4 முறை டக் அவுட் ஆன பாகிஸ்தான் வீரருக்கு முதல் ரேங்க்.. ஹர்திக் பாண்டியாவை முந்திய சயீம் அயூப்

அகமதாபாத்: பாகிஸ்தான் கிரிக்கெட் வீரர் சயீம் அயூப், இந்திய அணியின் முன்னணி வீரரான ஹர்திக் பாண்டியாவை பின்னுக்கு தள்ளி டி20 தரவரிசையில் அசுர வளர்ச்சி அடைந்து இருக்கிறார். இதைவிட ஆச்சரியம் என்னவென்றால், ஆசிய கோப்பை தொடரில் நான்கு போட்டிகளில் டக் அவுட் ஆன சயீம் அயூப்-பிற்கு தரவரிசையில் முதல் இடம் அளிக்கப்பட்டு இருக்கிறது.

சமீபத்தில் நடந்து முடிந்த ஆசிய கோப்பை டி20 கிரிக்கெட் தொடரில், பேட்டிங்கில் படுமோசமாகச் சொதப்பிய பாகிஸ்தானின் தொடக்க ஆட்டக்காரரும், பகுதிநேர சுழற்பந்து வீச்சாளருமான சயீம் அயூப், சர்வதேச கிரிக்கெட் கவுன்சில் (ஐசிசி) வெளியிட்டுள்ள டி20 போட்டிகளுக்கான ஆல்-ரவுண்டர்கள் தரவரிசைப் பட்டியலில் இந்திய வீரர் ஹர்திக் பாண்டியாவைப் பின்னுக்குத் தள்ளி முதலிடத்தைப் பிடித்து அனைவரையும் ஆச்சரியத்தில் ஆழ்த்தியுள்ளார்.

சமீபத்தில் ஐசிசி வெளியிட்ட புதிய தரவரிசைப் பட்டியலில், 23 வயதான சயீம் அயூப் நான்கு இடங்கள் முன்னேறி, 241 மதிப்பீட்டுப் புள்ளிகளுடன் முதலிடத்தைப் பிடித்துள்ளார். இத்தனை நாட்களாக முதலிடத்தில் சிம்மாசனமிட்டு அமர்ந்திருந்த இந்திய அணியின் நட்சத்திர ஆல்-ரவுண்டர் ஹர்திக் பாண்டியா, 233 புள்ளிகளுடன் இரண்டாம் இடத்திற்குத் தள்ளப்பட்டுள்ளார்.

ஆசிய கோப்பைத் தொடரில் சயீம் அயூப் பந்துவீச்சில் வெளிப்படுத்திய சிறப்பான செயல்பாட்டிற்காகவே இந்தத் திடீர் முன்னேற்றம் கிடைத்துள்ளது. அந்தத் தொடரில் அவர் 7 போட்டிகளில் விளையாடி 8 விக்கெட்டுகளைக் கைப்பற்றினார். மேலும், ஓவருக்கு 6.40 ரன்கள் மட்டுமே விட்டுக்கொடுத்து மிகவும் சிக்கனமாகப் பந்துவீசி அனைவரது கவனத்தையும் ஈர்த்தார்.

ஆனால், ஒரு ஆல்-ரவுண்டராக பந்துவீச்சில் அவர் ஜொலித்த அளவுக்கு பேட்டிங்கில் ஜொலிக்கவில்லை என்பதுதான் இங்கே முரண்பாடான விஷயம். ஆசிய கோப்பைத் தொடரில் அவர் விளையாடிய 7 போட்டிகளில் வெறும் 37 ரன்கள் மட்டுமே எடுத்தார். இதில் இந்தியாவுக்கு எதிரான போட்டி உட்பட நான்கு போட்டிகளில் டக் அவுட் ஆகி, ரசிகர்களுக்குப் பேரதிர்ச்சி கொடுத்தார்.

இறுதிப் போட்டியில் கூட, நல்ல தொடக்கம் கிடைத்தும் 14 ரன்களில் ஆட்டமிழந்து ஏமாற்றினார். அவர் ஆட்டமிழந்த பிறகு, பாகிஸ்தான் அணி அடுத்தடுத்து விக்கெட்டுகளை இழந்து, கடைசி 9 விக்கெட்டுகளை வெறும் 33 ரன்களுக்குள் இழந்து படுதோல்வி அடைந்தது.

சயீம் அயூப்பின் தற்போதைய பேட்டிங் ஃபார்ம் மிகவும் கவலைக்குரியதாக உள்ளது. கடந்த பத்து டி20 போட்டிகளில் ஒன்றில் மட்டுமே அவர் 20 ரன்களுக்கு மேல் எடுத்துள்ளார். ஒரு நம்பகமான ஆஃப்-ஸ்பின்னராக தன்னை நிலைநிறுத்திக் கொண்டாலும், காயத்திலிருந்து மீண்டு வந்த பிறகு அவரது பேட்டிங் கடுமையாகச் சரிந்துள்ளது.

டி20 போட்டிகளில் அவரது மோசமான பேட்டிங் காரணமாக, தென்னாப்பிரிக்காவுக்கு எதிரான டெஸ்ட் தொடருக்கான பாகிஸ்தான் அணியில் இருந்து அவர் நீக்கப்பட்டுள்ளதாகவும் செய்திகள் வெளியாகியுள்ளன. பேட்டிங்கில் படுமோசமான நிலையில் இருந்தாலும், பந்துவீச்சில் காட்டிய திறமையால் மட்டுமே ஒரு வீரர் ஆல்-ரவுண்டர் தரவரிசையில் முதலிடத்தைப் பிடிக்க முடியும் என்பது வியப்பை ஏற்படுத்தி உள்ளது.