ஆஷஸ் எதிரொலி.. கிரிக்கெட் பற்றி பேசுறதுக்கான இடமா இது.. மாறிமாறி கலாய்த்துக் கொண்ட இரு பிரதமர்கள்!

லண்டன்: நேட்டோ உச்சி மாநாட்டின் போது இங்கிலாந்து பிரதமர் ரிஷி சுனக் - ஆஸ்திரேலிய பிரதமர் அந்தோனி அல்பானீஸ் இருவரும் ஆஷஸ் தொடர் புகைப்படங்களை பகிர்ந்து கலாய்த்த சம்பவம் ரசிகர்களிடையே ஆச்சரியத்தை ஏற்படுத்தியுள்ளது.

இங்கிலாந்து - ஆஸ்திரேலியா அணிகளுக்கு இடையிலான ஆஷஸ் டெஸ்ட் தொடர் விறுவிறுப்பாக நடைபெற்று வருகிறது. முதல் இரு போட்டிகளில் ஆஸ்திரேலிய அணி வென்ற நிலையில், 3வது போட்டியில் இங்கிலாந்து அணி வென்று பதிலடி கொடுத்துள்ளது. இதனால் ஆஷஸ் டெஸ்ட் 2-1 என்ற கணக்கில் உள்ளது.

இதுவரை 3 போட்டிகள் மட்டுமே முடிவடைந்துள்ள நிலையில், சர்ச்சைகளுக்கும் பஞ்சமில்லாமல் உள்ளது. ஒரு பக்கம் பேர்ஸ்டோவ் ஸ்டம்பிங் சர்ச்சை இரு நாட்டு பிரதமர்கள் வரை சென்றது. இதனைத் தொடர்ந்து அலெக்ஸ் கேரி முடிவெட்டியதற்கு பணம் கொடுக்கவில்லை என்று இங்கிலாந்து மீடியாக்கள் புதிய சர்ச்சையை உருவாக்கினர்.

இதுமட்டுமல்லாமல் களத்திலேயே 100வது டெஸ்டில் ஆடிய ஸ்டீவ் ஸ்மித்தை பேர்ஸ்டோவ் கிண்டல் செய்த விதம், ஸ்டீவ் ஸ்மித்தை இங்கிலாந்து ரசிகர்கள் வம்புக்கு இழுத்தது, லார்ட்ஸ் மைதானத்தில் எம்சிசி உறுப்பினர்கள் கவாஜாவுடன் வாக்குவாதத்தில் ஈடுபட்டது என்று அடுத்தடுத்து புதிய சர்ச்சைகள் உருவாகியது.

இந்த நிலையில் இங்கிலாந்து பிரதமர் ரிஷி சுனக் மற்றும் ஆஸ்திரேலிய பிரதமர் அந்தோனி அல்பானீஸ் நேரில் சந்தித்து கொண்டனர். அப்போது இருநாடுகளுக்கு இடையிலான பல்வேறு விவகாரங்கள் குறித்து பேசப்பட்டது. இறுதியாக ஆஸ்திரேலிய பிரதமர் அந்தோனி அல்பானீஸ், ஒரு பேப்பரை எடுத்து 2-1 என்று ஆஷஸ் தொடரில் ஆஸ்திரேலிய அணி முன்னிலையில் இருப்பதாக காட்டினார்.

அதற்கு பதிலடியாக இங்கிலாந்து பிரதமர் ரிஷி சுனக், 3வது ஆஷஸ் டெஸ்ட் போட்டியில் இங்கிலாந்து அணி வெற்றிபெற்ற புகைப்படத்தை காட்டினார். இதற்கு பதிலடியாக பேர்ஸ்டோவை ஸ்டம்பிங் செய்த புகைப்படத்தை ஆஸ்திரேலிய பிரதமர் காட்ட, உடனடியாக சுதாரித்த ரிஷி சுனக், சாண்ட்பேப்பரை மறந்துவிட்டதாக பதிலடி கொடுத்தார். இரு நாட்டு பிரதமர்கள் சந்தித்த போது ஆஷஸ் டெஸ்ட் தொடரை வைத்து கலாய்த்து கொண்டது ரசிகர்களிடையே ஆச்சரியத்தை ஏற்படுத்தியுள்ளது.