"பங்காளிக" மோதப் போறாங்க.. வாங்க இப்பவே ரெடியாவோம்.. வேடிக்கை பார்க்க!

முதல் சந்திப்பு

இரு நாடுகளின் முதல் டெஸ்ட் போட்டி 1952ம் ஆண்டு அக்டோபரில் நடந்தது. ஒரு நாள் போட்டியில் இரு அணிகளும் முதலில் சந்தித்தது 1978ம் ஆண்டு அக்டோபர் மாதம்தான். இரு அணிகளுக்கும் இடையிலான முதல் டுவென்டி 20 மோதல் 2007 செப்டம்பர் 14ம் தேதியன்று நடந்தது.

பாகிஸ்தான பலசாலி

டெஸ்ட் ஒரு நாள் போட்டிகளைப் பொறுத்தவரை இந்தியாவை விட பாகிஸ்தான்தான் அதிக வெற்றிகளைப் பெற்றுள்ளது. இரு அணிகளும் மோதிய டெஸ்ட் போட்டிகள் 59. இதில் பாகிஸ்தான் 12 போட்டிகளிலும், இந்தியா 9 போட்டிகளிலும் வென்றுள்ளன.

72க்கு 52

இரு அணிகளும் மோதிய ஒரு நாள் போட்டிகள் 128. இதில் பாகிஸ்தான் 72 போட்டிகளிலும், இந்தியா 52 போட்டிகளிலும் வென்றுள்ளன.

டுவென்டி 20யில் நாம்தான் பாஸ்

அதேசமயம், டுவென்டி 20 போட்டிகளில் இந்தியாதான் ஆதிக்கம் செலுத்துகிறது. இதுவரை மொத்தம் 8 போட்டிகளில் மோதியுள்ளன. அதில் இந்தியா 6 போட்டிகளிலும், பாகிஸ்தான் ஒரு போட்டியிலும் வென்றுள்ளன.

ஐசிசி போட்டிகளில்

ஐசிசி போட்டிகளில் இந்தியாதான் அதிகம் வென்றுள்ளது. பாகிஸ்தானுக்கு எதிராக 6 உலகக் கோப்பை வெற்றி, 4 உலகக் கோப்பை டுவென்டி 20 வெற்றி, 2 சாம்பியன்ஸ் டிராபி வெற்றியை இந்தியா வைத்துள்ளது. இந்தத் தொடர்களில் நமக்கு எதிராக பெற்றது 2 சாம்பியன்ஸ் டிராபி வெற்றி மட்டுமே.

2 சாம்பியன்ஸ் டிராபி நமக்கு

இந்தியா 2 முறை சாம்பியன்ஸ் டிராபியை வென்றுள்ளது. பாகிஸ்தான் இன்னும் ஒருமுறை கூட கோப்பையை வென்றதில்லை. உலகக் கோப்பையை இந்தியா 2 முறை வென்றுள்ளது. பாகிஸ்தான் கணக்கு ஒருமுறை. உலக டுவென்டி 20 கோப்பையை இரு அணிகளும் தலா ஒருமுறை வென்றுள்ளன.

பார்க்கலாம் இந்தியா 3வது கோப்பையைத் தட்டிச் செல்கிறதா அல்லது பாகிஸ்தான் முதல் கோப்பையை முத்தமிடுமா என்பதை.