ஒருமணி நேரம் போதும்.. மனதை லேசாக்க "புக் கிரிக்கெட்" - விளையாடுவது எப்படி?

நமக்கும் நல்லது

தமிழகத்திலும் கொரோனா பரவல் உச்சத்தில் இருக்கும் சூழலில், தளர்வுகள் இல்லா முழு ஊரடங்கை அரசு அமல்படுத்தி இருக்கிறது. இதனால், மிக அத்தியாவசிய தேவைகளை தவிர்த்து வீட்டை விட்டு வெளியே போனால், போலீஸ் வேட்டு வைத்துவிடுகிறது. வெளியே போகாமல் இருப்பது தான் உண்மையில் நமக்கும் நல்லது.

கிரிக்கெட் வெறியரா?

ஆனா, வீட்டுக்குள்ளேயே இருக்குறது எவ்ளோ கஷ்டம் என்பதை உணராமல் இல்லை. எவ்வளவு நேரம் தான் டிவி பார்ப்பது? ஃபோன் நோண்டுவது? ஒருகட்டத்தில் ச்சை.. என்கிற அளவுக்கு எரிச்சலாக வரும். மன அழுத்தமே அங்கிருந்து தான் தொடங்குகிறது. சரி.. எல்லாம் ஒருபக்கம் இருக்கட்டும். ஐபிஎல்-லை தவற விட்ட கிரிக்கெட் ரசிகர்கள், கிரிக்கெட் வெறியர்கள் நீங்களா? அப்படின்னா இந்த செய்தி உங்களுக்கு தான்.

90'ஸ் கிட்ஸ் பேவரைட்

இன்றைய 2k கிட்ஸ்-க்கு தெரியாத ஒரு விளையாட்டு 'புக் கிரிக்கெட்'. 90'ஸ் கிட்ஸ்களின் ஆஸ்தான விளையாட்டு. ஸ்பெஷல் கிளாஸ் சென்று படித்ததை விட, நண்பர்களுடன் புக் கிரிக்கெட் விளையாடியவர்கள் இன்று உலகின் பல்வேறு நிறுவனங்களில் முக்கிய பொறுப்புகளில் பணியாற்றுகிறார்கள். அந்தளவுக்கு, இதை விளையாடாத 90'ஸ் கிட்ஸ் இல்லை என்பதற்கு சொல்கிறேன்.

புத்தகம் தேவை

சரி.. இதை எப்படி விளையாடுவது? ஆட்டத்துக்கு முக்கியமாக தேவை இரண்டு பேர். ஒரு நல்ல பெரிய சைஸ் புக் ஒன்னு எடுத்துக்கோங்க. அதை ஒவ்வொரு முறையும் திறந்து திறந்து மூட வேண்டும். ஒவ்வொரு முறை திறக்கும் போதும், புத்தகத்தின் வலது பக்கத்தின் கீழ் உள்ள 'Page No' கவனிங்க. அதில், கடைசியா என்ன நம்பர் இருக்கோ.. அதுதான் உங்க ஸ்கோர். அதாவது நீங்க புத்தகத்தை திறக்கும் போதும், 46-ன்னு வந்துச்சுனா, 6 தான் உங்க ஸ்கோர். இப்படி '0' வரும் திறந்து திறந்து ஸ்கோர் எண்ணிக்கிட்டே வரணும். எப்போ ஜீரோ வருதோ அப்போ நீங்க அவுட். அதாவது முதல் விக்கெட் அவுட். அதுமாதிரி, 10 முறை ஜீரோ வரும் வரை விளையாடணும். கடைசியா 10 விக்கெட் ரன்களையும் கூட்டினா வரும் ரன்கள் தான் உங்க டோட்டல் ஸ்கோர்.

ஃப்ரீயா இருங்க

அப்புறம், உங்கள் நண்பர் அதே மாதிரி விளையாடனும். அவர் உங்கள் டோட்டல் ஸ்கோரை தாண்டிட்டா அவர் வின்னர். இல்லனா, நீங்க தான் வெற்றியாளர். இந்த விளையாட்டுக்கு இரண்டு பேருன்னு மட்டுமல்ல.. எத்தனை பேர் வேண்டுமானாலும் விளையாடலாம். 90'ஸ் கிட்ஸ் இதுல டோர்னமெண்ட்-லாம் நடத்தி ஜமாய்ச்சிருக்காங்க-னா பார்த்துக்கோங்க. அதுமட்டுமில்ல, வீட்டில் உள்ள அனைவர்களுடன் மனம்விட்டு ஜாலியா ஒரு மணி நேரம் செலவழிக்க அருமையான டைம்பாஸ் இந்த புக் கிரிக்கெட் எனலாம். மனசும் லேசாகும். ட்ரை பண்ணிப் பாருங்க.