என்னை சிறந்த கிரிக்கெட் வீரராக மாற்றிய பெருமை டோணிக்கே சேரும்.. சொல்வது தென் ஆப்பிரிக்க கேப்டன்!

டுப்ளசிஸ் புகழாரம்

டெல்லியில் நிருபர்களிடம் பேசிய தென் ஆப்பிரிக்க டி20 அணிக்கான, கேப்டன் பாப் டுப்ளசிஸ் கூறியது: சென்னை அணிக்காக ஐந்து சீசன்களில் டோணி தலைமையின்கீழ் விளையாடியுள்ளேன். அந்த வகையில் என்னை ஒரு கிரிக்கெட் வீரராக வார்த்து எடுத்தது டோணியின் தலைமை.

கூல் கேப்டன்

எந்த ஒரு பதற்றமான நேரத்திலும் கூலாக இருக்கும் டோணியை பார்த்து வியந்துள்ளேன். டோணியிடமே இதுகுறித்து கேட்டுள்ளேன். டோணியிடமிருந்து நிறைய விஷயங்களை கற்றுக்கொள்ள முடியும். டோணி மீது எனக்கு மிகுந்த மரியாதை உண்டு.

அதிருஷ்டம்

சென்னை அணியில், டோணி, பிரண்டன் மெக்கல்லம் உள்ளிட்டோருடன் இணைந்து ஆடியது சிறப்பான அனுபவம். நிறைய விஷயங்களை கற்றுக்கொள்ள வாய்ப்பு கிடைத்தது. டோணி தலைமையில் விளையாடியது என்னை பொருத்தளவில் அதிருஷ்டம். தென் ஆப்பிரிக்க அணி வீரர்கள் பலருக்கும் இந்திய மண்ணில் விளையாடி அனுபவம் உள்ளது. ஐபிஎல் போட்டிகளால்தான் இது சாத்தியப்பட்டது.

ஹஸ்சி இருக்கிறார்

ஆஸ்திரேலிய முன்னாள் வீரர் மைக் ஹஸ்சி எங்களின் உதவி ஊழியராக இருப்பது பெரும் மகிழ்ச்சி. மைக் ஹஸ்சி ஒரு சிறந்த ஜென்டில்மேன். இளைஞர்கள் அவரிடமிருந்து நிறைய கற்றுக்கொள்ளலாம். ஹஸ்சியுடனும் சென்னை அணிக்காக விளையாடிய அனுபவம் எனக்கு உள்ளது. இவ்வாறு பாப் டுப்ளசிஸ் தெரிவித்தார். இன்று தென் ஆப்பிரிக்க அணி பயிற்சியாட்டம் ஒன்றில் ஆட உள்ளது குறிப்பிடத்தக்கது.