இந்தியா - ஆப்கானிஸ்தான் முதல் டி20.. மழையால் போட்டி ரத்தாகுமா? டெல்லி வானிலை நிலவரம் என்ன?

டெல்லி: இந்தியா மற்றும் ஆப்கானிஸ்தான் அணிகளுக்கு இடையேயான 3 போட்டிகள் கொண்ட டி20 கிரிக்கெட் தொடரின் முதல் போட்டி, டெல்லி அருண் ஜெட்லி மைதானத்தில் இன்று (செப்டம்பர் 13) இரவு 7:30 மணிக்கு தொடங்குகிறது. ஜப்பானில் நடைபெறவுள்ள ஆசிய விளையாட்டுப் போட்டிக்கு முன்னோட்டமாக இந்த தொடர் நடைபெற உள்ளது. ஆனால், இந்த தொடரின் முதல் போட்டிக்கு மழை பெரும் அச்சுறுத்தலாக உருவெடுத்துள்ளது.

டெல்லியில் செப்டம்பர் 13 அன்று பிற்பகல் மற்றும் இரவு நேரங்களில் மழை பெய்ய வாய்ப்புள்ளதாக வானிலை மையம் எச்சரித்துள்ளது. பிற்பகலில் 64 சதவீத மழையும், போட்டி தொடங்கும் மாலை நேரத்தில் 49 சதவீத மழையும் பெய்ய வாய்ப்புள்ளது. மேலும், இரவு நேரத்தில் 55 சதவீத மழையும், 33 சதவீத இடிமின்னலுடன் கூடிய மழையும் பெய்யக்கூடும் என கணிக்கப்பட்டுள்ளது. இதனால் போட்டி முழுமையாக நடைபெறுமா அல்லது ஓவர்கள் குறைக்கப்படுமா என்ற சந்தேகம் எழுந்துள்ளது.

ஒரு மாத கால உள்ளூர் டி20 லீக் போட்டிகளுக்குப் பிறகு டெல்லி ஆடுகளம் சற்று மந்தமாக மாறி இருக்கும் நிலையில், பந்துவீச்சுக்கு சாதகமாக இருக்கும் என எதிர்பார்க்கப்படுகிறது. ரஷீத் கான், நூர் அகமது மற்றும் முஜீப் உர் ரஹ்மான் அடங்கிய ஆப்கானிஸ்தானின் அனுபவ சுழற்பந்து வீச்சாளர்கள் இந்திய பேட்டர்களுக்குக் கடுமையான சவாலை அளிப்பார்கள்.

வேகப்பந்து வீச்சில் ஃபசல்ஹக் பரூக்கி, நவீன்-உல்-ஹக் மற்றும் ஆல்-ரவுண்டர்களான குல்பதின் நைப், அஸ்மத்துல்லா ஒமர்சாய் ஆகியோர் ஆப்கானிஸ்தான் அணிக்குப் பலம் சேர்க்கின்றனர். இந்திய அணியைப் பொறுத்தவரை தலைமைப் பயிற்சியாளர் கௌதம் கம்பீரின் திட்டப்படி அக்சர் படேல், வாஷிங்டன் சுந்தர் போன்ற ஆல்-ரவுண்டர்கள் களமிறங்க உள்ளனர்.

ராக்கெட்டை உடைத்து கேமராமேனை விரட்டிய சபலென்கா.. அமெரிக்க ஓபன் பைனல் தோல்வியால் ஆவேசம்

ஆப்கானிஸ்தான் கிரிக்கெட் வாரியத்திற்கு உதவும் வகையில் பிசிசிஐ இந்தத் தொடரை இந்தியாவில் நடத்துகிறது. இரு அணிகளுக்கும் இடையிலான இந்த விறுவிறுப்பான மோதலின் முதல் போட்டியை மழை கெடுத்துவிடக் கூடாது என்பதே ரசிகர்களின் எதிர்பார்ப்பாக உள்ளது. இந்த தொடரின் மற்ற இரண்டு போட்டிகளும் இதே டெல்லி மைதானத்தில் நடைபெற உள்ளது குறிப்பிடத்தக்கது.