ஐதராபாத்: இந்தியா - ஆஸ்திரேலியா அணிகளுக்கு இடையேயான தொடர்களின் கடைசி ஆட்டம் ஐதரபாத்தில் இன்று இரவு நடக்க உள்ளது. ஒருதினப் போட்டித் தொடரைப் போலவே டி-20 தொடரையும் வெல்ல இந்திய அணி தயாராக உள்ளது.

ஆஸ்திரேலிய அணி இந்தியாவில் 5 ஒருதினப் போட்டிகள் மற்றும் 3 டி-20 போட்டித் தொடரில் பங்கேற்ற வந்துள்ளது. ஒருதினப் போட்டித் தொடரில் 4-1 என்ற கணக்கில் இந்தியா வென்றது.

டி-20 போட்டித் தொடரில் முதல் ஆட்டத்தில் இந்தியாவும், இரண்டாவதில் ஆஸ்திரேலியும் வென்றன. இதனால், இந்தத் தொடரை வெல்லும் போட்டி இன்று நடக்க உள்ளது.

இலங்கையைத் தொடர்ந்து ஆஸ்திரேலிய தொடரிலும் இந்தியா சிறப்பாகவே செயல்பட்டு வருகிறது. டி-20 போட்டிகளில் ஆஸ்திரேலியாவைவிட இந்தியாவே முன்னிலையில் உள்ளது.

இதெல்லாம் இருக்க, ஐதராபாத்தில் கடந்த சில நாட்களாகவே மழை பெய்து வருகிறது. தொடரின் வெற்றி யாருக்கு என்பதை இன்றைய போட்டி நிர்ணயிக்க உள்ளதால், மழை குறுக்கிடாவிட்டால், ஐதராபாத்தில் தீபாவளியை எதிர்பார்க்கலாம்

டக்வொர்த்-லூயிஸ் முறையில் எப்படி கணக்கு போடுகிறார்கள் என்றெல்லாம் கவலைப்படாமல், இன்றைக்கு வென்றால், தொடரை வெல்லலாம் என்பதை கேப்டன் விராட் கோஹ்லி உணர்ந்திருப்பார். தீபாவளிக்கு தயாராகுங்க.