அணியிலிருந்து நீக்கப்பட்டதால் மனநலம் பாதிப்பு.. சிறப்பாக செயல்பட்டும் போதவில்லை.. ஹனுமா விஹாரி வேதனை

மும்பை : இந்திய கிரிக்கெட் அணியில் அடுத்த புஜாரா என்று பெயர் வாங்கியவர் ஹனுமா விகாரி. டெஸ்ட் போட்டியில் 161 பந்துகளை எதிர்கொண்டு 23 ரன்களை மட்டுமே சேர்த்து அணியை காப்பாற்றியவர்.

இதுவரை சர்வதேச டெஸ்டில் 29 இன்னிங்ஸ் விளையாடியுள்ள ஹனுமா விகாரி, 839 ரன்கள் அடித்திருக்கிறார். இதில் ஐந்து அரை சதங்களும், ஒரு சதமும் அடங்கும்.

டெஸ்ட் கிரிக்கெட்டில் இந்திய அணியில் எதிர்காலம் என்று கருதப்பட்ட ஹனுமா விகாரி திடீரென்று அணியிலிருந்து காரணமே இல்லாமல் நீக்கப்பட்டார். இந்த நிலையில் செய்தியாளர்களிடம் பேசிய ஹனுமா விகாரி ஒரு முறை நீங்கள் அணியிலிருந்து நீக்கப்பட்டால் மீண்டும் அணிக்குள் வருவது மிகவும் கடினம். ஏனென்றால் உங்களுடைய மனநலம் நிச்சயம் பாதிக்கப்படும். கடந்த சீசன் முழுவதும் நான் அப்படிதான் பாதிக்கப்பட்டேன்.

ஆனால் இம்முறை அனைத்தையும் ஓரம் கட்டி விட்டு என்னுடைய பேட்டிங்கில் மட்டும் நான் கவனம் செலுத்த நினைத்தேன். என்னுடைய திறமையை வளர்த்துக் கொண்டேன். கடந்த 12 ஆண்டுகளாக நான் என்ன செய்தேனோ அதை தான் மீண்டும் செய்து கொண்டிருக்கின்றேன். எனக்கு எந்த அணியில் வாய்ப்பு கிடைக்கிறதோ அதில் சிறப்பாக செயல்பட்டு வெற்றியை பெற்று தர வேண்டும் என்று நினைக்கிறேன்.

எனக்கு இந்திய அணியில் எப்போதெல்லாம் வாய்ப்பு கிடைத்ததோ அப்போதெல்லாம் நான் சிறப்பாக விளையாடியதாகவே எண்ணுகிறேன். நான் சிறப்பாக செயல்பட்டும் அது அணிக்கு போதவில்லை என்று நான் நினைக்கிறேன். ஆனால் மீண்டும் அதைப் பற்றி எல்லாம் கவலைப்படாமல் என்னையே நான் முன்னேற்றிக்கொள்ள உழைத்து வருகின்றேன்.

ஒரு விளையாட்டு வீரராக என்னால் அதுதான் செய்ய முடியும். எனக்கு நிச்சயம் நம்பிக்கை இருக்கிறது. எனக்கு 29 வயது தான் ஆகிறது. இன்னும் நிறைய நேரம் இருப்பதாக நினைக்கிறேன்.ரகானே 35 வயதில் இந்திய அணிக்கு மீண்டும் வந்திருக்கிறார். அதை பார்த்து நான் எழுச்சி அடைந்தேன். என்னால் இந்திய டெஸ்ட் அணியில் இடம் பிடித்து அணிக்காக பங்களிப்பை மேற்கொள்ள முடியும் என நினைக்கிறேன். அதற்காக உள்நாட்டு கிரிக்கெட்டில் ரன்கள் அடிக்க வேண்டும் என்று விளையாடி வருகின்றேன் என விகாரி கூறியுள்ளார்.