுண்டர்களான ஜேக்கப் பெதல், பிரைடன் கார்ஸ் மற்றும் வில் ஜாக்ஸ் ஆகியோர் இன்னிங்ஸின் இறுதிக் கட்டத்தில் ரன்கள் குவிக்கும் பொறுப்பை ஏற்பார்கள்.

கார்ஸ், ஜோஃப்ரா ஆர்ச்சருடன் இணைந்து வேகப்பந்து வீச்சாளர்களாக இருப்பார். டெம்பா பவுமா தலைமையிலான அணிக்கு எதிராக இங்கிலாந்து அணியில் ஆதில் ரஷீத் மட்டுமே ஒரேயொரு தனித்துவ சுழற்பந்து வீச்சாளராக இடம்பெற்றுள்ளார். ஹெடிங்லி மைதானத்தில் சுழற்பந்து வீச்சாளர்களுக்கு பெரிதாக உதவாத ஆடுகளத்தில் ரஷீத் தனது திறனை வெளிப்படுத்துவார்.

இந்தப் போட்டிகள் இந்திய நேரத்தில் மாலை 5.30 மணிக்கு தொடங்கும். இந்தப் போட்டிகள் சோனி டென் தொலைக்காட்சி மற்றும் சோனி லிவ் அப்பில் பார்க்கலாம். இங்கிலாந்து அணியின் முதல் ஒருநாள் போட்டிக்கான பிளேயிங் XI: ஜேமி ஸ்மித், பென் டக்கெட், ஜோ ரூட், ஹாரி ப்ரூக் (கேப்டன்), ஜோஸ் பட்லர் (விக்கெட் கீப்பர்), ஜேக்கப் பெதல், வில் ஜாக்ஸ், பிரைடன் கார்ஸ், ஜோஃப்ரா ஆர்ச்சர், ஆதில் ரஷீத், சோனி பேக்கர்