ENG vs SA: கடைசி 10 ஓவரில் பட்லர் செய்த செயல்.. நொந்து போன தென்னாப்பிரிக்கா.. இங்கிலாந்து 414 ரன்கள்

சவுத்தாம்ப்டன்: தென்னாப்பிரிக்க அணிக்கு எதிரான மூன்றாவது ஒருநாள் போட்டியில் இங்கிலாந்து அணி தனது பேட்டிங் திறனை வெளிப்படுத்தி 400 ரன்களுக்கும் மேல் குவித்தது. 40 ஓவர்கள் வரை 300 ரன்களை எட்டாத இங்கிலாந்து அணி கடைசி 10 ஓவர்களில் வெறியாட்டம் ஆடி தென்னாப்பிரிக்காவுக்கு அதிர்ச்சி வைத்தியம் அளித்தது.

இளம் வீரர் ஜேக்கப் பெத்தெல் மற்றும் அனுபவ வீரர் ஜோ ரூட் ஆகியோரின் அபார சதங்களின் உதவியுடன், இங்கிலாந்து அணி 50 ஓவர்களில் 5 விக்கெட் இழப்பிற்கு 414 ரன்கள் என்ற இமாலய ஸ்கோரை எட்டியது. ஜோஸ் பட்லர், ஜேமி ஸ்மித் ஆகியோரின் அதிரடி அரைசதங்களும் இங்கிலாந்து அணி 400 ரன்களை கடக்க முக்கிய காரணமாக அமைந்தது.

டாஸ் வென்று பந்துவீசிய தென்னாப்பிரிக்கா

சவுத்தாம்ப்டனில் உள்ள ரோஸ் பவுல் மைதானத்தில் நடைபெற்ற இந்தப் போட்டியில், டாஸ் வென்ற தென்னாப்பிரிக்கா அணி முதலில் பந்துவீசத் தீர்மானித்தது. இந்த முடிவு தங்களுக்குப் பெரும் தலைவலியாக மாறும் என்பதை அவர்கள் அப்போது அறிந்திருக்கவில்லை. இங்கிலாந்து அணியின் தொடக்க ஆட்டக்காரர்களான ஜேமி ஸ்மித் மற்றும் பென் டக்கெட் ஆகியோர் முதல் விக்கெட்டுக்கு 59 ரன்கள் சேர்த்து நல்ல தொடக்கத்தை அளித்தனர். ஸ்மித் 48 பந்துகளில் 62 ரன்கள் எடுத்து அதிரடி காட்டினார்.

பெத்தெல் - ரூட்டின் வரலாற்று பார்ட்னர்ஷிப்

ஸ்மித் ஆட்டமிழந்த பிறகு, ஜோ ரூட்டுடன் இணைந்தார் இளம் புயல் ஜேக்கப் பெத்தெல். இருவரும் தென்னாப்பிரிக்க பந்துவீச்சை நாலாபுறமும் சிதறடித்து ரன் வேட்டையில் ஈடுபட்டனர். குறிப்பாக, ஜேக்கப் பெத்தெல் தனது முதல் சர்வதேச சதத்தை வெறும் 82 பந்துகளில் 110 ரன்கள் குவித்து அசத்தினார். இதில் 13 பவுண்டரிகளும், 3 சிக்ஸர்களும் அடங்கும். மறுமுனையில் நிதானமாகவும், நேர்த்தியாகவும் ஆடிய ஜோ ரூட், தனது பங்கிற்கு 96 பந்துகளில் சதம் அடித்தார். இந்த ஜோடி மூன்றாவது விக்கெட்டுக்கு 182 ரன்கள் குவித்து, இங்கிலாந்தின் பிரம்மாண்ட ஸ்கோருக்கு அடித்தளமிட்டது.

