உலகக்கோப்பை நாயகனுக்கு நெருக்கடி.. சர்வதேச கிரிக்கெட்டிலிருந்து மோர்கன் ஓய்வு? புதிய கேப்டன் யார்?

7 ஆண்டுகள் எழுச்சி

கடந்த 2015ம் ஆண்டு உலகக்கோப்பை தொடரின் போது, அலெஸ்டர் குக்கிடம் இருந்து மார்கனுக்கு கேப்டன் பதவி கொடுக்கப்பட்டது. அதன்பின்னர் இங்கிலாந்துக்கு டி20 மற்றும் ஒருநாள் கிரிக்கெட்டில் பல வெற்றிகளை தேடிக்கொடுத்துள்ளார். கடந்த 2019ம் ஆண்டு உலகக்கோப்பையை இவரின் தலைமையில் தான் இங்கிலாந்து அணி பெற்றிருந்தது.

திடீர் ஓய்வு

இந்நிலையில் 35 வயதே ஆகும் மோர்கன் சர்வதேச கிரிக்கெட்டில் இருந்து ஓய்வு பெறவிருப்பதாக தகவல் வெளியாகியுள்ளது. கடந்த ஓராண்டுக்கும் மேலாக மோர்கன் காயம் மற்றும் ஃபார்ம் அவுட் பிரச்சினைகளை சந்தித்து வருகிறார். ஐபிஎல் தொடரில் ஏலம் போகாத அவர், இங்கிலாந்து அணியில் இருந்தும் புறக்கணிக்கப்படும் நிலைக்கு தள்ளப்பட்டுள்ளார்.

தொடரும் டக் அவுட்கள்

சமீபத்தில் நடைபெற்ற நெதர்லாந்து அணிக்கு எதிரான 50 ஓவர் கிரிக்கெட் தொடரின் முதல் 2 போட்டிகளும் டக் அவுட்டாகி ஏமாற்றினார். இதனால் 3வது போட்டியில் வெளியே உட்காரவைக்கப்பட்டார். இனி தனது ஃபார்மில் இருந்து மீள முடியுமா என்ற கவலையில் அவர் ஓய்வு பெறப்போவதாக தெரிகிறது.

ஸ்கோர் விவரங்கள்

இயான் மோர்கன் இதுவரை 248 ஒருநாள் போட்டிகளில் விளையாடி 7,701 ரன்களை அடித்துள்ளார். டி20 கிரிக்கெட்டில் 115 போட்டிகளில் 2,458 ரன்களை குவித்துள்ளார். டெஸ்ட் கிரிக்கெட்டை பொறுத்தவரையில் 16 போட்டிகளில் விளையாடி 700 ரன்களை சேர்த்துள்ளார்.

அடுத்த கேப்டன் யார்?

மோர்கனை தொடர்ந்து இங்கிலாந்து அணியின் கேப்டனாக சீனியர் வீரர்களான ஜாஸ் பட்லர் அல்லது மொயீன் அலி செயல்படலாம் எனத் தெரிகிறது. சர்வதேச கிரிக்கெட்டில் தற்போது பட்லர் நல்ல ஃபார்மில் இருக்கிறார். எனவே அவர் கேப்டனாவதற்கு அதிக வாய்ப்புகள் உள்ளன.