இந்தியாவுக்கு எதிரான டி20 தொடர்: இங்கிலாந்து அணியில் அதிரடி என்ட்ரி கொடுக்கும் இளம் ஆல்-ரவுண்டர்!

லண்டன்: இந்தியாவுக்கு எதிரான ஐந்து போட்டிகள் கொண்ட டி20 தொடருக்கான 17 பேர் கொண்ட இங்கிலாந்து அணியில், இதுவரை சர்வதேச போட்டிகளில் விளையாடாத இளம் ஆல்-ரவுண்டர் ஜேம்ஸ் கோல்ஸ் முதன்முறையாக சேர்க்கப்பட்டுள்ளார். இரு அணிகளுக்கும் இடையிலான இந்த ஐந்து போட்டிகள் கொண்ட தொடர் வரும் ஜூலை 1ஆம் தேதி செஸ்டர்-லீ-ஸ்ட்ரீட்டில் தொடங்குகிறது. அடுத்தடுத்த போட்டிகள் ஜூலை 4 (மான்செஸ்டர்), ஜூலை 7 (நாட்டிங்ஹாம்), ஜூலை 9 (பிரிஸ்டல்) மற்றும் ஜூலை 11 (சவுதாம்ப்டன்) ஆகிய தேதிகளில் நடைபெறவுள்ளன.

இங்கிலாந்து கிரிக்கெட்டில் மிகவும் திறமையான இளம் வீரராக ஜேம்ஸ் கோல்ஸ் கருதப்படுகிறார். வலது கை பேட்ஸ்மேனான இவர், இடது கை ஸ்பின்னராகவும் செயல்படுகிறார். கடந்த 2020ஆம் ஆண்டில், தனது 16 வயது மற்றும் 157 நாட்களில் சசெக்ஸ் அணிக்காக அறிமுகமாகி, அந்த அணியின் மிக இளம் முதல்-தர கிரிக்கெட் வீரர் என்ற சாதனையைப் படைத்தார்.

22 வயதேயான கோல்ஸ், இங்கிலாந்து மற்றும் உலகெங்கிலும் உள்ள பல்வேறு டி20 லீக் தொடர்களில் விளையாடி சிறந்த அனுபவத்தைப் பெற்றுள்ளார். இதுவரை 61 டி20 போட்டிகளில் விளையாடி 146.37 என்ற சிறப்பான ஸ்டிரைக் ரேட்டுடன் 1,373 ரன்களைக் குவித்துள்ளார். மேலும், 8.27 என்ற எகானமி ரேட்டுடன் 53 விக்கெட்டுகளையும் வீழ்த்தியுள்ளார். சமீபத்தில் நடைபெற்ற 'தி ஹண்ட்ரட் 2026' ஏலத்தில் லண்டன் ஸ்பிரிட் அணியால் 3,90,000 பவுண்டுகளுக்கு (சுமார் ரூ. 4.88 கோடி) வாங்கப்பட்டு, அந்த ஏலத்தின் மிக அதிக விலையுயர்ந்த வீரராக கோல்ஸ் சாதனை படைத்தது குறிப்பிடத்தக்கது.

ஹாரி புரூக் தலைமையிலான இந்த அணியில் இடம்பெற்றுள்ள ஒரே புதிய முகம் ஜேம்ஸ் கோல்ஸ் மட்டுமே. அதே நேரத்தில், 2026 டி20 உலகக் கோப்பை இங்கிலாந்து அணியில் இடம்பெறாத ஜோர்டான் காக்ஸ், சோனி பேக்கர் மற்றும் சாகிப் மாஹ்மூத் ஆகியோர் மீண்டும் அணிக்குத் திரும்பியுள்ளனர்.

"ஜேம்ஸ் கோல்ஸ் ஒரு சிறந்த இளம் வீரர். கடந்த 12 மாதங்களாக இங்கிலாந்து லயன்ஸ் மற்றும் உள்நாட்டு, வெளிநாட்டு டி20 போட்டிகளில் அவர் வெளிப்படுத்திய சிறப்பான ஆட்டத்தின் மூலம் இந்த இடத்தைப் பெற்றுள்ளார்" என்று இங்கிலாந்து கிரிக்கெட் தேர்வுக்குழுத் தலைவர் மார்கஸ் நோர்த் தெரிவித்துள்ளார்.

நியூசிலாந்துக்கு எதிரான டெஸ்ட் தொடர் முடிவடைந்த உடனே இந்தத் தொடர் தொடங்குவதால், சூழ்நிலைக்கு ஏற்ப வீரர்களைச் சுழற்சி முறையில் பயன்படுத்த ஏதுவாக பெரிய அளவிலான அணியைத் தேர்வு செய்துள்ளதாக மார்கஸ் நோர்த் மேலும் விளக்கமளித்துள்ளார்.

ரசிகரை தள்ளிய பாதுகாவலர்.. ரோஹித் சர்மா ஆவேசமான ரியாக்‌ஷன் - வைரலாகும் பரபரப்பு வீடியோ!

இந்தியாவுக்கு எதிரான தொடருக்கான இங்கிலாந்து அணி:

ஹாரி புரூக் (கேப்டன்), ரெஹான் அகமது, ஜோஃப்ரா ஆர்ச்சர், சோனி பேக்கர், டாம் பான்டன், ஜேக்கப் பெத்தேல், ஜோஸ் பட்லர், ஜேம்ஸ் கோல்ஸ், ஜோர்டான் காக்ஸ், சாம் கரன், லியாம் டாசன், வில் ஜாக்ஸ், சாகிப் மாஹ்மூத், அடில் ரஷித், பில் சால்ட், ஜோஷ் டங், லூக் வுட்.

காயம் காரணமாக பிரைடன் கார்ஸ் மற்றும் ஜேமி ஓவர்டன் ஆகியோர் இத்தொடரில் பங்கேற்கவில்லை என்று இங்கிலாந்து கிரிக்கெட் வாரியம் தெரிவித்துள்ளது.