ICC டி20 தரவரிசை பட்டியல்.. நம்பர் 1 இடத்தை இழந்த தமிழக வீரர்.. நம்பர் 2 இடத்திற்கு உயர்ந்த இசான்

மும்பை: ஐசிசி டி20 போட்டிகளுக்கான தரவரிசை பட்டியலில் இந்திய விக்கெட் கீப்பர் இஷான் கிஷன் உலக அளவில் இரண்டாம் இடத்தைப் பிடித்துள்ளார். டி20 உலககோப்பையை இந்தியா வென்ற நிலையில், புதிய தரவரிசைப் பட்டியலை ஐசிசி வெளியிட்டுள்ளது. இதில், இசான் கிஷன் இரண்டு இடங்கள் முன்னேறி இந்த சாதனையைப் படைத்துள்ளார். இஷான் கிஷன் 871 புள்ளிகளுடன், முதலிடத்தில் உள்ள அபிஷேக் ஷர்மாவை விட வெறும் நான்கு புள்ளிகள் மட்டுமே பின்தங்கியுள்ளார்.

27 வயதாகும் இஷான், உலகக் கோப்பை 2026 அரையிறுதியில் இங்கிலாந்துக்கு எதிராக 18 பந்துகளில் 39 ரன்களும், நியூசிலாந்துக்கு எதிரான இறுதிப் போட்டியில் 25 பந்துகளில் 54 ரன்களும் குவித்து இந்திய வெற்றிக்கு பங்காற்றினார். இந்தச் சிறப்பான ஆட்டமே அவரது தரவரிசை முன்னேற்றத்திற்குக் காரணம்.

மற்ற பேட்ஸ்மேன்களின் பட்டியலில், உலகக் கோப்பையில் அதிக ரன்கள் எடுத்த பாகிஸ்தான் தொடக்க வீரர் சாஹிப்சாதா ஃபர்ஹான் மூன்றாம் இடத்திற்கு சரிந்தார். நியூசிலாந்து தொடக்க வீரர் டிம் செய்பர்ட், அரையிறுதி மற்றும் இறுதிப் போட்டியில் அரை சதங்கள் அடித்ததன் மூலம் நான்கு இடங்கள் முன்னேறி ஆறாம் இடத்தைப் பிடித்துள்ளார்.

பும்ரா இல்லை என்றால், இந்திய அணி கதி அவ்வளவு தான்.. உலக கோப்பையே அவரால் கிடைத்தது- சபா கரீம் கருத்து

நியூசிலாந்து அணியின் தொடக்க ஆட்டக்காரர் பின் ஆலன், முதல் அரையிறுதியில் தென்னாப்பிரிக்காவுக்கு எதிராக வெறும் 33 பந்துகளில் சதம் அடித்து ஏழு இடங்கள் முன்னேறி 20-வது இடத்தைப் பெற்றார். இங்கிலாந்தின் ஜேக்கப் பெத்தேல் இந்தியாவுக்கு எதிரான அரையிறுதியில் 105 ரன்கள் குவித்து, 17 இடங்கள் முன்னேற்றத்துடன் உலகின் 16-வது இடத்திற்கு உயர்ந்துள்ளார்.

இந்தியாவின் சஞ்சு சாம்சனும் ஐசிசி இருபது ஓவர் பேட்ஸ்மேன் தரவரிசையில் கணிசமான முன்னேற்றம் கண்டுள்ளார். இங்கிலாந்து மற்றும் நியூசிலாந்துக்கு எதிராக அவர் அடித்த 89 ரன்கள், அவரை கடந்த வாரம் 40-வது இடத்திலிருந்து 18 இடங்கள் முன்னேற்றி 22-வது இடத்தைப் பெற உதவியது. தற்போது 637 தரவரிசை புள்ளிகளுடன் தனது தொழில் வாழ்க்கையின் சிறந்த நிலையை அடைந்துள்ளார்.

பந்துவீச்சாளர்கள் தரவரிசையில், இந்தியாவின் வருண் சக்கரவர்த்தி ஐந்து மாதங்களுக்கும் மேலாகப் பிடித்திருந்த முதலிடத்தை இழந்து இரண்டாம் இடத்திற்கு 740 புள்ளிகள் பெற்று சரிந்துள்ளார். ஆப்கானிஸ்தானின் ரஷீத் கான் புதன்கிழமை அன்று ஒரு இடம் முன்னேறி, 753 புள்ளிகளுடன் புதிய முதலிடம் பிடித்துள்ளார்.

இருபது ஓவர் உலகக் கோப்பை இறுதிப் போட்டியில் இந்திய வேகப்பந்து வீச்சாளர் ஜஸ்பிரித் பும்ரா 15 ரன்களுக்கு 4 விக்கெட்டுகளை வீழ்த்தினார். இந்தியா 96 ரன்கள் வித்தியாசத்தில் வெற்றி பெற்ற இப்போட்டியில் அவரது சிறப்பான பந்துவீச்சு, அவரை கடந்த வாரம் 7-வது இடத்திலிருந்து ஆறாம் இடத்திற்கு உயர்த்தியது.

தோனி, கபில்தேவ் வெற்றிகள் பக்கத்தில் கூட இந்த டி20 உலககோப்பை வெற்றியால் வர முடியாது- மஞ்சுரேக்கர்

பும்ராவைத் தவிர, அக்சர் படேலும் இறுதிப் போட்டியில் மூவிக்கெட்டுகளை வீழ்த்தி, ஆறு இடங்கள் முன்னேறி உலகின் 17-வது இடத்திற்கு மாறினார். இருபது ஓவர் ஆல்-ரவுண்டர்கள் பட்டியலில், இந்தியாவின் ஷிவம் துபே இரண்டு இடங்கள் சரிந்து, 195 புள்ளிகளுடன் 11-வது இடத்தில் உள்ளார்.