GT vs KKR: கடைசி பந்து வரை.. தலைவலியாக மாறிய கிரீன்.. திணறிய குஜராத் டைட்டன்ஸ்.. கொல்கத்தா 180 ரன்

அகமதாபாத்: 2026 ஐபிஎல் கிரிக்கெட் தொடரில் குஜராத் டைட்டன்ஸ் அணிக்கு எதிரான முக்கியமான போட்டியில், கொல்கத்தா நைட் ரைடர்ஸ் அணியின் நட்சத்திர வீரர் கேமரூன் கிரீன் தனது அதிரடி ஆட்டத்தை வெளிப்படுத்தினார். இதுவரை விளையாடிய போட்டிகளில் ரன் எடுக்க முடியாமல் கடும் விமர்சனத்திற்கு உள்ளாகியிருந்த அவர், அகமதாபாத் மைதானத்தில் அதிரடி காட்டி கொல்கத்தா அணியை கௌரவமான நிலைக்குக் கொண்டு சென்றார்.

நரேந்திர மோடி மைதானத்தில் நடைபெற்ற 25-வது லீக் போட்டியில், டாஸ் வென்ற கொல்கத்தா கேப்டன் அஜிங்க்யா ரகானே முதலில் பேட்டிங் செய்வதாக அறிவித்தார். ஆனால், ரகானேவின் முடிவு தொடக்கத்தில் அவருக்குப் பாதகமாகவே அமைந்தது. ஆட்டத்தின் முதல் ஓவரிலேயே ரகானே 0 ரன்னில் ஆட்டமிழந்து அதிர்ச்சி அளித்தார். அவரைத் தொடர்ந்து அங்கிரிஷ் ரகுவன்ஷி 8 ரன்களிலும், டிம் சீஃபெர்ட் 19 ரன்களிலும் வெளியேற, கொல்கத்தா அணி 32 ரன்களுக்கு 3 விக்கெட்டுகளை இழந்து தத்தளித்தது.

கொல்கத்தா அணி மிகப்பெரிய சரிவை நோக்கிச் சென்றபோது, கேமரூன் கிரீன் நங்கூரம் போல நிலைத்து நின்றார். கடந்த 5 போட்டிகளில் பெரிய அளவில் ரன் குவிக்காததால் அவர் மீது கடும் விமர்சனங்கள் வைக்கப்பட்டன. அதற்குப் பதிலடி கொடுக்கும் விதமாக இன்று அவரது ஆட்டம் அமைந்தது. ஆடுகளத்தின் தன்மையைப் புரிந்துகொண்டு நிதானமாக ரன் சேர்த்த அவர், நேரம் செல்லச் செல்ல குஜராத் பந்துவீச்சை துவம்சம் செய்தார்.

மொத்தம் 55 பந்துகளைச் சந்தித்த கேமரூன் கிரீன் 79 ரன்கள் குவித்தார். இதில் 7 பவுண்டரிகள் மற்றும் 4 இமாலய சிக்சர்கள் அடங்கும். அவருக்குப் பக்கபலமாக ஆடிய ரோவ்மன் பவல் 27 ரன்கள் சேர்த்து ஆட்டமிழந்தார். இவர்களின் பார்ட்னர்ஷிப் தான் கொல்கத்தா அணி 150 ரன்களைத் தாண்ட முக்கிய காரணமாக அமைந்தது.

மறுபுறம் குஜராத் அணியின் பந்துவீச்சாளர்கள் சீரான இடைவெளியில் விக்கெட்டுகளை வீழ்த்தினர். காகிசோ ரபாடா 4 ஓவர்களில் 29 ரன்கள் கொடுத்து 3 முக்கிய விக்கெட்டுகளைச் சாய்த்தார். முகமது சிராஜ் 2 விக்கெட்டுகளை வீழ்த்தி அசத்தினார். நட்சத்திர சுழற்பந்து வீச்சாளர் ரஷித் கான் 44 ரன்களை வாரி வழங்கினாலும், கேமரூன் கிரீனின் விக்கெட்டை முக்கியமான நேரத்தில் வீழ்த்தினார். அதிரடி வீரர் ரின்கு சிங் 1 ரன்னில் ஆட்டமிழந்து ஏமாற்றம் அளித்தார்.

இறுதியில் கொல்கத்தா நைட் ரைடர்ஸ் அணி 20 ஓவர்கள் முடிவில் 180 ரன்களுக்கு அனைத்து விக்கெட்டுகளையும் இழந்தது. ஒரு கட்டத்தில் 140 ரன்களைத் தாண்டுவதே கடினம் என்று கருதப்பட்ட நிலையில், கேமரூன் கிரீன் காட்டிய அதிரடியால் கொல்கத்தா அணி சவாலான இலக்கை நிர்ணயித்துள்ளது. 181 ரன்கள் எடுத்தால் வெற்றி என்ற இலக்குடன் குஜராத் டைட்டன்ஸ் அணி தற்போது களம் இறங்கியுள்ளது. சொந்த மண்ணில் சுப்மன் கில் தலைமையிலான குஜராத் அணி இந்த இலக்கை எட்டுமா அல்லது கொல்கத்தா பந்துவீச்சாளர்கள் பதிலடி கொடுப்பார்களா என்பதைப் பார்க்க ரசிகர்கள் ஆவலுடன் உள்ளனர். கேமரூன் கிரீனின் இந்த மீட்சி கொல்கத்தா அணிக்குத் தொடரில் ஒரு புது நம்பிக்கையை அளித்துள்ளது.