“கிரிக்கெட் ரொம்ப சிம்பிள்.. தேவையில்லாமல்..”.. இந்திய அணியை வீழ்த்திவிட்டு ஹாரி புரூக் பேச்சு

By Aravinthan

Published: Sunday, July 12, 2026, 8:43 [IST]

சவுதாம்ப்டன்: இந்தியாவுக்கு எதிரான 5வது டி20 போட்டியில் வெற்றி பெற்று இங்கிலாந்து உலக டி20 தரவரிசையில் முதலிடத்தைப் பிடித்தது. இதுபற்றி பேசிய இங்கிலாந்து அணியின் கேப்டனும், தொடர் நாயகன் விருது வென்றவருமான ஹாரி புரூக், "கிரிக்கெட் என்பது ஒரு எளிய விளையாட்டு, நாம்தான் அதைச் சிக்கலாக்கிக் கொள்கிறோம்" என்று கூறி இருக்கிறார்.

இந்தியாவுக்கு எதிரான 5வது டி20 போட்டிக்கு பிந்தைய பரிசளிப்பு விழாவில் இங்கிலாந்து கேப்டன் ஹாரி புரூக் பேசியதாவது: "நாங்கள் மைதானத்தில் மிகவும் மகிழ்ச்சியாக விளையாடினோம். நன்கு ஓடி ரன்கள் எடுத்தோம், பவுண்டரிகளை விளாசினோம். நானும் ஜோஸ் பட்லரும் இணைந்து விளையாடிய போது, எங்களால் முடிந்தவரை சிறந்த நிலைக்கு அணியைக் கொண்டு செல்லவே முயன்றோம். அதுவே எங்களின் சிறந்த பார்ட்னர்ஷிப்பிற்கு காரணமாக அமைந்தது.

Harry Brook says Cricket is a simple game after beating India in 5th T20I

என்னைப் பொறுத்தவரை கிரிக்கெட் என்பது மிகவும் எளிமையான ஒரு விளையாட்டு. நாம்தான் அதை தேவை இல்லாமல் சிக்கலாக்கிக் கொள்கிறோம். பந்தைக் கூர்ந்து கவனித்து, அதற்கு ஏற்றவாறு சிறந்த ஷாட்களை ஆடுவது மட்டுமே எனது பாணி. தற்போது நான் பந்துகளை நன்றாக எதிர்கொண்டு வருகிறேன்.

தற்போது உலகத் தரவரிசையில் இங்கிலாந்து அணி முதலிடத்தைப் பிடித்துள்ளது. கடந்த சில போட்டிகளாகவே இந்த இலக்கை நோக்கியே நாங்கள் விளையாடினோம். அணியில் உள்ள அனைத்து வீரர்களும் இதனால் மகிழ்ச்சியில் உள்ளனர். இந்த வெற்றியை அவர்கள் கொண்டாடுவதற்கு முற்றிலும் தகுதியானவர்கள்.

சுழற்பந்து வீச்சை எதிர்கொள்ளும் போது நாமே பந்தின் வேகத்தை உருவாக்க வேண்டும். எங்களிடம் சிறந்த சுழற்பந்து வீச்சாளர்கள் உள்ளனர். அவர்கள் பேட்ஸ்மேன்களை யோசிக்க வைக்கும் திறமை படைத்தவர்கள். கடந்த 12 மாதங்களாக நாங்கள் எங்களுக்குள் மிகச் சிறந்த முறையில் விவாதித்து, எங்களுடைய திட்டங்களை மைதானத்தில் மிகச் சரியாகச் செயல்படுத்தியுள்ளோம். அதன் பலனே இந்த வெற்றி" என்று உற்சாகத்துடன் கூறினார்.

விராட் கோலியின் மெகா சாதனையை முறியடித்த ஜோஸ் பட்லர்.. சர்வதேச டி20 ரன் குவிப்பில் 3வது இடம்

இந்தியாவை 4-0 என்ற கணக்கில் வீழ்த்தியதோடு, உலகின் நம்பர் 1 டி20 அணியாக இங்கிலாந்து உருவெடுத்துள்ளதை அந்நாட்டு ரசிகர்கள் சமூக வலைதளங்களில் கொண்டாடி வருகின்றனர். அதே சமயம், 1605 நாட்களாக டி20 தரவரிசையில் முதல் இடத்தில் இருந்த இந்திய அணி அயர்லாந்து மற்றும் இங்கிலாந்து டி20 தொடர்களில் ஒரு வெற்றி கூட பெறாமல் அந்த இடத்தை இழந்துள்ளது.