உங்க வாழ்க்கையில் என்ன சாதித்தீர்கள் என்று, விமர்சிக்கிறீர்கள்..ஹர்பஜன் சிங் கேள்வியும், மனமாற்றமும்

By Javid Ahamed

Published: Friday, August 7, 2026, 17:36 [IST]

மும்பை: தனது விளையாடும் காலத்தில் தன்னை விமர்சித்த வர்ணனையாளர்களை நேருக்கு நேர் கண்டித்ததாக முன்னாள் இந்திய சுழற்பந்து வீச்சாளர் ஹர்பஜன் சிங், தெரிவித்துள்ளார். ஆனால் ஓய்வுக்குப் பிறகுதான் அவர்கள் தங்கள் கடமையை மட்டுமே செய்தார்கள் என்பதை உணர்ந்ததாகவும் அவர் கூறியுள்ளார்.

1998 ஆம் ஆண்டு தொடங்கிய ஹர்பஜன் சிங்கின் சர்வதேச கிரிக்கெட் வாழ்க்கை 18 ஆண்டுகள் நீடித்தது. அவர் உலகின் மிகச்சிறந்த சுழற்பந்து வீச்சாளர்களில் ஒருவராக இருந்தபோதிலும், இந்திய அணியின் முதன்மை பந்துவீச்சாளராக அவரது இடம் எப்போதும் எளிதாக அமைந்துவிடவில்லை.

அவரது வாழ்க்கையின் தொடக்கத்தில் அனில் கும்ப்ளேயின் ஆதிக்கமும், இறுதிக்கட்டத்தில் ரவிச்சந்திரன் அஷ்வினின் ஆதிக்கமும் இருந்தன. இருப்பினும், சர்வதேச கிரிக்கெட்டில் 711 விக்கெட்டுகளை வீழ்த்தி சாதனை படைத்துள்ளார்.

IND vs SL பயிற்சி ஆட்டம்.. இலங்கை அணி ரன் குவிப்பு.. பவுலிங்கில் தடுமாறும் இந்திய பவுலர்கள்

ஜியோ ஹாட்ஸ்டாரில் பேசிய ஹர்பஜன் சிங், "நான் விளையாடிக்கொண்டிருந்தபோது, சில ஊடகவியலாளர்களைக் கண்டித்துள்ளேன். 'என் பின்னால் பின்தொடர்ந்து விமர்சிப்பதற்கு நீங்கள் வாழ்க்கையில் என்ன சாதனையைச் செய்துள்ளீர்கள்?' என்று அவர்களிடம் கேட்பேன். ஆனால் ஓய்வுக்குப் பிறகு, நான் யாரையெல்லாம் எதிரிகளாக நினைத்தேனோ, அவர்கள் என்னைப் பற்றித் தவறாக எதுவும் பேசவில்லை என்பதை உணர்ந்தேன். அவர்கள் தங்கள் வேலையை மட்டுமே செய்தார்கள்" என்று கூறினார்.

இதே நிகழ்ச்சியில் பங்கேற்ற ரவிச்சந்திரன் அஷ்வினும், முன்னாள் இந்திய கிரிக்கெட் வீரரும் தற்போதைய வர்ணனையாளருமான சஞ்சய் மஞ்ச்ரேக்கரின் விமர்சனம் தனது வாழ்க்கையை எவ்வாறு மாற்றியது என்பது குறித்துப் பகிர்ந்து கொண்டார்.

2012 இந்திய அணியின் ஆஸ்திரேலிய சுற்றுப்பயணத்திற்குப் பிறகு சஞ்சய் மஞ்ச்ரேக்கர் எழுதிய கட்டுரை ஒன்றை அஷ்வின் நினைவு கூர்ந்தார். அதில் "நான் சஞ்சய் மஞ்ச்ரேக்கருக்கு ஒருமுறை மெசேஜ் செய்தேன். எனது முதல் ஆஸ்திரேலிய சுற்றுப்பயணத்திற்குப் பிறகு, அவர் ஒரு நீண்ட கட்டுரையை எழுதியிருந்தார். தாயகம் திரும்பும்போது அதை முழுமையாகப் படித்தேன். அதைப் படித்ததும் எனக்கு கோபம் வந்தது, அதையும் தாண்டி மிகவும் வருத்தமடைந்தேன். அதை அப்படியே விட்டுவிட்டேன். அதன் பிறகு அவரிடம் நான் அதிகமாகப் பேசவும் இல்லை" என்று அஷ்வின் கூறினார்.

"அதன் பிறகு சஞ்சய் மஞ்ச்ரேக்கரின் நம்பரை வாங்கி, 'அன்று நீங்கள் எழுதிய கட்டுரை என் வாழ்க்கையையே மாற்றிவிட்டது' என்று மெசேஜ் செய்தேன்" என அஷ்வின் நினைவு கூர்ந்தார். மேலும், விமர்சனங்களை அணுகும் முறையை இந்த அனுபவம் மாற்றியதாகவும், எதிர்மறையான கருத்துகளிலிருந்தும் பாடம் கற்றுக்கொள்ள முயல்வதாகவும் அஷ்வின் தெரிவித்தார்.