“இந்தியாகிட்ட இருக்க திறமைக்கு டி20-யில் 300 ரன் விளாசுவதே..”.. சவால் விட்ட பயிற்சியாளர் கம்பீர்

டெல்லி: ஆப்கானிஸ்தானுக்கு எதிரான 3 போட்டிகள் கொண்ட டி20 தொடரை இந்திய அணி 3-0 என்ற கணக்கில் முழுமையாகக் கைப்பற்றி அபார சாதனை படைத்துள்ளது. டெல்லியில் நடந்த கடைசிப் போட்டியில் இந்திய அணி விக்கெட் இழப்பின்றி முதல் 6 ஓவர்களிலேயே 100 ரன்கள் குவித்து வரலாறு படைத்தது. இந்த உச்சகட்ட அதிரடி ஆட்டத்திற்குப் பிறகும், இந்திய பேட்டர்களுக்கு தலைமை பயிற்சியாளர் கௌதம் கம்பீர் மேலும் ஒரு சவால் விடுத்துள்ளார்.

இந்தப் போட்டியில் தொடக்க வீரர் அபிஷேக் சர்மா 30 பந்துகளில் சதம் விளாசி, 34 பந்துகளில் 108 ரன்கள் குவித்தார். இதில் 11 சிக்சர்கள், 9 பவுண்டரிகள் அடங்கும். இதன்மூலம் அதிவேக சதம் அடித்த ரோஹித் சர்மாவின் (35 பந்துகள்) சாதனையை முறியடித்தார். மறுமுனையில் சஞ்சு சாம்சனும் அதிரடியாக 50 ரன்கள் குவித்தார். இந்திய அணி 20 ஓவர்களில் 221 ரன்கள் குவித்தது. பின்னர் ஆடிய ஆப்கானிஸ்தான் 94 ரன்களுக்கு சுருண்டது. இதனால் இந்தியா 127 ரன்கள் வித்தியாசத்தில் இமாலய வெற்றி பெற்றது. இந்த தொடரில் மூன்று போட்டிகளில் 229 ரன்கள் குவித்த அபிஷேக் சர்மா தொடர் நாயகன் விருதை வென்றார்.

இந்த வெற்றிக்குப் பின் பேசிய தலைமை பயிற்சியாளர் கௌதம் கம்பீர், தனிநபர் மைல்கற்களை விட ஆட்டத்தின் தாக்கமே முக்கியம் என்றார். "அபிஷேக் சதம் அடித்ததை விட, முதல் 6 ஓவர்களில் 100 ரன்கள் எடுத்ததே என்னை அதிகம் கவர்ந்தது. களத்தில் இறங்கி அடித்து ஆட ஆரம்பித்துவிட்டால், கடைசி வரை அதே வேகத்தைத் தொடர வேண்டும் என்பதுதான் எனது அறிவுரை.

இந்திய வீராங்கனைக்கும், ஆண் பயிற்சியாளருக்கும் ஒரே அறை.. ஜப்பான் ஆசிய விளையாட்டு போட்டி சர்ச்சை

சர்வதேச டி20 போட்டிகளில் இந்திய அணி இதுவரை 300 ரன்கள் என்ற மைல்கல்லை எட்டவில்லை. நமது அணியில் இருக்கும் அபாரமான திறமைக்கு, டி20 போட்டிகளில் 300 ரன்களை விளாசுவதே நமது அடுத்த இலக்காக இருக்க வேண்டும். நாம் சாதிக்க வேண்டிய விஷயங்கள் இன்னும் நிறைய உள்ளன" என்று கம்பீர் கூறினார்.