கம்பீர் வேண்டாம் ஆனால்.. இந்திய அணியில் விவிஎஸ் லக்ஷ்மண் வந்தால் என்ன நடக்கும்? சரியான கோச்சா?

மும்பை: இந்திய டெஸ்ட் அணி கடந்த 2024-ன் பிற்பகுதி மற்றும் 2025-ம் ஆண்டு முழுவதும் சந்தித்த சறுக்கல்கள், பிசிசிஐ வட்டாரத்தில் சலசலப்பை ஏற்படுத்தியுள்ளது. பயிற்சியாளர் கௌதம் கம்பீரின் அதிரடி அணுகுமுறை சில இடங்களில் பலன் தந்தாலும், தொடர் தோல்விகள் அவர் மீது விமர்சனங்களை எழுப்பியுள்ளது.

இந்த சூழலில், பிசிசிஐ மீண்டும் ஒரு பெயரைத் தீவிரமாக பரிசீலிப்பதாகத் தகவல்கள் வருகின்றன. அவர் வேறு யாருமல்ல, இந்திய அணியின் முன்னாள் ஜாம்பவானும், 'சைலண்ட் கில்லர்' என்று அழைக்கப்படுபவருமான விவிஎஸ் லக்ஷ்மண். கம்பீருக்கு மாற்றாக டெஸ்ட் அணிக்கு லக்ஷ்மண் தலைமை தாங்கினால் என்ன நடக்கும்? அவருடைய கடந்த கால கோச்சிங் ரெக்கார்ட் என்ன சொல்கிறது? ஒரு அலசல்.

லக்ஷ்மண் - ஆரவாரம் இல்லாத சாதனையாளர்!

லக்ஷ்மண் எப்போதுமே பில்டப் கொடுப்பவர் அல்ல. ஓய்வுக்குப் பிறகு பெங்களூருவில் உள்ள தேசிய கிரிக்கெட் அகாடமியின் (NCA) தலைவராகப் பொறுப்பேற்ற அவர், அமைதியாக அடுத்த தலைமுறை வீரர்களை உருவாக்கி வருகிறார். அவ்வப்போது இந்திய அணியின் இடைக்காலப் பயிற்சியாளராகவும் அவர் செயல்பட்டுள்ளார். அதற்கான புள்ளிவிவரங்களைப் பார்த்தால் அசந்துபோவீர்கள்.

டி20 போட்டிகள்: 8 போட்டிகளில் பயிற்சியாளராக இருந்துள்ளார். அதில் 6-ல் வெற்றி. வெற்றி விகிதம் 75%.

ஒருநாள் போட்டிகள்: 9 போட்டிகளில் 5 வெற்றி. வெற்றி விகிதம் 55.5%.

ஆசிய விளையாட்டுப் போட்டி 2023: இளம் படையை அழைத்துச் சென்று தங்கப் பதக்கத்தை வென்று கொடுத்தார்.

2022-ல் அயர்லாந்து சுற்றுப்பயணத்தின் போது இளம் அணியை லக்ஷ்மண் கையாண்ட விதம் அனைவராலும் பாராட்டப்பட்டது. வீரர்கள் எந்தக் குழப்பமும் இல்லாமல் தெளிவாக விளையாடினார்கள்.

லக்ஷ்மண் ஏன் ஸ்பெஷல்?

வெறும் வெற்றிகள் மட்டும் லக்ஷ்மணின் தகுதியைத் தீர்மானிக்கவில்லை. இன்றைய இந்திய அணியில் உள்ள இளம் வீரர்கள் மற்றும் காயத்திலிருந்து மீண்டு வரும் சீனியர் வீரர்கள் என அனைவருடனும் அவருக்கு நெருங்கிய தொடர்பு உண்டு. என்சிஏ (NCA) தலைவராக இருப்பதால், அண்டர்-19 முதல் இந்தியா 'ஏ' அணி வரை ஒவ்வொரு வீரரின் பலம், பலவீனம் அவருக்கு அத்துப்படி.

கம்பீர் Vs லக்ஷ்மண் - யார் தேவை?

இங்குதான் முக்கியமான கேள்வி எழுகிறது. கௌதம் கம்பீர் எப்போதுமே அதிரடியானவர். தவறு நடந்தால் முகத்துக்கு நேராகக் கேட்கக்கூடியவர். ஆனால், லக்ஷ்மண் நேர்மாறானவர். அவர் மிக அமைதியானவர், வீரர்களுடன் கலந்தாலோசித்து முடிவெடுப்பவர்.

தற்போது இந்திய அணி தொடர் தோல்விகளால் துவண்டு போயிருக்கும் நிலையில், கம்பீரின் 'கறார்' பாணியை விட, லக்ஷ்மணின் 'அரவணைப்பு' பாணி வீரர்களுக்கு நம்பிக்கையைத் தரும் என்று ஒரு தரப்பினர் கருதுகின்றனர். டெஸ்ட் கிரிக்கெட் என்பது பொறுமையின் சிகரம். அங்கு லக்ஷ்மணின் நிதானம் அணிக்குத் தேவைப்படலாம்.

முடிவு என்ன?

தற்போதைக்கு பிசிசிஐ கம்பீர் மீது நம்பிக்கை வைத்துள்ளது. அவரை மாற்றப் போவதில்லை என ஊடகங்களிடம் கூறி இருக்கிறது. ஆனால், நிலைமை இன்னும் மோசமானால், பிசிசிஐ-யின் முதல் தேர்வு நிச்சயமாக லக்ஷ்மண் தான்.