“விடைபெறுகிறேன்”.. உலகக் கோப்பை நாயகன் ஓய்வு.. சர்வதேச கிரிக்கெட்டிலிருந்து விலகினார் கிறிஸ் வோக்ஸ்

லண்டன்: இங்கிலாந்து கிரிக்கெட் அணியின் அனுபவமிக்க வேகப்பந்து வீச்சு ஆல்-ரவுண்டர் கிறிஸ் வோக்ஸ், சர்வதேச கிரிக்கெட்டின் அனைத்து வடிவங்களிலிருந்தும் தனது ஓய்வை அறிவித்துள்ளார். 36 வயதான வோக்ஸ், இனி கவுன்டி கிரிக்கெட் மற்றும் வெளிநாட்டு ஃபிரான்சைஸ் லீக்குகளில் தனது கவனத்தைச் செலுத்தப் போவதாகத் தெரிவித்துள்ளார்.

இந்தியாவுக்கு எதிரான ஓவல் டெஸ்ட் போட்டியில் கடைசியாக விளையாடிய கிறிஸ் வோக்ஸ், அதன்பிறகு ஆஸ்திரேலியாவில் நடந்த ஆஷஸ் தொடருக்கான அணியில் இடம்பெறவில்லை. மேலும், இங்கிலாந்து கிரிக்கெட் வாரியத்தின் நீண்ட காலத் திட்டங்களில் அவர் இல்லை என்று நிர்வாக இயக்குனர் ராப் கீ உறுதிப்படுத்தியிருந்த நிலையில், அவர் தனது ஓய்வு முடிவை அறிவித்துள்ளார்.

ஓய்வு குறித்து கிறிஸ் வோக்ஸ் கூறியது:

தனது ஓய்வு குறித்து அறிக்கை வெளியிட்டுள்ள வோக்ஸ், "அந்தத் தருணம் வந்துவிட்டது, சர்வதேச கிரிக்கெட்டில் இருந்து ஓய்வு பெற இதுவே சரியான நேரம் என்று நான் முடிவு செய்துள்ளேன். சிறு வயதிலிருந்தே இங்கிலாந்துக்காக விளையாட வேண்டும் என்று கனவு கண்டேன், அந்தக் கனவுகளை நான் வாழ்ந்தேன் என்பதற்கு நம்பமுடியாத அளவிற்கு அதிர்ஷ்டசாலியாக உணர்கிறேன்" என்று குறிப்பிட்டுள்ளார்.

"கடந்த 15 ஆண்டுகளாக இங்கிலாந்து அணிக்காக ஆடியது, அந்த மூன்று சிங்கங்கள் பொறித்த உடையை அணிந்தது, சக வீரர்களுடன் களத்தைப் பகிர்ந்துகொண்டது என அனைத்தையும் நான் மிகுந்த பெருமையுடன் திரும்பிப் பார்ப்பேன்" என்று அவர் கூறியுள்ளார்.

"2011ல் ஆஸ்திரேலியாவில் அறிமுகமானது நேற்று நடந்தது போல இருக்கிறது, ஆனால் நீங்கள் மகிழ்ச்சியாக இருக்கும்போது காலம் வேகமாகப் பறந்துவிடுகிறது. இரண்டு உலகக் கோப்பைகளை வென்றதும், சில அற்புதமான ஆஷஸ் தொடர்களில் ஒரு பகுதியாக இருந்ததும் சாத்தியமாகும் என்று நான் ஒருபோதும் நினைக்கவில்லை. எனது பெற்றோர், மனைவி மற்றும் மகள்களுக்கு எனது நன்றி. அவர்களின் தியாகங்கள் இல்லாமல் இது சாத்தியமில்லை" என்று அவர் உருக்கமாகத் தெரிவித்தார்.

கிறிஸ் வோக்ஸின் சர்வதேச கிரிக்கெட் பயணம்:

கிறிஸ் வோக்ஸ், ஜனவரி 2011ல் ஆஸ்திரேலியாவுக்கு எதிரான ஒருநாள் மற்றும் டி20 தொடரில் சர்வதேச அரங்கில் அறிமுகமானார். 62 டெஸ்ட் போட்டிகளில் விளையாடியுள்ள அவர், 192 விக்கெட்டுகளை வீழ்த்தியுள்ளார். பாகிஸ்தானுக்கு எதிராக லார்ட்ஸில் 11 விக்கெட்டுகளை வீழ்த்தியது அவரது சிறந்த போட்டியாக அமைந்தது. பேட்டிங்கில் ஒரு சதம் மற்றும் ஏழு அரைசதங்களையும் அவர் அடித்துள்ளார்.

122 ஒருநாள் போட்டிகளில் இங்கிலாந்து அணிக்காக ஆடிய அவர், 173 விக்கெட்டுகளை வீழ்த்தியுள்ளார். 33 டி20 போட்டிகளில் விளையாடி 31 விக்கெட்டுகளை வீழ்த்தியுள்ளார். 2015ல் இங்கிலாந்து வெள்ளைப்பந்து கிரிக்கெட்டில் ஏற்படுத்திய புரட்சியின் முக்கிய வீரர்களில் ஒருவராக இருந்த வோக்ஸ், 2019 ஒருநாள் உலகக் கோப்பை மற்றும் 2022 டி20 உலகக் கோப்பையை வென்ற இங்கிலாந்து அணியிலும் இடம்பெற்றிருந்தார் என்பது குறிப்பிடத்தக்கது.

இந்தியாவுக்கு எதிரான தனது கடைசி டெஸ்ட் போட்டியில், காயத்துடன் பேட்டிங் செய்ய வந்த அவரது செயல், பலரது பாராட்டுகளையும் பெற்றிருந்தது. இங்கிலாந்து அணியின் எதிர்காலத் திட்டங்களில் இடமில்லாததால், கிறிஸ் வோக்ஸ் தற்போது தனது சர்வதேசப் பயணத்தை முடித்துக் கொண்டார்.