இறுதி 10 ஓவர்களில் ரன் மழை

இங்கிலாந்து அணியின் ஆட்டம் கடைசி 10 ஓவர்களில் உச்சகட்டத்தை எட்டியது. 40 ஓவர்கள் முடிவில் 299 ரன்களை எடுத்து இருந்த நிலையில், கடைசி 10 ஓவர்களில் மட்டும் சுமார் 115 ரன்களுக்கு மேல் குவித்தது இங்கிலாந்து அணி. ஜோ ரூட் மற்றும் பெத்தெல் ஆட்டமிழந்த பிறகு களமிறங்கிய அனுபவ வீரர் ஜோஸ் பட்லர், தென்னாப்பிரிக்க பந்துவீச்சை பந்தாடினார்.

வெறும் 32 பந்துகளைச் சந்தித்த ஜோஸ் பட்லர், 8 பவுண்டரிகள் மற்றும் ஒரு சிக்ஸருடன் ஆட்டமிழக்காமல் 62 ரன்கள் விளாசினார். அவருடன் களத்தில் இருந்த வில் ஜாக்ஸ், 8 பந்துகளில் 19 ரன்கள் அடித்து தனது பங்களிப்பை அளித்தார். இதனால் இங்கிலாந்து அணியின் ஸ்கோர் 400-ஐ கடந்து 414-ஐ எட்டியது.

அதிரடி காட்டிய பேட்ஸ்மேன்கள்

இந்தப் போட்டியில் இங்கிலாந்து பேட்ஸ்மேன்களின் ஸ்டிரைக் ரேட் பிரமிக்க வைத்தது. வில் ஜாக்ஸ் 237.50 என்ற ஸ்டிரைக் ரேட்டிலும், ஜோஸ் பட்லர் 193.75 என்ற ஸ்டிரைக் ரேட்டிலும் பேட் செய்தனர். சதம் அடித்த ஜேக்கப் பெத்தெல் 134.15 என்ற ஸ்டிரைக் ரேட்டில் ரன் குவித்தார்.

தென்னாப்பிரிக்காவின் பந்துவீச்சு படுமோசம்

தென்னாப்பிரிக்க பந்துவீச்சாளர்கள் இந்த போட்டியில் முற்றிலும் திணறினர். நாந்த்ரே பர்கர் 10 ஓவர்களில் 95 ரன்களையும், கோடி யூசுப் 10 ஓவர்களில் 80 ரன்களையும் வாரி வழங்கினர். கார்பின் போஷ் 79 ரன்கள் கொடுத்து 2 விக்கெட்டுகளை வீழ்த்தினார். கேசவ் மகாராஜ் மட்டுமே சற்று கட்டுக்கோப்பாகப் பந்துவீசி 8 ஓவர்களில் 61 ரன்கள் கொடுத்து 2 விக்கெட்டுகளைக் கைப்பற்றினார்.

இங்கிலாந்து அணி இந்தப் போட்டியில் 400 ரன்களுக்கும் மேல் குவித்த நிலையில் ஒருநாள் போட்டிகளில் அதிக முறை 400 ரன்களுக்கும் மேல் குவித்த அணிகளின் பட்டியல் இங்கே கொடுக்கப்பட்டுள்ளது.

ஒருநாள் போட்டிகளில் 400-க்கும் அதிகமான ரன்கள் குவித்த அணிகள்:

• 8 - தென்னாப்பிரிக்கா
• 7 - இந்தியா
• 7 - இங்கிலாந்து
• 3 - ஆஸ்திரேலியா
• 2 - நியூசிலாந்து
• 2 - இலங்கை
• 1 - ஜிம்பாப்வே

2015 உலகக் கோப்பைக்குப் பிறகு 400-க்கும் அதிகமான ரன்கள் குவித்த அணிகள்:

• 7 - இங்கிலாந்து
• 3 - தென்னாப்பிரிக்கா
• 2 - இந்தியா
• 1 - ஆஸ்திரேலியா
• 1 - நியூசிலாந்து
• 1 - ஜிம்பாப்வே