இந்திய டி20 அணியில் சஞ்சு சாம்சனுக்கு கல்தா.. ஹர்பஜன் சிங்கின் ஆசிய கோப்பை அணித்தேர்வு!

மும்பை: 2025 ஆசியக் கோப்பை கிரிக்கெட் தொடர் நெருங்கி வரும் நிலையில், இந்திய அணியின் முன்னாள் சுழற்பந்து வீச்சாளர் ஹர்பஜன் சிங், வரவிருக்கும் தொடருக்கான தனது உத்தேச இந்திய அணியைத் தேர்வு செய்துள்ளார். அனுபவமும், இளமையும் கலந்த இந்த அணித் தேர்வு, கிரிக்கெட் வட்டாரத்தில் ஒரு புதிய விவாதத்தைக் கிளப்பியுள்ளது.

குறிப்பாக, ஐபிஎல் தொடரில் கலக்கிய இளம் வீரர்களுக்கு வாய்ப்பளித்துள்ளதும், அதே சமயம் நட்சத்திர வீரர் சஞ்சு சாம்சனைப் புறக்கணித்ததும் அனைவரது புருவங்களையும் உயரச் செய்துள்ளது.

ஹர்பஜன் சிங் தேர்வு செய்துள்ள அணி:

தொடக்க வீரர்கள்: யஷஸ்வி ஜெய்ஸ்வால், அபிஷேக் ஷர்மா, ஷுப்மன் கில்.

மிடில் ஆர்டர்: சூர்யகுமார் யாதவ் (கேப்டன்), ஹர்திக் பாண்டியா, ஷ்ரேயாஸ் ஐயர், ரியான் பராக்.

விக்கெட் கீப்பர்கள்: கே.எல். ராகுல் / ரிஷப் பந்த்.

ஆல்-ரவுண்டர்கள்: வாஷிங்டன் சுந்தர், அக்சர் படேல்.

பந்துவீச்சாளர்கள்: குல்தீப் யாதவ், முகமது சிராஜ், ஜஸ்பிரித் பும்ரா, அர்ஷ்தீப் சிங்.

ஹர்பஜன் சிங்கின் இந்த அணித் தேர்வு, இந்திய கிரிக்கெட்டின் எதிர்காலத்தை மனதில் வைத்தும், அதே சமயம் நிகழ்காலத் தேவையையும் கருத்தில் கொண்டும் அமைக்கப்பட்டுள்ளது தெளிவாகத் தெரிகிறது.

ஐபிஎல் மற்றும் உள்ளூர் போட்டிகளில் தொடர்ந்து சிறப்பாகச் செயல்பட்டு வரும் ரியான் பராக் மற்றும் அதிரடி தொடக்க ஆட்டக்காரர் அபிஷேக் ஷர்மா ஆகியோருக்கு இடம் கொடுத்திருக்கிறார். ஆனால், சஞ்சு சாம்சன் புறக்கணிக்கப்பட்டு இருக்கிறார்.

ஜஸ்பிரித் பும்ரா, முகமது சிராஜ் மற்றும் இடது கை வேகப்பந்து வீச்சாளர் அர்ஷ்தீப் சிங் ஆகியோரைக் கொண்ட வேகப்பந்துவீச்சுக் கூட்டணி, எந்தவொரு அணிக்கும் சவாலாக அமையும். ஹர்திக் பாண்டியாவுடன், அக்சர் படேல் மற்றும் வாஷிங்டன் சுந்தர் என சுழற்பந்து வீசக்கூடிய ஆல்-ரவுண்டர்கள் அணியின் பேட்டிங் மற்றும் பந்துவீச்சுக்கு ஆழம் சேர்க்கின்றனர்.

சஞ்சு சாம்சன் புறக்கணிப்புதான் ஹர்பஜனின் அணித் தேர்வில் எழுந்துள்ள மிகப்பெரிய கேள்வி. ரிஷப் பண்ட் காயத்திலிருந்து மீண்டு வரும் நிலையில், அவருக்கு அடுத்த சிறந்த விக்கெட் கீப்பர் பேட்ஸ்மேனாகக் கருதப்படும் சஞ்சு சாம்சனைச் சேர்க்காதது பலருக்கும் ஆச்சரியத்தை அளித்துள்ளது. அவருக்குப் பதிலாக கே.எல். ராகுலை மாற்று விக்கெட் கீப்பராக ஹர்பஜன் கருதுகிறார்.

2023-க்குப் பிறகு சர்வதேச டி20 போட்டிகளில் விளையாடாத ஸ்ரேயாஸ் ஐயருக்கு ஹர்பஜன் மீண்டும் வாய்ப்பளித்துள்ளார். அனுபவத்திற்கு முக்கியத்துவம் கொடுக்கும் வகையில் இந்தத் தேர்வு இருந்தாலும், அவரது தற்போதைய ஃபார்ம் ஒரு கேள்விக்குறியே.

மொத்தத்தில், ஹர்பஜன் சிங்கின் அணி ஒரு சமநிலையுடன், எதிர்காலத்தை நோக்கிய பார்வையுடன் தேர்வு செய்யப்பட்டுள்ளது. ரியான் பராக் போன்ற வீரர்களின் தேர்வு இந்திய அணிக்கு புத்துணர்ச்சி அளிக்கும் அதே வேளையில், சஞ்சு சாம்சன் போன்ற ஃபார்மில் உள்ள வீரரின் புறக்கணிப்பு விவாதத்தை ஏற்படுத்தியுள்ளது. அஜித் அகர்கர் தலைமையிலான அதிகாரப்பூர்வ தேர்வுக் குழுவின் முடிவுகள் எப்படி இருக்கும் என்பதைப் பொறுத்திருந்துதான் பார்க்க வேண்டும்.