பிரெஞ்சு ஓபன் 2025: நம்பர் 1 வீரரிடம் தோற்ற நோவக் ஜோகோவிக்.. சின்னர் - அல்கராஸ் இறுதிப்போட்டி

பாரீஸ்: பிரெஞ்சு ஓபன் டென்னிஸ் தொடரில், ஆண்கள் ஒற்றையர் பிரிவில் இளம் நட்சத்திர வீரர் ஜன்னிக் சின்னர், முன்னாள் சாம்பியன் நோவாக் ஜோகோவிச்சை வீழ்த்தி இறுதிப்போட்டிக்கு முன்னேறியுள்ளார். இந்த வெற்றி டென்னிஸ் உலகில் பெரும் பரபரப்பை ஏற்படுத்தியுள்ளது.

அரையிறுதிப் போட்டியில், ஜன்னிக் சின்னர் (Jannik Sinner) 6-4, 7-5, 7-6 (3) என்ற நேர் செட்களில் நோவாக் ஜோகோவிச்சை (Novak Djokovic) தோற்கடித்தார். சின்னர் இந்தப் போட்டியில் ஆதிக்கம் செலுத்தி, தனது துல்லியமான மற்றும் ஆக்ரோஷமான ஆட்டத்தால் ஜோகோவிச்சை திணறடித்தார். இந்தத் தொடரில் இதுவரை ஒரு செட்டைக்கூட இழக்காமல் இறுதிக்கு முன்னேறியுள்ளார் சின்னர்.

மற்றொரு அரையிறுதிப் போட்டியில், நடப்பு சாம்பியன் கார்லோஸ் அல்கராஸ் (Carlos Alcaraz), லோரென்சோ முசெட்டிக்கு (Lorenzo Musetti) எதிரான போட்டியில் வெற்றி பெற்றார். முசெட்டிக்கு காலில் ஏற்பட்ட காயம் காரணமாகப் போட்டியில் இருந்து விலகினார். அப்போது அல்கராஸ் 4-6, 7-6 (3), 6-0, 2-0 என்ற கணக்கில் முன்னிலையில் இருந்தார். முசெட்டியின் காயம் குறித்து அல்கராஸ் வருத்தம் தெரிவித்தாலும், இறுதிப்போட்டிக்குத் தான் முழு உடல் தகுதியுடன் இருப்பதாகத் தெரிவித்தார்.

இறுதிப் போட்டியில் ஜன்னிக் சின்னர், கார்லோஸ் அல்கராஸை எதிர்கொள்கிறார். இவ்விரு வீரர்களும் இதற்கு முன் 11 முறை நேருக்கு நேர் மோதியுள்ளனர். இதில் அல்கராஸ் 7-4 என்ற கணக்கில் முன்னிலையில் உள்ளார். மேலும், அல்கராஸ் தனது கடைசி நான்கு போட்டிகளில் சின்னருக்கு எதிராக வெற்றி பெற்றுள்ளார். எனவே, இந்த இறுதிப்போட்டி பெரும் எதிர்பார்ப்பை ஏற்படுத்தியுள்ளது.

24 கிராண்ட் ஸ்லாம் பட்டங்களை வென்ற நோவாக் ஜோகோவிச், சின்னர்-இன் வேகமான ஆட்டத்திற்கு ஈடுகொடுக்க முடியாமல் திணறினார். இந்த அரையிறுதிப் போட்டிக்குப் பிறகு, இதுவே ரோலண்ட் கரோஸில் தனது கடைசிப் போட்டியாக இருக்கலாம் என்று ஜோகோவிச் உணர்ச்சிபூர்வமாகத் தெரிவித்தார்.

சின்னர் இந்த வெற்றியின் மூலம் தனது கிராண்ட் ஸ்லாம் தொடர் வெற்றியை 20 போட்டிகளாக நீட்டித்துள்ளார். இதற்கு முன் இவர் அமெரிக்க ஓபன் மற்றும் ஆஸ்திரேலிய ஓபன் பட்டங்களையும் வென்றுள்ளார் என்பது குறிப்பிடத்தக்கது. இந்த இறுதிப்போட்டி டென்னிஸ் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. யார் பிரெஞ்சு ஓபன் பட்டத்தை வெல்வார்கள் என்று உலகமே ஆவலுடன் எதிர்பார்த்துக் கொண்டிருக்கிறது.