2026 டி20 உலகக்கோப்பை.. இந்தியாவுக்கு மட்டும் 9 மேட்ச்.. ஆஸ்திரேலியாவுக்கு ஒரு போட்டி கூட இல்லை

மும்பை: 2026-ம் ஆண்டுக்கான டி20 உலகக்கோப்பைத் தொடர் நெருங்கி வரும் வேளையில், அணிகளின் தயார்நிலை குறித்த அட்டவணை வெளியாகியுள்ளது. அதாவது, 2026 டி20 உலகக்கோப்பை தொடருக்கு முன் ஒவ்வொரு அணியும் எத்தனை போட்டிகளில் விளையாட உள்ளன என்ற அட்டவணை வெளியாகி உள்ளது.

இதில் நடப்பு சாம்பியனான இந்திய அணிக்குத் தான் இருப்பதிலேயே அதிகப்படியான போட்டிகள் உள்ளன. அதேசமயம், ஆஸ்திரேலியா உள்ளிட்ட சில முக்கிய அணிகள் உலகக்கோப்பைக்கு முன்பு ஒரு சர்வதேச டி20 போட்டியில் கூட விளையாடாமல் நேரடியாகக் களமிறங்கவுள்ளன.

10-வது ஐசிசி ஆடவர் டி20 உலகக்கோப்பைத் தொடர் வரும் பிப்ரவரி 7, 2026 அன்று தொடங்கி மார்ச் 8 வரை நடைபெறவுள்ளது. இந்தியாவும், இலங்கையும் இணைந்து நடத்தும் இந்தத் தொடரில் 20 அணிகள் மோதுகின்றன.

உலகக்கோப்பைக்குத் தயாராகும் விதமாக இந்திய அணிக்கு மிகக் கடுமையான அட்டவணை திட்டமிடப்பட்டுள்ளது. தற்போது தென்னாப்பிரிக்காவுக்கு எதிராக 5 போட்டிகள் கொண்ட டி20 தொடரில் இந்தியா விளையாடி வருகிறது.

இதைத் தொடர்ந்து, ஜனவரி 2026-ல் நியூசிலாந்து அணி இந்தியா வருகிறது. அவர்களுக்கு எதிராக 5 டி20 போட்டிகளில் இந்தியா விளையாடவுள்ளது. மொத்தமாக உலகக்கோப்பைக்கு முன்பு சுமார் 10 சர்வதேச டி20 போட்டிகளில் இந்தியா விளையாடுகிறது.

மறுபுறம், முக்கிய அணியான ஆஸ்திரேலியா, உலகக்கோப்பைக்கு முன்பு எந்தவொரு சர்வதேச டி20 போட்டியிலும் விளையாடவில்லை. அவர்கள் நேரடியாகப் பயிற்சி ஆட்டங்கள் மற்றும் உலகக்கோப்பை போட்டிகளில் தான் களமிறங்குவார்கள். ஆஸ்திரேலியா மட்டுமின்றி ஜிம்பாப்வே, ஆப்கானிஸ்தான், வங்கதேசம் மற்றும் அயர்லாந்து ஆகிய அணிகளுக்கும் உலகக்கோப்பைக்கு முன் டி20 போட்டிகள் எதுவும் இல்லை. பாகிஸ்தான் அணி மூன்று போட்டிகளில் மட்டுமே விளையாட உள்ளது.

அணிகளின் அட்டவணை விவரம் (உலகக்கோப்பைக்கு முன்):

இந்தியா 5 போட்டிகளைத் தென்னாப்பிரிக்காவுடனும், 5 போட்டிகளை நியூசிலாந்துடனும் உள்ளூரில் விளையாடுகிறது.

ஆஸ்திரேலியாவுக்கு உலகக்கோப்பைக்கு முன் டி20 போட்டிகள் எதுவும் இல்லை.

பாகிஸ்தான் ஜனவரி 2026-இல் இலங்கையில் 3 போட்டிகளை இலங்கையுடன் விளையாட உள்ளது.

இங்கிலாந்து ஜனவரி/பிப்ரவரி 2026-இல் இலங்கையில் 3 போட்டிகளை இலங்கையுடன் விளையாட உள்ளது.

தென்னாப்பிரிக்கா 5 போட்டிகளை இந்தியாவில் இந்தியாவுடனும், 3 போட்டிகளை மே.இ.தீவுகளில் வெஸ்ட் இண்டீசுடனும் விளையாடுகிறது.

நியூசிலாந்து ஜனவரி 2026-இல் இந்தியாவில் 5 போட்டிகளை இந்தியாவுடன் விளையாட உள்ளது.

இலங்கை 3 போட்டிகளைப் பாகிஸ்தானுடனும், 3 போட்டிகளை இங்கிலாந்துடனும் உள்ளூரில் விளையாட உள்ளது.

வெஸ்ட் இண்டீஸ் ஜனவரி/பிப்ரவரி 2026-இல் உள்ளூரில் 3 போட்டிகளைத் தென்னாப்பிரிக்காவுடன் விளையாட உள்ளது.

ஆப்கானிஸ்தானுக்கு உலகக்கோப்பைக்கு முன் டி20 போட்டிகள் எதுவும் இல்லை.

வங்கதேசத்துக்கு உலகக்கோப்பைக்கு முன் டி20 போட்டிகள் எதுவும் இல்லை.

2026 டி20 உலகக்கோப்பை தொடர் மொத்தம் 8 மைதானங்களில் போட்டிகள் நடைபெறவுள்ளன. இந்தியாவில் அகமதாபாத், சென்னை, டெல்லி, மும்பை, கொல்கத்தா ஆகிய மைதானங்களில் போட்டிகள் நடைபெறும். இலங்கையில் கொழும்பு பிரேமதாசா, கொழும்பு SSC மற்றும் கண்டி ஆகிய மைதானங்களில் போட்டிகள் நடைபெறும்.

2024-ல் இந்திய அணிக்குக் கோப்பையை வென்று கொடுத்த முன்னாள் கேப்டன் ரோஹித் சர்மா, இந்தத் தொடருக்கான நல்லெண்ணத் தூதராக நியமிக்கப்பட்டுள்ளார் என்பது குறிப்பிடத்தக்கது.